A-ROMA 7 - MUKANDA USANDU WA ZAMBI 1975

¹ Shina nunalajala, mandumbu, nyi? (Mumu ngunahanjika kuli waze ananyingika shimbi), ngwami, shimbi chiyulo yikwete hali mutu shimbu lieswe mapwa ni mwono.

² Mumu pwo makakashiwa ni shimbi kuli mukwo-lunga shimbu lieswe mapwa ni mwono; alioze kachi mukwolunga mafwa, kachi matusuka ku shimbi ya mukwo-lunga.

³ Chocho nyi maya kuli lunga weka shimbu mukwo-lunga mapwa ni mwono, kachi mamuvuluka ngwo, Chitanji: alioze kachi mukwo-lunga mafwa, mba matusuka ku shimbi, chocho kechi kumuvuluka ngwo, Chitanji, chipwe maya kuli lunga weka.

⁴ Kashika, mandumbu jami, ni yenu nawa hananupwisa afu ku shimbi mumu ha mujimba wa Kristu; hanga nukapwe kuli weka, te kuli yoze amuhindwishile hakachi ka afu, hanga tukeme mihuko kuli Zambi.

⁵ Mumu muze twapwile mu musunya, usolo uze ye shimbi yaukasumwine walingile mu yihanda yetu, hanga yikeme mihuko ya kufwa.

⁶ Alioze haliapwila tunatusuka ku shimbi, se twafwile ku chize twakwachikilemo; chocho twakuvumbika mu yuma yaha ya Spiritu, hi mu yuma yikulo ko ya lusona.

⁷ Mba kuchi mutwamba? Ngwetu, Shimbi yinapu shili, nyi? Ka, pundu. Alioze Chanyingikine shili shina ku shimbi; mumu Chanyingikine kuzo shina shimbi yambile ngwo, Kanda wivwa kuzo:

⁸ alioze shili, nikuwana unjililo ku shimbi, yalingile muli yami kuzo yeswe: mumu shili kuyishi shimbi kuyinafu.

⁹ Alioze napwile ni mwono chishi shimbi ha miaka ya kunyima; alioze muze shimbi yejile, shili yahuzulukile ni yami nafwile;

¹⁰ shimbi yapwile ya kuneha mwono, nawanyine ngwe yaneha kufwa:

¹¹ mumu shili, se yinawane unjililo ku shimbi, yangwongele, yangushihile nayo.

¹² Chocho shimbi chamwenemwene yisandu, ni chiyulo chisandu, ni cha ululi ni chipema.

¹³ Mba ye yipema yalumukine kufwa kuli yami, nyi? Ka, pundu. Alioze shili, hanga yikasoloke shili pundu, yalingile kufwa muli yami, ku yipema; hanga shili yikapwe yipi yahiana mumu ha shimbi.

¹⁴ Mumu tunanyingika ngwetu, shimbi ya uspiritu: alioze yami nguli wa musunya, angulanjishile kushi lia shili.

¹⁵ Mumu chize nakulinga, chishi kuchitayiza: mumu chalingile chize ngunapale, alioze chize changupihila chenacho nakuchilinga.

¹⁶ Alioze kachi nakulinga chize chapalile, kachi nakutá ku shimbi ngwami, Yinapeme,

¹⁷ chocho hi yami ko nawa nakuchilinga, alioze shili yize yakutwama muli yami.

¹⁸ Mumu ngunanyingika muli yami, te mu musunya wami, chuma chipema kuchishimo: mumu kupala nakupala, alioze kulinga chize chipema Chahashile.

¹⁹ Mumu yipema yize nakupala, chishi kuyilinga: alioze yipi yize chishi kupala, yenayo nakulinga.

²⁰ Alioze kachi nakulinga chize chishi kupala, hi yami ko nawa nakulinga, alioze shili yize yakutwama muli yami.

²¹ Ngunawane kashika shimbi kuli yami, muze nakupala kulinga kanawa, yipi yili muli yami.

²² Mumu nakuwaha mu shimbi ya Zambi nikulita ni mutu wa muchima:

²³ alioze nakumona shimbi yeka mu yihanda yami, yakwasa jita ni shimbi ya kunyonga chami, yakunguneha ku ufunge ku shimbi ya shili yize yili mu yihanda yami.

²⁴ Yami nguli mutu wa kulungajala Chichize! Iya mangupulula ku mujimba uno wa kufwa?

²⁵ Ngunasakwilila Zambi kuli Yesu Kristu Mwene wetu. Chocho, yami mwene ni kunyonga chami nakulingila shimbi ya Zambi; alioze ni musunya nakulingila shimbi ya shili.