A-ROMA 3 - MUKANDA USANDU WA ZAMBI 1975

¹ Mba kuhiana chika kevwe A-Yunda ali nacho? Hanji kufumbuka chika cha ungalami?

² Chinji ha yuma yeswe: hatangu, mumu chamwenemwene aakunjikile maliji a Zambi.

³ Mumu kachi amwe kapwile ni Ufulielo, mba kuchi? Kuhona cho cha Ufulielo muchipwisa chamokomoko umwenemwene wa Zambi, nyi?

⁴ Ka, pundu; alioze Zambi apwe wamwenemwene, ni atu eswe akapwe akwa mahuza, ngwe chinasonewa ngwo, Hanga ukasambe ni maliji je, ni hanga ukakumbe muze makupatwila.

⁵ Alioze kachi uhenge wetu muusolola ululi wa Zambi, kuchi mutwamba? Zambi yoze wakufwetesa ni utenu kanapu chihenge, nyi? (Ngunahanjika nikulita ni atu),

⁶ ka, pundu; mumu kachi chocho, ngwe kuchi Zambi makapatwila akwa hashi?

⁷ Mumu kachi umwenemwene wa Zambi ku mahuza jami walumbamine ku uhenya wenyi, ika te achili nikungupatwila ngwe chivulumunyi?

⁸ Kuchi te kutushi kwamba (ngwe kanatusanyina, nikulita ngwe amwe kakushindakenya yetu twakwamba) ngwo, Tulingenu yipi hanga yipema yikeze? Upatwilo wo kuunalite ni ululi.

⁹ Mba kuchi? Tunaahiana, nyi? Ka, pundu; mumu hitunasumu kulu, ni A-Yunda ni A-Ngresia, ngwetu, O eswe kushi lia shili ali:

¹⁰ ngwe chinasonewa ngwo, Mukwa ululi wakuhi niumwe, chipwe umuwika, ka;

¹¹ yoze wakunyingika wakuhi niumwe; yoze wakufupafupa Zambi wakuhi niumwe.

¹² Eswe hanahambuluka mu jila, hanapu hamuwika yisáshili; yoze wakulinga yipema wakuhi niumwe, chipwe umuwika, ka.

¹³ Miliwu yo yinapu fuka liawashi; ni malimi jo hanalingi ni kalimbalimba: utende wa yilengamuli kushi lia mivumbo yo uli.

¹⁴ Makanwa jo kanazala ni kukukula ni usasu:

¹⁵ molu jo akutambuka kumwanga manyinga;

¹⁶ kwenyeka ni kulungajala mu majila jo yili;

¹⁷ jila ya uhwimino kayinyingikine:

¹⁸ woma wa Zambi wakuhi kumeso jo, niumwe.

¹⁹ Achi, tunanyingika yeswayo shimbi muyamba, muyihanjika kuli waze atwama kushi lia shimbi; hanga makanwa eswe akapakike, ni akwa hashi eswe akahie kuli Zambi:

²⁰ mumu ku yitanga ya shimbi kechi kasambisa mutu niumwe kumeso jenyi; mumu ku shimbi, chinyingi cha shili muchiza.

²¹ Alioze haliapwila hanasolola ululi wa Zambi, kuushi shimbi, kanaushindakenya ku shimbi ni aprofeta;

²² te ululi wa Zambi ku Ufulielo muli Yesu Kristu, kuli eswe, ni hali waze eswe akufuliela; mumu kulipwila chakuhi nichimwe.

²³ Mumu eswe hanavulumuna, kanahono uhenya wa Zambi.

²⁴ Se hanatusambisa chawana ku vumbi lienyi, ku ukule uze uli muli Kristu Yesu:

²⁵ yoze Zambi waselele kulutwe, akapwe kuka, ha kufuliela manyinga jenyi, ha kusolola chinyingi cha ululi wenyi ha kuzomboka milonga yize yapwile kushi, ha kulihumikiza cha Zambi.

²⁶ Ha kusolola chinyingi cha ululi wenyi ha mwaka uno haliapwila: hanga akasambe, akapwe mukwa kusambisa yoze uli ni Ufulielo muli Yesu.

²⁷ Mba kulisamba Chilihi? Hanachiajila haze. Ku shimbi yika? Ya yitanga, nyi? Ka, pundu: alioze ku shimbi ya Ufulielo.

²⁸ Kashika twakushinginyeka ngwetu, Masambisa mutu ku Ufulielo, keshi yitanga ya shimbi.

²⁹ Zambi, Zambi ya A-Yunda wika, nyi? Kapwile Zambi ya akwa mavungu nawa, nyi? Ewa, iye Zambi ya akwa mavungu nawa:

³⁰ se iye Zambi umuwika, yoze makasambisa ngalami ku Ufulielo, masambisa yilima ku Ufulielo.

³¹ Mba hinapwisa shimbi yamokomoko ku Ufulielo, nyi? Ka, pundu: Shinaho tunakolesa shimbi.