A-ROMA 5 - MUKANDA USANDU WA ZAMBI 1975

¹ Kashika, se ku Ufulielo hanatusambisa, sambukila tuli nayo ni Zambi kuli Mwene wetu Yesu Kristu;

² kuli iye nawa unjililo tuli nawo ku vumbi lino muze twakumana mumu ha Ufulielo; twakulisamba ha kutalatala uhenya wa Zambi.

³ Hi chize wika ko, alioze twakulisamba mu luyinda wetu nawa, se tunanyingika luyinda kakulinga kunyongonona;

⁴ ni kunyongonona kuchakulinga kukola; ni kukola kuchakulinga kutalatala;

⁵ ni kutalatala kuchishi kukolesa sonyi; mumu zango lia Zambi hanalizukwila mu mbunge jetu ku tachi ja Spiritu Musandu yoze atuhele.

⁶ Mumu shimbu te kutushi tachi, ha mwaka wa kulita Kristu wafwilile yitanganyanyi.

⁷ Mumu chikalu umwe mafwila mukwa ululi: hindu hanji umwe mahamuka kufwila mutu mupema.

⁸ Alioze Zambi kanasolola chinyingi cha zango lienyi kuli yetu, mumu shimbu te tuchili yivulumunyi, Kristu watufwilile.

⁹ Shinaho chikolo kashika, se hanatusambisa haliapwila ni manyinga jenyi, kuli iye makatulamwina ku utenu.

¹⁰ Mumu kachi shimbu twapwile akwa kole, twawanyine ni Zambi ku kufwa cha Mwanenyi, Shinaho chikolo se hitunawane, makatulamwina ni mwono wenyi;

¹¹ hi chize wika ko, alioze twakulisamba muli Zambi kuli Mwene wetu Yesu Kristu, kuli iye haliapwila hitunatambula uwanyino.

¹² Kashika, chizechene ngwe kuli mutu umuwika shili yanjilile hano hashi, ni ku shili kufwa chanjilile; chocho kufwa chahetele kuli atu eswe, mumu te eswe avulumwine:

¹³ mumu ndo ku shimbi shili yapwile hano hashi; alioze keshi kwalula shili kuze shimbi yakuhi.

¹⁴ Hindu kufwa chayulile, chize kuli Alama ndo kuli Mose, chipwe hali waze kavulumwineko nikulita ni kulifwa cha Utanguko wa Alama, mwenawo Chizulie cha yoze meza.

¹⁵ Alioze chawana cha vumbi kuchapwile ngwe we mulonga. Mumu kachi ku mulonga wa umuwika anji afwile, Shinaho chikolo, vumbi lia Zambi, ni chawana ku vumbi, lia mutu umuwika, Yesu Kristu, lialumbamine kuli anji.

¹⁶ Chikwo nawa, che chawana kuchapwile ngwe chize chejile ku kuvulumuna cha mutu umuwika. Mumu upatwilo wejile kuli umuwika nikuneha uhiso, alioze chawana cha vumbi chejile ku milonga yinji nikuneha usambiso.

¹⁷ Mumu kachi ku mulonga wa mutu umuwika, kufwa chayulile mumu hali umuwika; Shinaho chikolo waze akutambula kulumbama cha vumbi ni chawana cha ululi mayula mu mwono mumu hali umuwika, te Yesu Kristu.

¹⁸ Chocho chizechene ngwe ku mulonga umuwika, upatwilo wejile hali atu eswe nikuneha uhiso: chocho nawa ku chilinga chimuwika cha ululi, chawana chejile kuli atu eswe nikuneha usambiso wa mwono.

¹⁹ Mumu chizechene ngwe ku uhulia wa mutu umuwika anji aapwishile yivulumunyi, chocho nawa ku kwononoka cha mutu umuwika anji kumaapwisa akwa ululi.

²⁰ Achi, shimbi yanjilile hanga mulonga ukalumbame, alioze kuze shili yalumbamine, vumbi lialumbamine kuhiana chikolo.

²¹ Hanga chizechene ngwe shili yayulile mu kufwa, chocho nawa vumbi likayule ku ululi ndo ku mwono wa mutolo mumu hali Yesu Kristu Mwene wetu.