A-ROMA 16 - MUKANDA USANDU WA ZAMBI 1975

¹ Alioze ngunakunjika kuli yenu pangietu Fwepe, iye kavumbi ka chikungulwila chize chili mu Senekria:

² hanga nukamutambule muli Mwene, chizechene ngwe chinateta asandu, hanga nukamukwase ni chuma cheswacho mafupa kuli yenu: mumu iye mwene nawa hanapu mukwa kukwasa anji, ni yami nawa.

³ Menekenu Prisela ni Akwila, akwa milimo-ni-akwetu muli Kristu Yesu.

⁴ Waze ha mwono wami atumbikile kota jo ene; hi yami wika ko nakwasakwila, alioze yikungulwila yeswe ya akwa mavungu nawa;

⁵ menekenu chikungulwila chize chili mu zuwo lio; menekenu Epemetu mukwetu wa zango, yoze wapwa muhuko utangu wa ku Eshia kuli Kristu.

⁶ Menekenu Maria yoze wakilikichile chikolo hali yenu.

⁷ Menekenu Androniku ni Yuniya usoko wami, ni funge-ni-akwetu, waze ali ni lufuma hakachi ka apostolo, waze nawa apwile muli Kristu shimbu yami te kanda ngupwamo.

⁸ Menekenu Amafwiya, mukwetu wa zango muli Mwene.

⁹ Menekenu Urepanu, mukwa milimo-ni-mukwetu muli Kristu, ni Setachi, mukwetu wa zango.

¹⁰ Menekenu Apeleshi kanamushindakenya muli Kristu, menekenu akwa zuwo lia Arisetopulu.

¹¹ Menekenu Herotione usoko wami. Menekenu akwa zuwo lia Nasesu, waze ali muli Mwene.

¹² Menekenu Trifwema ni Trifwosa, waze akukilikita muli Mwene. Menekenu Perese, mukwetu wa zango, yoze wakilikichile chikolo muli Mwene.

¹³ Menekenu Rufu mulemu muli Mwene, ni naye yoze hapwa mama kuli yami.

¹⁴ Menekenu Asenekritu, ni Fwengote, ni Heremeshi, ni Patropa, ni Heremashi, ni mandumbu waze ali hamwe no.

¹⁵ Menekenu Fwilolongu ni Yuliya, ni Nereu, ni pangienyi, ni Olimpia, ni asandu waze ali hamwe no.

¹⁶ Limenekenu umwe ni mukwo ni mukwo ni mbeju yisandu. Yikungulwila yeswe ya Kristu yinanumeneka.

¹⁷ Haliapwila ngunaliumbu kuli yenu, mandumbu, nukase chinyingi waze akuuhandununa, ni waze akutalingisa, cha kulimika ni longeso lize nwalilongesele, nukaakondoloke.

¹⁸ Mumu waze keshi kulingila Mwene wetu Yesu Kristu, alioze kakulingila jimo lio ene; ni ku maliji a kulembejeka, ni kutangujola, kakwonga mbunge ja atu alelu.

¹⁹ Mumu kwononoka chenu hichinafumana kuli eswe. Nakuwahilila kashika hali yenu: alioze ngunazange nukapwe akwa mana ku yipema, a kusamba ku yipi.

²⁰ Alioze Zambi ya sambukila kumakafwenya Satana kushi lia yiliato yenu kamunomuno. Vumbi lia Mwene wetu Yesu Kristu likapwe hamwe ni yenu eswe. Amene.

²¹ Timoteu mukwa milimo-ni-mukwetu, ni Luseu, ni Yasone, ni Sosepatere, usoko wami, kananumeneka.

²² Yami Teresu, ngunasoneka mukanda uno, ngunanumeneka muli Mwene.

²³ Ngayu, mukwa kunguzumbula, mukwa kuzumbula chikungulwila cheswe kananumeneka. Erasetu, kaselo ka limbo, kananumeneka, ni ndumbu Kwartu.

²⁴ Vumbi lia Mwene wetu Yesu Kristu likapwe hamwe ni yenu eswe. Amene.

²⁵ Haliapwila kuli yoze wahasa kunutakamisa, nikulita ni sango lipema lia yami ni kwambujola cha Yesu Kristu, nikulita ni usolwelo wa chijimbikilo, chize aswekele chize ku miakulwila,

²⁶ alioze haliapwila hanachisolola, ni ku yisoneko ya aprofeta, nikulita ni chiyulo cha Zambi wa mutolo, hananyingikisa akwa mavungu eswe hanga akononoke ku Ufulielo:

²⁷ uhenya ukapwe kuli Zambi, mukwa mana umuwika, mu jina lia Yesu Kristu ndo ku miaka ya mutolo. Amene.