A-ROMA 6 - MUKANDA USANDU WA ZAMBI 1975

¹ Mba twambe kuchi? Ngwetu, tunyongonone mu shili nyi, hanga vumbi likalumbame?

² Ka, pundu: yetu hitunafu ku shili, ngwe kuchi mututwamamo nawa?

³ Shina nunalajala, nyi? Ngwe yetu eswe hanatupapachisa muli Kristu Yesu, hanatupapachisa mu kufwa chenyi?

⁴ Hanatufundu kashika hamwe nenyi ku upapachiso mu kufwa; hanga chizechene ngwe hanahindwisa Kristu hakachi ka afu akachichimieke mwe Tata, chocho yetu nawa tukende mu mwono waha.

⁵ Mumu kachi hitunalifutula nenyi mu kulifwa cha kufwa chenyi, kachi chocho nawa kumutukapwa mu kulifwa cha Uhindukilo wenyi;

⁶ se tunanyingika ngwetu, Hanahachila mutu wetu mukulu ha kulusu hamwe nenyi, hanga mujimba wa shili ukahwe, hanga kutuchi kapwa nawa mu undungo wa shili;

⁷ mumu yoze hanafu kanasambe ku shili.

⁸ Alioze kachi hitunafu hamwe ni Kristu, kachi tunafuliela ngwetu, Kumutukapwa ni mwono nawa hamwe nenyi;

⁹ mumu tunanyingika se hanahindwisa Kristu hakachi ka afu, keshi kufwa nawa; kufwa kuchishi chiyulo hali iye nawa.

¹⁰ Mumu kufwa chize afwile, wafwile ku shili kamuwika kunahu: alioze mwono uze watwama nawo, katwama nawo kuli Zambi.

¹¹ Chizechene ni yenu nawa linyongenu ngwe nuli afu chamwenemwene ku shili, alioze ngwe nuli a mwono kuli Zambi muli Kristu Yesu.

¹² Kanda nutayiza shili kuyula mu mijimba yenu ya kufwa, nukononoke ku usolo wayo:

¹³ chipwe kanda nukatumbikila yihanda yenu yitwa ya uhenge ku shili; alioze litumbikilenu kuli Zambi chizechene ngwe a mwono hanaahindwisa hakachi ka afu, ni yihanda yenu yitwa ya ululi kuli Zambi.

¹⁴ Mumu shili kuyichi kapwa ni chiyulo hali yenu: mumu kunwalingile kushi lia shimbi, alioze kushi lia vumbi.

¹⁵ Mba kuchi? Tuvulumune, mumu kutushi kushi lia shimbi, alioze kushi lia vumbi nyi? Ka, pundu.

¹⁶ Kunwanyingikine, nyi? Yoze kuli iye munulitumbikila ndungo mukumwononokena, nuli ndungo ja yoze munumwononokena; chipwe ja shili ya kutwala ku kufwa, hanji ja kwononoka cha kutwala ku ululi?

¹⁷ Alioze tusakwilenu kuli Zambi, chipwe nwapwile te ndungo ja shili, nwononokene mu mbunge ku cheseko cha longeso lize anukunjikileko;

¹⁸ se hinunatusuka ku shili, hinunapu ndungo ja ululi.

¹⁹ Ngunahanjika ngwe mutu, mumu ha ulelu wa musunya wenu: mumu chizechene ngwe nwatumbikilile yihanda yenu ngwe ndungo ja luchisa ni ku ungulungulu ha ungulungulu; chizechene haliapwila tumbikilenu yihanda yenu ngwe ndungo ja ululi ndo ku usandu.

²⁰ Mumu muze nwapwile ndungo ia shili, nwatusukile ha kutwala ku ululi.

²¹ Mba mihuko yika nwapwile nayo ha mwaka uze ku yuma yize haliapwila nunayivwila sonyi? Mumu songo lia yuma yize kufwa.

²² Alioze haliapwila se hinunatusuka ku shili, hinunapu ndungo ja Zambi, mihuko nuli nayo ndo ku usandu, ni songo liawo, mwono wa mutolo.

²³ Mumu fweto ya shili kufwa; alioze chawana cha vumbi lia Zambi, mwono wa mutolo muli Kristu Yesu Mwene wetu.