A-ROMA 2 - MUKANDA USANDU WA ZAMBI 1975

¹ Kashika yena kushi kaliongelo, yena mutu, mweswawo wapwa, wakupatwila mukwenu: mumu ni chize mupatwita mukwenu, mulihisa yena mwene; mumu yena wakupatula, kuwakulinga yuma yize yene.

² Mumu tunanyingika upatwilo wa Zambi kuunalite ni umwenemwene hali waze aku-linga yuma ngwe yino.

³ Unashinginyeka chino, yena mutu, wakupatwila waze akulinga yuma ngwe yino, ni yena mwene wakuyilinga, ngwe mukomboka ku upatwilo wa Zambi, nyi?

⁴ Shina unalelesa kulumbama cha utu wenyi ni uhumikizo ni uhomboloji; ngwe kwanyingikine utu wa Zambi kuunakukoko Ulikonyeke.

⁵ Alioze nikulita ni kukala cha mbunge yize kuyishi kulikonyeka, kuwakulitulikila utenu ha tangwa lia utenu muze masolola upatwilo wa ululi wa Zambi;

⁶ yoze makahana kuli eswe nikulita ni yitanga yo:

⁷ mahana mwono wa mutolo kuli waze akunyongonona nikulinga yipema nikufupa uhenya, ni ulemu, ni ungunu;

⁸ alioze kuli akwa pami, ni waze keshi kwononoka ku umwenemwene, alioze akwononoka ku uhenge, kumukukapwa utenu ni ufwatulo,

⁹ luyinda ni kupinda kumuchikapwa hali atu eswe waze akulinga yipi, hatangu hali A-Yunda ni hali A-Ngresia nawa;

¹⁰ alioze uhenya, ni ulemu, ni sambukila, kumuyikapwa kuli mutu ni mutu wakulinga yipema, hatangu kuli A-Yunda ni kuli A-Ngresia nawa.

¹¹ Mumu Zambi keshi katonde.

¹² Mumu waze eswe hanavulumuna keshi shimbi, kumakatoka keshi shimbi; ni waze hanavulumuna kushi lia shimbi, kumakaapatwila ku shimbi;

¹³ mumu hi akwa kwivwa ko shimbi masamba kumeso ja Zambi, alioze makasambisa akwa kulinga shimbi.

¹⁴ (Mumu muze mavungu aze keshi shimbi, malinga ni mbunge jo yuma ya shimbi, o se keshi shimbi, kanapu shimbi kuli ayo ene;

¹⁵ waze kakulwcza chitanga cha shimbi chakusonewa mu mbunge jo, mbunge jo nawa se jinashindakenya hamuwika, ni malinjekela jo kanaasumu hanji kanaasambisa hakachi ko);

¹⁶ ha tangwa lize muze Zambi makapatula yuma ya kuhengama ya atu, nikulita ni sango lipema lia yami, kuli Yesu Kristu.

¹⁷ Alioze kachi yena, kanakuvuluka ngwo, Ka-Yunda, wakulijikijila ha shimbi, wakulisamba muli Zambi,

¹⁸ wakunyingika upale wenyi, wakusela Shindakenyo yipema ha yuma yahiana, wakufumbiwa ku shimbi.

¹⁹ Unalikolela yena mwene uli kasongo ka tupuputa, pangu lia waze ali mu milima,

²⁰ chifumbe cha yizuzuke, longeshi ya anaakemba, ni cheseko cha chinyingi uli nacho, ni cha umwenemwene mu shimbi;

²¹ yena kashika, wakulongesa mukwo, kushi kulilongesa yena mwene, nyi? Yena wakwambujola ngwe, Mutu kanda akeya, yena wakwiya, nyi?

²² Yena wakwamba ngwe, Kanda ulinga utanji, yena wakulinga utanji, nyi? Yena wakuvwila kole mahamba, yena wakuhupa matembele, nyi?

²³ Yena wakulisamba mu shimbi, yena ha kutangula shimbi wakusaula Zambi, nyi?

²⁴ Mumu jina lia Zambi kakulishililika hakachi ka akwa mavungu, mumu hali yenu, ngwe chinasonewa.

²⁵ Mumu ungalami chamwenemwene muukafumbula, kachi yena wakulinga shimbi: alioze kachi muopwa chitanguke cha shimbi, ungalami we hiwapwa ulima.

²⁶ Kashika kachi chilima mafunga upatwilo wa shimbi, ulima wenyi kechi kawalula ha ululi, nyi?

²⁷ Mba yilima ku chisemewa kachi mamanununa shimbi kechi kakupatwila, nyi? Yena uli ni lusona ni ungalami, alioze unatangula shimbi, nyi?

²⁸ Mumu hi Ka-Yunda ko yoze wapwa Ka-Yunda ku yuma ya mujimba; chipwe hi ungalami ko uze wakusoloka mu musunya:

²⁹ alioze iye Ka-Yunda yoze wapwa chocho ku yuma ya muchima; ni ungalami wa mbunge, mu spiritu, hi mu lusona ko; uhaliso wenyi hi wa kuli atu ko, alioze wa kuli Zambi.