A-ROMA 10 - MUKANDA USANDU WA ZAMBI 1975

¹ Mandumbu, che kuzanga cha mbunge yami, ni kuliumba chami kuli Zambi hali ayo, hanga akaalamwine.

² Mumu nakushindakenya hali ayo ngwami, Kulinga ni mbunge yeswe hali Zambi kali nacho, alioze hi nikulita ni chinyingi ko.

³ Mumu kakwalajala ha ululi wa Zambi, kakufupa kukolesa ululi wo ene, kalizeyesele ku ululi wa Zambi.

⁴ Mumu Kristu iye we umanunwino wa shimbi ha ululi kuli mweswe mafuliela.

⁵ Mumu Mose kanasoneka ngwenyi Mukwa kulinga ululi uze wa ku shimbi kumakapwa ni mwono nawo.

⁶ Alioze ululi uze wa ku Ufulielo unambe ngwe chino ngwo, Kanda wamba mu mbunge ye ngwe, Iya mazezuka mwilu? Te akahulumune Kristu.

⁷ Hanji iya mahulumuka ku jondo? Te akazezwise Kristu hakachi ka afu.

⁸ Alioze kuchi unambe ngwo? Liji lili hehi ni yena, mu kanwa lie, ni mu mbunge ye: te liji lia Ufulielo lize twakwambujola:

⁹ ngwo, Kachi ni kanwa lie mutayiza Mwene Yesu, nyi kachi mufuliela mu mbunge ye ngwe Zambi wamuhindwishile hakachi ka afu, makakulamwina:

¹⁰ mumu ni mbunge mutu mafuliela akatambule ululi; mba ni kanwa matayiza akatambule ulamwino.

¹¹ Mumu chisoneko chinambe ngwo, Mweswawo mamufuliela, kechi kevwa sonyi.

¹² Mumu kulipwila chakuhi mukachi ka A-Yunda ni A-Ngresia, nichimwe: mumu Mwene-umuwika, mwe Mwene wa eswe, kakuyukisa waze eswe akutambika kuli iye:

¹³ mumu mweswawo matambika ha jina lia Mwene, kumakamulamwina.

¹⁴ Mba ngwe kuchi makatambika kuli yoze kamufulieleleko? Ngwe kuchi makafuliela yoze kamuvwilile liji? Ngwe kuchi makevwa shina ni mukwa kwambujola?

¹⁵ Ngwe kuchi makambujola shina matumiwa? Nikulita ngwe chinasonewa ngwo, Cho kupema cha molu ja waze akwambujola sango lipema!

¹⁶ Alioze kononokene eswe ku sango lipema. Mumu Izaia kanambe ngwenyi, Iya hanafuliela sango lietu?

¹⁷ Chocho Ufulielo unakatuka ha kwivwa sango, ni sango Unakatuka ku liji lia Kristu.

¹⁸ Alioze ngunambe ngwami, Kevwileko, nyi? Chamwenemwene ngwo, Liji liayo liatuhukile hashi heswe, ni maliji jo ndo ku masongo ja yifuchi yeswe ya hashi.

¹⁹ Alioze ngunambe ngwami, A-Izalele kanyingikineko, nyi? Hatangu, Mose kanambe ngwenyi, Kumungukanwihia ku ukwa ni waze hi vungu ko, ni vungu kulishi malinjekela mungukanutenwisa.

²⁰ Mba Izaia kanahamuka chikolo, kanambe ngwenyi, Anguwanyine kuli waze kangufupileko; angusolwele pundu kuli waze kahulileko ha kutwala kuli yami.

²¹ Alioze hali A-Izalele kanambe ngwenyi, Tangwalieswe nganganga nolwele moko jami kuli atu ja uhulia, a kuhamika.