A-ROMA 4 - MUKANDA USANDU WA ZAMBI 1975

¹ Mba kuchi mutwamba? Apalahama kulwetu nikulita ni musunya hanawane chika?

² Mumu kachi asambishile Apalahama ku yitanga, kachi kali ni chimwe cha kulisamba nacho; alioze hi kumeso ja Zambi ko;

³ mumu chisoneko chinambe chika? Ngwo, Apalahama wafulielele Zambi, mba achalwile kuli iye ha ululi.

⁴ Achi kuli mukwa milimo, keshi kwalula fweto yenyi ngwe ya vumbi, alioze ya kongo.

⁵ Alioze kuli yoze keshi kulinga, hindu mafuliela mukwa kusambisa yitanganyanyi, malula Ufulielo wenyi ha ululi.

⁶ Chizechene ngwe David nawa kanavuluka kuwaha cha mutu yoze Zambi mamwalwila ululi keshi yitanga,

⁷ ngwenyi, Kawaha waze ungulungulu wo hanaukonekenawo, waze milonga yo yinafukiwa.

⁸ Kawaha mutu yoze Mwene kechi kumwalwila shili yenyi.

⁹ Kuwaha chino chili hali ngalami, nyi? Shina hali yilima nawa? Mumu tunambe ngwetu, Alwile kuli Apalahama Ufulielo wenyi ngwe ululi.

¹⁰ Ngwe kuchi awalwile? Muze apwile ngalami, nyi? Shina chilima? Hi mu ungalami ko, alioze mu ulima;

¹¹ iye watambwile chinyingi cha ungalami, Chijikilo cha ululi wa Ufulielo, uze wapwile nawo shimbu te achili chilima: hanga akapwe tato ya waze eswe akufuliela, chipwe yilima; hanga akalule ululi kuli ayo nawa:

¹² hanga akapwe tato ya ngalami, waze kapwile ngalami tuhu, alioze kuli waze akwenda mu ngano ja Ufulielo wa kulwetu Apalahama, uze wapwile nawo shimbu te achili chilima.

¹³ Mumu hi ku shimbi ko, chilakenyo chapwile kuli Apalahama, hanji ku munyachi wenyi, akapwe swana ya hashi, alioze ku ululi wa Ufulielo.

¹⁴ Mumu kachi waze a ku shimbi anapu maswana, Ufulielo unapu wamokomoko, ni chilakenyo chinapu nichimwe:

¹⁵ mumu shimbi kuyakulinga utenu; alioze kuze kukushi shimbi, kuze Utanguko nawa kuushiko.

¹⁶ Ha chikuma chino kuchapwa ku Ufulielo, hanga chikalite ni vumbi; hanga chilakenyo chikakole ku munyachi weswe; hi ku munyachi wa shimbi ko, alioze ku uze nawa wa ku Ufulielo wa Apalahama; iye tato ya yetu eswe,

¹⁷ (ngwe chinasonewa ngwo, Hingunakupwisa tato ya mavungu anji) kumeso ja Zambi yoze wamufulielele, yoze wakupwisa afu ni mwono, kakuvuluka yuma yize yakuhi, chizechene ngwe kuyili.

¹⁸ Apalahama, mu kutalatala, wafulielele ku chize kechi kuhasa kuchitalatala, hanga akapwe tato ya mavungu anji, nikulita ni chize ambile ngwo, Chocho munyachi we kumuukapwa.

¹⁹ Iye kakokolokele ha Ufulielo, ha kunyonga mujimba wenyi mwene hiunafu kulu, (se kali ni ngwe kulakaji lia miaka), ni kufwa cha jimo lia Sera;

²⁰ hindu, se watalile ku chilakenyo cha Zambi, kayambashanyine akahone Ufulielo, alioze walikolezele ku Ufulielo nikuchichimieka Zambi.

²¹ Se kanajikiza ngwenyi, Cheswe Zambi hanalakenya kumahasa kuchilinga.

²² Kashika nawa alwile Ufulielo wenyi kuli iye ngwe ululi.

²³ Achi, kuchasonewene mumu hali iye wika, ngwo, Awalwile kuli iye;

²⁴ alioze mumu hali yetu nawa, kumawalula kuli yetu twakufuliela kuli yoze wahindwishile Yesu Mwene wetu hakachi ka afu;

²⁵ yoze amukunjikile mumu ha milonga yetu; amuhindwishile mumu ha usambiso wetu.