A-ROMA 8 - MUKANDA USANDU WA ZAMBI 1975

¹ Kashika uhiso wakuhi niumwe haliapwila kuli waze ali muli Kristu Yesu.

² Mumu shimbi ya Spiritu ya mwono muli Kristu Yesu hiyinangutusula ku shimbi ya shili ni kufwa.

³ Mumu chize shimbi kuyahashile kulinga se yalelele ku musunya, Zambi nikutuma Mwanenyi mwene mukulifwa cha musunya wa shili, mumu ha shili, wahishile shili mu musunya.

⁴ Hanga ululi wa shimbi ukamanunuke muli yetu, kutushi kwenda nikulita ni musunya, alioze twakwenda nikulita ni Spiritu.

⁵ Mumu waze akulita ni musunya kakunyonga yuma ya musunya; ni waze akulita ni Spiritu kakunyonga yuma ya Spiritu.

⁶ Mumu kunyonga cha musunya, kufwa; alioze kunyonga cha Spiritu, mwono ni uhwimino.

⁷ Mumu kunyonga cha musunya, kole kuli Zambi; kuchishi kuzeyela ku shimbi ya Zambi, mumu chipwe chamwenemwene kuchishi kuhasa kuzeyela;

⁸ ni waze ali mu musunya keshi kuhasa kupemena kuli Zambi.

⁹ Alioze yenu hi nuli mu musunya ko, alioze muli Spiritu, kachi chamwenemwene Spiritu ya Zambi watwama muli yenu. Alioze kachi umwe keshi ni Spiritu ya Kristu, auze hi niwenyi ko.

¹⁰ Kachi Kristu ali muli yenu, mujimba kuunafu mumu ha shili; alioze Spiritu iye mwono mumu ha ululi.

¹¹ Alioze kachi Spiritu ya yoze wahindwishile Yesu hakachi ka afu watwama muli yenu, kachi yoze wahindwishile Kristu Yesu hakachi ka afu, makapwisa ni mwono nawa mijimba yenu ya kufwa mumu hali Spiritu yenyi yoze watwama muli yenu.

¹² Chocho, mandumbu, kongo tuli nalio, hi ku musunya ko, hanga tukende nikulita ni musunya:

¹³ mumu kachi munukenda nikulita ni musunya, kachi munukafwa; alioze kachi ku Spiritu munushiha tachi ja yilinga ya mujimba, kachi munukapwa ni mwono.

¹⁴ Mumu eswe akuzeya kuli Spiritu ya Zambi, e ana a Zambi wano.

¹⁵ Mumu yenu kunwatambwile Spiritu ya undungo cheka nawa mukwivwa woma; alioze nwatambwile Spiritu ya kunupwisa ana, yoze twakuteta nenyi ngwetu, Ta-ta, Tata.

¹⁶ Spiritu iye mwene kakushindakenya hamwe ni Spiritu yetu, ngwenyi, Nuli ana a Zambi.

¹⁷ Nyi kachi tuli ana, kachi tuli maswana ja Zambi ni maswana-ni-akwo a Kristu; kachi chamwenemwene mutwivwa lamba hamwe nenyi, hanga tukapwe ni uhenya hamwe nenyi.

¹⁸ Mumu nakunyonga ngwami, Lamba lia mwakono kuliatelele kulieseka ni uhenya uze makausolola muli yetu.

¹⁹ Mumu kutalatala cha yeswe ya hashi kuchakulawoka usolwelo wa ana a Zambi.

²⁰ Mumu azeyesele hashi ku yikatalo yamokomoko, hi ni upale waho hene ko, alioze mumu hali yoze wazeyeseleho ha kutalatala,

²¹ hanga hashi hene nawa hakatusuke ku undungo wa kupola ndo ku kutusuka cha uhenya wa ana a Zambi.

²² Mumu tunanyingika yuma yeswe ya kutanga kuyakutwa mikuma ni yikola hamuwika ndo haliapwila.

²³ Ni hi chize wika ko, alioze chipwe yetwene nawa, yetu tuli ni mihuko yitangu ya Spiritu, chipwe yetwene twakutwa mikuma muli yetwene, nikulawoka atupwise ana, we ukule wa mijimba yetu.

²⁴ Mumu ni kutalatala atulamwinyine; alioze kutalatala chize chakumoneka hi kutalatala ko: mumu iya matalatala chize anamono?

²⁵ Alioze kachi twakutalatala chize kutushi kumona, kachi ni uhumikizo twakuchilawoka.

²⁶ Chizechene Spiritu nawa kakukwasa ulelu wetu: mumu kutwanyingikine kulemba ngwe chinalite; alioze Spiritu iye mwene kakutuhakwila ni mikuma yize keshi kuhasa kuyihanjika;

²⁷ alioze yoze wakuhengula mu mbunge, kakunyingika chize chapwa kunyonga cha Spiritu, mumu kakuhakwila asandu nikulita ni upale wa Zambi.

²⁸ Alioze tunanyingika, kuli waze akuzanga Zambi, yuma yeswe kuyakulinga hamuwika ha yipema, te kuli waze hanaatambika nikulita ni upale wenyi.

²⁹ Mumu waze waanyingikine Shimbu-kanda, waafunjikile Shimbu-kanda nawa, hanga akaatese ni kulifwa cha Mwanenyi, hanga iye akapwe mutangu hakachi ka ana akwo anji:

³⁰ mba waze waafunjikile Shimbu-kanda, o nawa waatambikile; ni waze iye waatambikile, o nawa waasambishile; ni waze iye waasambishile, o nawa waahele uhenya.

³¹ Kuchi mutwamba ku yino yuma? Ngwetu, Kachi Zambi mapwa hamwe ni yetu, iya malimika ni yetu?

³² Yoze kaywilile keke Mwanenyi mwene, alioze wamukunjikile hali yetu eswe, ngwe kuchi kechi katwaha hamwe nenyi yuma yeswe chawana?

³³ Iya masuma mulonga waze hanaatongola Zambi? Ngwetu, Zambi yoze wakusambisa, nyi?

³⁴ Iya yoze mahisa? Ngwetu, Kristu Yesu yoze wafwile hanji yoze amuhindwishile hakachi ka afu, nyi? Yoze uli ku kwoko lia chindume lia Zambi, yoze nawa wakutuhakwila, nyi?

³⁵ Iya matuhandununa ku zango lia Kristu? Ngwetu, Luyinda, hanji kupinda, hanji yihungumiona, hanji kapunga, hanji uvu, hanji Utoji, hanji katana, nyi?

³⁶ Ngwe chinasonewa ngwo, Mumu hali yena kakutushiha tangwa lieswe nganganga; atushinginyekene kupwa ngwe mapanga waze maashiha.

³⁷ Ngwetu, Ka, ha yino yuma yeswe twakuhiana kukumba ku tachi ja yoze waazangile.

³⁸ Mumu ngunakunuka ngwami, Chipwe kufwa, chipwe mwono, chipwe angelo, chipwe yiyulo, chipwe yuma ya haliapwila, chipwe yuma yize muyizaho, chipwe tachi,

³⁹ chipwe usuku kwilu, chipwe usuku kushi, chipwe chuma chikwo chize atangile, nichimwe muchihasa kutuhandununa ku zango lia Zambi lize lili muli Kristu Yesu Mwene wetu.