A-ROMA 14 - MUKANDA USANDU WA ZAMBI 1975

¹ Alioze yoze unalele ku Ufulielo nukamutambule, hindu hi ha kuhangujola ko yuma yize anayambashana.

² Umwe Ufulielo ali nawo wa kulia yuma yeswe; alioze mukwo mulelu, kakulia yilimalima.

³ Yoze wakuli a, kanda alelesa yoze keshi kulia; ni yoze keshi kulia kanda apatwila yoze wakulia, mumu Zambi hanamutambula.

⁴ Yena iya, wakupatwila ngamba ya mbala? Kuli Mwene wenyi mamana, hanji malimbuka. Iye mamumanyisa; mumu Mwene mahasa kumumanyisa.

⁵ Umwe malemesa tangwa limwe chinji, tangwa likwo chikepe: mukwo malemesa matangwa eswe chimuwika. Mweswe akalisele chinyingi liakulu mu mbunge yenyi mwene.

⁶ Yoze malemesa tangwa, malilemesa kuli mwe Mwene; ni yoze malia, malia kuli mwe Mwene, mumu masakwila kuli Zambi; ni yoze keshi kulia, kuli mwe Mwene keshi kulia, masakwila kuli Zambi.

⁷ Mumu niumwe wa kuli yetu mapwa ni mwono kuli iye mwene, mba niumwe mafwa kuli iye mwene.

⁸ Mumu chipwe kachi mutupwa ni mwono, kuli Mwene mutupwa ni mwono; chipwe kachi mutufwa, kuli Mwene mutufwa: kashika chipwe mutupwa ni mwono, chipwe mutufwa, tuli a mbala a Mwene.

⁹ Mumu ha chino Kristu yafwa, yahinduka, yatwama ni mwono cheka nawa, hanga akapwe Mwene wa eswe aali, ni wa afu ni wa a mwono.

¹⁰ Alioze yena, ika te wakupatwila ndumbwe? Hanji ika te wakulelesa ndumbwe? Mumu yetu eswe kumutukamana kulutwe lia chitwamo cha upatwilo wa Zambi.

¹¹ Mumu chinasonewa ngwo, Mwene kanambe ngwenyi, Ni mwono wami makungunwa eswe kumakaliumba kuli yami, malimi eswe kumakahalisa Zambi.

¹² Chocho kevwe mutu ni mutu wa kuli yetu kumakalumbununa ha kutwala kuli iye mwene kuli Zambi.

¹³ Kashika kanda tulipatwila nawa umwe ni mukwo ni mukwo: alioze tupatulenu chino Shinaho, ngwetu niumwe kanda asa chihukanyiso hanji chitalingiso mu jila ya ndumbwenyi.

¹⁴ Ngunanyingika; ngunakunuka muli Mwene Yesu ngwami, Chuma nichimwe chapwa cha luchisa chene: shina kuli yoze machishinginyeka kupwa cha luchisa, kuli yoze hichapwa cha luchisa.

¹⁵ Mumu kachi ha mukunda wa kulia ndumbwe mevwa kupiha, yena kwendele nawa mu zango. Kanda ulumbula ni kulia che yoze amufwilile Kristu.

¹⁶ Mba kanda ahanjika yipi ha yipema yenu:

¹⁷ mumu wanangana wa Zambi hi kulia ko, hi kunwa ko, alioze ululi, ni sambukila, ni uwahililo muli Spiritu Musandu.

¹⁸ Mumu yoze malingila Kristu ni yino yuma mapemena chikolo kuli Zambi, mamusela Shindakenyo yipema kuli atu.

¹⁹ Chocho tukaulenu yuma yize yatwala ku sambukila, ni yuma yize mutuhasa kulikolesa nayo umwe ni mukwo ni mukwo.

²⁰ Kanda nukonwona chitanga cha Zambi mumu ha kulia. Yuma yeswe chamwenemwene yipema; alioze muyipwa yipi kuli mutu yoze malia ni chihukanyiso.

²¹ Chinawaha kulitwamina kulia yifwo, chipwe kunwa vinyu, chipwe kulinga chuma chimwe chize mahukanyisa nacho ndumbwe, hanji matalinga, hanji malela.

²² Ufulielo uze uli nawo, pwako nawo kuli yena mwene kumeso ja Zambi. Kawaha yoze keshi kulipatwila ha chize matayiza.

²³ Alioze yoze mayambashana, mahia kachi malia, mumu keshi kulia cha ku Ufulielo; ni cheswacho kuchapwile cha Ufulielo, hi shili.