A-ROMA 12 - MUKANDA USANDU WA ZAMBI 1975

¹ Kashika, ngunaliumbu kuli yenu mandumbu, ku keke ya Zambi, nutumbikile mijimba yenu chitapo cha mwono, chisandu, chakupemena chikolo kuli Zambi, uno we uvumbiko wenu wakulita ni kunyonga cha mana.

² Kanda nulitesa ni mwakono, alioze alumukenu ku kupwisa chaha cha kunyonga chenu, hanga nukase chinyingi chize wapwa upale upema ni ungunu wa Zambi ni uze wamupemena.

³ Mumu ku vumbi lize anguhele, ngunambe kuli mutu ni mutu hakachi kenu ngwami, Kanda alinyonga kuhiana chize chamutamba kunyonga; alioze akanyonge ni mana; ngwe Zambi hanapangila kuli mutu ni mutu njongo yenyi ya Ufulielo.

⁴ Mumu ngwe tuli ni yihanda yinji mu mujimba umuwika, ni yihanda yeswe kuyishi mulimo umuwika;

⁵ chocho yetu, tuli anji, tunapu mujimba umuwika muli Kristu, ni eswe, mutu ni mutu, chihanda chimwe cha mukwo ni mukwo.

⁶ Mba se tuli ni yawana ya vumbi yeka ni yeka nikulita ni vumbi lize hanatwehe, chipwe uprofetezo, tuprofetezenu nikulita ni njongo ya Ufulielo wetu;

⁷ hanji uvumbiko, tuvumbikenu; hanji yoze wakulongesa, akalongese;

⁸ hanji yoze wakushinjila maliji, akashinjile; yoze wakulianyina, akahane nikuvungumiona; ni yoze wakusongwela asongwele ni mbunge yeswe; yoze wakulweza keke, akalweze keke nikusehejela.

⁹ Zango likapwe kulishi ulembekese. Ivwenu lwaji ha ungulungulu; lalaminyenu ku yipema.

¹⁰ Ha kufwila cha mandumbu, lifwilenu ni utu umwe kuli mukwo ni mukwo; ha ulemu, eswe akaliange kuulweza kuli mukwo.

¹¹ Ha kulipupwisa, kanda nulengama; lishinjilenu mu Spiritu jenu kulingila Mwene.

¹² Ha kutalatala, nukawahilile; ha luyinda, nukanyongonone; ha kulemba, nukalikoleze.

¹³ Nukalianyine ku kuhona cha asandu, nukalitumbikile ku kuzumbula ngeji.

¹⁴ Wahisenu waze akunuhungumiona, wahisenu, kanda nushingana.

¹⁵ Wahililenu hamwe ni waze akuwahilila; lilenu hamwe ni waze akulila.

¹⁶ Pwenu ni kunyonga chimuwika umwe kuli mukwo ni mukwo. Kanda nunyonga yuma ya kulengumuka, alioze lifutulenu ni waze akulikehesa; kanda nukanyama ni kutaka cha yenwene.

¹⁷ Kanda nufwetesa niumwe yipi ha yipi. Fupenu yuma yilemu kumeso ja atu eswe.

¹⁸ Kachi muchihasa kupwa, nikulita ni tachi jenu, pwenu ni sambukila kuli atu eswe.

¹⁹ Kanda nulikalila milonga yenwene, akwetu a zango, alioze lisekulenu ha utenu: mumu chinasonewa ngwo, Kukala nichami, yami kumungufwetesa, chocho anambe Mwene.

²⁰ Alioze kachi mukwa kole ye mevwa zala, mulise; kachi mevwa pwila, munwise; mumu ha kulinga chocho, mukalunjika makala a kahia ha mutwe wenyi.

²¹ Kanda anukumba ku yipi, alioze kumbenu yipi ha kulinga yipema.