A-ROMA 13 - MUKANDA USANDU WA ZAMBI 1975

¹ Mutu mweswe akazeyele kuli waze ali ni poko ya kuyula: mumu mukwa kuyula wakuhi niumwe shina wa kuli Zambi; ni akwa kuyula aze aliko hanaaselacho kuli Zambi.

² Kashika yoze malimika ni mukwa kuyula, malimika ni chiyulo cha Zambi: ni waze malimika, makatambula upatwilo.

³ Mumu akwa kuyula keshi kwavwila woma ha kulinga yitanga yipema, alioze ha kulinga yipi. Mba unazange kupwa kushi woma kuli mukwa kuyula, nyi? Linga yipema, mba mukapwa ni uhaliso kuli iye.

⁴ Mumu iye kavumbi ka Zambi kuli yena ha yipema. Alioze kachi mulinga yipi, ivwa woma, mumu kambachile katana chamokomoko: mumu iye kavumbi ka Zambi, mukwa kukala mumu ha utenu kuli yoze wakulinga yipi.

⁵ Kashika Chanutamba kuzeya, hi mumu ha utenu wika ko, alioze nawa ha shimbi ya mbunge.

⁶ Mumu ha chino nwakuhana milambu nawa; mumu o akwa kulingila Zambi, kakuhondangana matangwa eswe ku chuma chino.

⁷ Hanenu kashika kuli eswe yize Chanutamba kuhana kuli ayo; milambu kuli akwa kutela milambu; lijimu kuli akwa lijimu; woma kuli waze chatamba kwavwila woma; ulemu kuli akwa kutela ulemu.

⁸ Kanda nukapwa ni kongo kuli niumwe, shina kulizanga umwe ni mukwo ni mukwo: mumu yoze mazanga mukwo, hanamanununa shimbi jeswe.

⁹ Mumu ngwo, Kanda ulinga utanji; kanda ushiha; kanda wiya; kanda ushindakenya mahuza; kanda wivwa kuzo; nyi kachi liji likwo lia shimbi liliko, linasu mu liji lino ngwo, Uzange mwenyembo we chizechene ngwe unalizange yena mwene.

¹⁰ Zango kulishi kulinga yipi kuli mwenyembo wenyi: kashika zango linapu che kumanununa cha shimbi.

¹¹ Chikwo nawa, nunanyingika mwaka, ngwe ola yaheta kulu nukalaule mu tulo: mumu haliapwila ulamwino wetu hakamwihi uli, kuze twafulielele wapwile kusuku.

¹² Ufuku hiwahwa chikolo, mwalwa kuunakundama: tumbilenu kashika yitanga ya milima, tulipakatenu yitwa yeswe ya pangu.

¹³ Twendenu ngwe chinalite, ngwe mu mwalwa; hi mu chimbangwinya ko, hi ni kuzengewa ko, hi ni ukoi ko, hi ni ujila ko, hi ni vunda ko, hi ni ukwa ko.

¹⁴ Alioze zalenu Mwene Yesu Kristu, kanda nusela nichimwe ha musunya mukumanununa usolo wawo.