A-ROMA 11 - MUKANDA USANDU WA ZAMBI 1975

¹ Ngunambe ngwami, Zambi hanambila atu jenyi, nyi? Ka, pundu! Mumu yami nawa nguli Ka-Izalele wa ku munyachi wa Apalahama, wa ku vungu lia Mbenjamine.

² Zambi kambilileko atu jenyi, waze waanyingikine Shimbu-kanda. Shina kunwanyingikine chize chisoneko chinambe hali Eliya, nyi? Ngwe chize aliumbile kuli Zambi kulimika ni A-Izalele ngwenyi,

³ Mwene, o hanashihi aprofeta je, hanapuzula yilumbilo ye, yami wika ngunasala, o kanafupu kuchiza mwono wami.

⁴ Kumbululo lia Zambi kuli iye kuchi liapwa? Ngwo, Hingunalifungila tununu shimbiali a malunga waze kaliumbile makungunwa kuli Mbale.

⁵ Chizechene ha mwaka uno nawa kwali masalila nikulita ni kutongola cha vumbi.

⁶ Alioze kachi chinapu cha vumbi, mba kuchapwile cha yitanga: nyi chocho, vumbi hi vumbi ko nawa.

⁷ Mba kuchi? Chize A-Izalele akufupa, kachizukileko; alioze waze aatongwele hanachizuku, akwo hanakale:

⁸ ngwe chinasonewa ngwo, Zambi waahele Spiritu ya kufungunuka, meso aze kechi kamona no, ni matwi aze kechi kevwa no, ndo ku tangwa lino.

⁹ David kanambe ngwenyi, Mesa yo yikapwe chitela, ni muheto, ni chitalingiso, ni fweto kuli ayo:

¹⁰ meso jo akalé, hanga kechi kamona, ukatumbike manyima jo matangwa eswe.

¹¹ Ngunambe ngwami, Atalingile hanga alimbuke, nyi? Ka, pundu! Alioze ku mulonga wo ulamwino hiuneza kuli akwa mavungu mukwehia ku ukwa.

¹² Alioze kachi mulonga wo unapu kuyuka cha akwa hashi, ni kukehuluka cho chinapu upite wa akwa mavungu: Shinaho chikolo kuzala cho, nyi?

¹³ Mumu ngunahanjika kuli yenu, nuli akwa mavungu, mumu te yami nguli postolo wa mavungu, ngunachichimieka uvumbiko wami;

¹⁴ kachi hanji ngukehie ku ukwa waze a ku musunya wami, ngukalamwine amwe a kuli ayo.

¹⁵ Mumu kachi kumbila cha ayo chinapu uwanyino wa akwa hashi, kuchi muchipwa kutambula cha ayo, hi mwono ko hakachi ka afu, nyi?

¹⁶ Achi, kachi muhuko utangu usandu, kachi mwaha weswe nawa usandu: kachi muji usandu, kachi mitango nawa yisandu.

¹⁷ Achi, kachi mitango yimwe ayipatwileho, ni yena, se uli olevwe wa mu yambu, akunungine hakachi ko, hiwapwa mukwa kuhangana ni mukwo hamwe no ha muji ni maji ja olevwe;

¹⁸ kanda ukalisamba ha mitango; alioze kachi mulisamba, hi yena ko wakumbata muji, alioze muji wakukumbata yena.

¹⁹ Mba muwamba ngwe, Mitango ayipatwileho, hanga angunungemo.

²⁰ Mba, ayipatwileho mumu kafulielele, ni yena unamana ku Ufulielo. Kanda ukalengumuka, alioze ivwa woma:

²¹ mumu kachi Zambi kavwilile keke mitango yitangu, chipwe yena kechi kakuvwila keke nawa.

²² Mba talenu, utu ni ukalu wa Zambi: kuli waze alimbukile, ukalu; alioze kuli yena, utu wa Zambi, kachi munyongonona mu utu wenyi: nyi ka, yena nawa kumakakupatulaho.

²³ No nawa, nyi keshi kunyongonona mu uhulia, kumakaanungamo; mumu Zambi kanahase kwanungamo cheka nawa.

²⁴ Mumu nyi yena akupatwile ku uze nikulita ni chisemewa wapwa olevwe wa mu yambu; nikulimika ni chisemewa akunungine mu we olevwe; Shinaho chikolo wano, mitango ya ku chisemewa, makaanunga ni olevwe wo ene, nyi?

²⁵ Mumu chazangile yenu, mandumbu, kwalajala ha chijimbikilo chino, kuchina munukanyama ni kutaka cha yenwene, ngwe kukalisa ha chihanda hichawana A-Izalele, ndo ku kuzala tò cha akwa mavungu muchiza:

²⁶ chocho makalamwina A-Izalele eswe; ngwe chinasonewa ngwo, Mukwa kupulula kumakakatuka ku Zaione; iye kumakakatwisa utanganyanyi kuli akwa Yakomba;

²⁷ uno we usendo wami kuli ayo, muze mungukuchiza milonga yo.

²⁸ Ha kutwala ku sango lipema, kanapu akwa kole mumu hali yenu: alioze ha kutwala ku kutongola cha Zambi, kanaazange chikolo mumu hali tulamba.

²⁹ Mumu yawana ya vumbi ni kutambika cha Zambi keshi kulikonyekayo.

³⁰ Mumu ngwe yenu chamwenemwene ha miaka ya kunyima kunwononokene kuli Zambi, alioze haliapwila hinunawane keke, mumu ha uhulia wo.

³¹ Chocho wano nawa kononokeneko, hanga ku keke yize anuvwilileyo, o nawa akawane keke.

³² Mumu Zambi hanaayiki eswe mu uhulia, hanga akaavwile eswe keke.

³³ E mana ni yinyingi ya Zambi, chocho yajotoka nikulumbama ngwe upite! Upatwilo wenyi keshi kuhasa kuunyonga weswe! Majila jenyi keshi kuhasa kwafunjika eswe!

³⁴ Mumu iya hananyingika kunyonga cha Mwene? Hanji iya wapwile mukwa kumwaha mana?

³⁵ Hanji iya waliangile kumwaha hanga akamukundulule?

³⁶ Mumu yuma yeswe kuyakatuka kuli iye, kuyakola ku tachi jenyi, yakuswila muli iye. Uhenya ukapwe kuli iye ndo ku miaka ya mutolo. Amene.