A-ROMA 15 - MUKANDA USANDU WA ZAMBI 1975

¹ Achi yetu tuli akwa tachi, chatutamba kumbata ulelu wa waze keshi tachi, hi kuliwahisa ko yetwene.

² Mutu ni mutu wa kuli yetu, awahise mwenyembo wenyi nikumulinga yipema mukumukolesa.

³ Mumu Kristu nawa kaliwahishile mwene; alioze ngwe chinasonewa ngwo, Luchoko wa waze akukuchoka haneza hali yami.

⁴ Mumu yuma yeswayo yasonewene kunyima, yasonewene mukutulongesa, hanga ku uhumikizo ni kulembejeka cha yisoneko tukapwe ni kutalatala.

⁵ Haliapwila Zambi ya uhumikizo, ya kulembejeka, akanwehe kupwa ni kunyonga chimuwika umwe kuli mukwo ni mukwo, nikulita ni Kristu Yesu:

⁶ hanga ni mbunge yimuwika ni kanwa limuwika, nukachichimieke Zambi kanda Tato ya Mwene wetu Yesu Kristu.

⁷ Kashika litambulenu umwe ni mukwo ni mukwo chizechene ngwe Kristu nawa hananutambula, ha uhenya wa Zambi.

⁸ Mumu ngunambe ngwami, Kristu wapwile kavumbi ka ungalami mukusolola umwenemwene wa Zambi, hanga akakolese yilakenyo kuli tulamba,

⁹ hanga akwa mavungu akachichimieke Zambi ha keke yenyi; ngwe chinasonewa ngwo, Kashika mungukakuhalisa hakachi ka akwa mavungu, mungwimbila jina lie.

¹⁰ Cheka nawa kanambe ngwenyi, Ivwenu chiseke, yenu akwa mavungu, hamwe ni atu jenyi.

¹¹ Cheka nawa ngwo, Halisenu Mwene, yenu akwa mavungu, musangalisenu atu eswe.

¹² Cheka nawa, Izaia kanambe ngwenyi, Kumukukapwa chikota cha Yese, ni yoze makakatuka hanga akayule mavungu; hali iye mavungu kumakatalatala.

¹³ Zambi ya kutalatala akanuzalise ni uwahililo weswe ni sambukila yeswe ha kufuliela, hanga nukalumbame mu kutalatala ku tachi ja Spiritu Musandu.

¹⁴ Yami mwene nawa ngunakunuka ha kutwala kuli yenu, mandumbu jami, ngwe yenwene nunazala tò ni upeme weswe, mwa tò ni yinyingi yeswe, nunahase nawa kulikanyamisa umwe ni mukwo ni mukwo.

¹⁵ Alioze ngunasoneka kuli yenu, kanda ngwe ni kuhamuka, hanga ngunwiwulule cheka nawa, mumu ha vumbi lize anguhele Zambi.

¹⁶ Hanga ngukapwe kavumbi ka Kristu Yesu kuli akwa mavungu, nikulinga ngwe uvumbiko wa sasendote mu sango lipema lia Zambi, hanga akwa mavungu akapwe mulambu wa kupemena chikolo, kanausela ku usandu kuli Spiritu Musandu.

¹⁷ Chize chakulisamba nacho kashika nguli nacho muli Kristu Yesu ni yuma ya kutwala kuli Zambi.

¹⁸ Mumu chichi kahamuka kuhanjika ha yuma niyimwe shina yize alingile Kristu ku moko jami, mukwononwesa akwa mavungu ku maliji ni ku yitanga,

¹⁹ ni tachi ja yilayi ni yipekesa, ni tachi ja Spiritu Musandu; chocho chize ku Yerusaleme, nikujinga ndo ku Iliriku, hingunamanununa kwambujola sango lipema lia Kristu:

²⁰ chocho, nguneseka chikolo kwambujola sango lipema, kuze kanda achivuluka jina lia Kristu, hanga chichi katunga ha fundamentu ya mbala.

²¹ Alioze ngwe chinasonewa ngwo, Waze kuli ayo kaambulwile nichimwe cha kutwala kuli iye kumakamona, ni waze kevwileko kumakanyingika.

²² Kashika nawa kanji nakwikiwile kwiza kuli yenu:

²³ alioze haliapwila se chishi muhela nawa mu yifuchi yino, mba, se ngunevu usona ha miaka yino yinji kwiza kuli yenu,

²⁴ heswaho munguyila mu wenyi wami ku Hesepanya (mumu ngunatatatata kunumona ha hupalika mu wenyi wami, hanga nukangushinjikile mu jita yami, kachi hatangu nguliwahise hakehe hamwe ni yenu).

²⁵ Alioze haliapwila munguya ku Yerusaleme, ngukavumbike asandu.

²⁶ Mumu hichinawahila akwa Masendoniya ni akwa Akeya kuhana jimwe mbongo hali yiswale a kuli asandu, waze ali mu Yerusaleme.

²⁷ Ewa, hichinaawahila; o kanapu akwa makongo kuli ayo, mumu kachi akwa mavungu hanalianyina ni yuma yo ya uspiritu, chaatamba nawa kwalingila ni yuma yatwala ku mujimba.

²⁸ Muze kashika kunamanununa chino nikuhana kuli ayo mihuko yino, kumungukakatuka nikupalikila kuli yenu kuya ku Hesepanya.

²⁹ Alioze ngunanyingika muze mungwiza kuli yenu, kumungukeza ni kuzala tò cha uwape wa Kristu.

³⁰ Ngunaliumbu kuli yenu, mandumbu, mu jina lia Mwene wetu Yesu Kristu, ni ku zango lia Spiritu, nukalitachike hamwe ni yami mu yilemba yenu kuli Zambi,

³¹ hanga ngukapuluke kuli waze keshi kwononoka mu Yundeya, ni uvumbiko wami uze nguli nawo hali akwa Yerusaleme, ukapwe wa kupemena chikolo kuli asandu.

³² Hanga ngukeze kuli yenu ni uwahililo, ku upale wa Zambi, ni hanga ngukahwime hamwe ni yenu.

³³ Zambi ya sambukila akapwe hamwe ni yenu eswe.