A-ROMA 9 - MUKANDA USANDU WA ZAMBI 1975

¹ Ngunambe umwenemwene muli Kristu, chahanjikile mahuza, mbunge yami yakushindakenya hamwe ni yami muli Spiritu Musandu,

² ngwami, Chinyengo chinene ni yikola yize kuyishi kuhola nguli nayo mu mbunge yami.

³ Mumu ngunahase kulemba yami mwene ngushingiwe kuli Kristu mumu hali mandumbu jami, usoko wami nikulita ni musunya;

⁴ o A-Izalele; waze aapwishile ana, ni uhenya, ni usendo, ni kuhana cha shimbi nicho; ni uvumbiko wa Zambi, ni yilakenyo;

⁵ ni e tulamba, a kuli ayo, ni kuli ayo nikulita ni musunya Kristu wasemukine, Mwenawo kapwa helu lia eswe, Zambi kafumana ndo ku miaka ya mutolo.

⁶ Alioze kuchapwile ngwe hanji liji lia Zambi Hahona. Mumu hi eswe ko apwa A-Izalele, waze a kuli Izalele:

⁷ chipwe, mumu anapu munyachi wa Apalahama, eswe anapu ana, ka; alioze ngwo, Muli Izake makatambika munyachi we.

⁸ Te hi ana a musunya ko anapu ana a Zambi; alioze ana a chilakenyo kanaalula ngwo, Munyachi.

⁹ Mumu lino lie liji lia chilakenyo ngwo, Nikulita ni mwakono mungukeza, Sera kumakasema mwana-lunga.

¹⁰ Hi chize ko wika; alioze Rebeka nawa se wasesekele ufumba kuli umwe, iye kulwetu Izake.

¹¹ Mumu ana te kanda asemuka, chipwe kanda alinga nichimwe chipema hanji chipi, hanga upale wa Zambi nikulita ni kutongola chenyi ukakole, hi wa ku yitanga ko, alioze wa kuli yoze wakutambika.

¹² Achambile kuli iye ngwo, Mukulwana kumakalingila kanuke.

¹³ Ngwe chinasonewa ngwo, Hingunazange Yakomba, alioze hingunavwila kole Esau.

¹⁴ Mba kuchi mutwamba? Ngwetu, Zambi kali ni uhenge, nyi? Ka, pundu!

¹⁵ Mumu kanambe kuli Mose ngwenyi, Mungumuvwila keke yoze mungumuvwila keke; mungumuvwila vumbi yoze mungumuvwila vumbi.

¹⁶ Chocho kuchapwile kuli waze mapala; chipwe cha kuli yoze mazomboka, ka; alioze cha kuli Zambi, yoze wakwivwa keke.

¹⁷ Mumu chisoneko chinambe kuli Fwalau ngwo, Ha chikuma chino chene nakumikine, hanga ngukalweze muli yena tachi jami, hanga jina liami likafumane kweswe hano hashi.

¹⁸ Chocho mevwa keke hali yoze mamupala, ni yoze mamupala mamukalisa.

¹⁹ Muwamba kuli yami ngwe, Nyi chocho kuchi te achili nikutwaha mulonga? Mumu iya malimika ni upale wenyi?

²⁰ Ka, alioze yena mutu, yena iya, wakukumbulula kulimika ni Zambi? Chuma cha kutengewa muchamba kuli yoze wachitengele ngwenyi, Kuchi te wangutangile chocho?

²¹ Hanji tengi keshi chiyulo ha uma, ku mwaha umuwika kutanga chikwachilo chimwe ku ulemu ni chikwo ku ulelu?

²² Kachi Zambi, kanazange kulweza utenu wenyi, nikusolola tachi jenyi, wanyongonwene ni uhomboloji wunji ni yikwachilo ya utenu alitesele ha kwonwona:

²³ hanga akasolole kulumbama cha uhenya wenyi ha yikwachilo ya keke, yize iye walulikile Shimbu-kanda ha uhenya.

²⁴ Te yetu nawa, atutambikile, hi kuli A-Yunda wika ko alioze kuli akwa mavungu nawa, mba kuchi?

²⁵ Ngwe kanambe nawa mu mukanda wa Hozea ngwenyi, Kumungukaavuluka ngwami, A tu jami, waze kapwile atu jami; ngwami, Kanamuzange chikolo, yoze te kamuzangile.

²⁶ Mba kumuchikapwa muma muze achambile kuli ayo ngwo, Yenu hi nuli atu jami ko, muze mwene kumakaavuluka ngwo, Nuli ana a Zambi ya mwono.

²⁷ Alioze Izaia kanatete ha kutwala kuli akwa Izalele ngwenyi, Kachi ha kwalula ana a Izalele mapwa chizechene ngwe masekeseke a ku kalunga-lwiji, masalila wika makaalamwina:

²⁸ mumu Mwene kumakalinga liji lienyi hano hashi, makalimanununa, makalipatula pundu.

²⁹ Ngwe ambile Izaia kushi ngwenyi, Twapwile ngwe Sondome, atupwishile ngwe Ngomora, shina Mwene wa yizavu ya tujita watuhichikilile ana.

³⁰ Mba twambe kuchi? Ngwetu, akwa mavungu waze kakawile ululi, hanazuku ululi, te ululi uze wa ku Ufulielo:

³¹ alioze akwa Izalele, waze akawile shimbi ya ululi, kahetele ku shimbi yize.

³² Kuchi te? Mumu kayikawile ku Ufulielo, alioze ngwe ku yitanga. Ahukanyine ku liwe lia kuhukanyisa.

³³ Ngwe chinasonewa ngwo, Talenu mungusa mu Zaione liwe lia kuhukanyisa, ni luliwe lwa kutalingisa; ni yoze mafuliela kuli iye kechi kevwa sonyi.