A-ROMA 1 - MUKANDA USANDU WA ZAMBI 1975

¹ Yami Paulu, ndungo ya Yesu Kristu, amutambikile postolo, amuselele ku sango lipema lia Zambi,

² lize alakenyene kushi ku makanwa ja aprofeta jenyi mu yisoneko yisandu.

³ Lia kutwala kuli Mwanenyi, yoze wasemukine ku munyachi wa David nikulita ni musunya,

⁴ amwinyikine iye mwe Mwana Zambi ni tachi, nikulita ni Spiritu ya usandu, ha Uhindukilo wenyi hakachi ka afu, iye Yesu Kristu Mwene wetu;

⁵ kuli iye twatambwile vumbi ni upostolo wa kuneha kwononoka cha Ufulielo hakachi ka mavungu eswe, mumu ha jina lienyi;

⁶ hakachi ko yenu nawa, hananutambika kuli Yesu Kristu;

⁷ Kuli waze eswe ali mu Roma kanaazange chikolo kuli Zambi, hanaatambika asandu: Vumbi kuli yenu ni sambukila ya kuli Zambi Tata yetu ni Mwene Yesu Kristu.

⁸ Hatangu, ngunasakwila kuli Zambi yami mu jina lia Yesu Kristu hali yenu eswe, mumu Ufulielo wenu kakuwambujola hano hashi heswe.

⁹ Mumu Zambi iye chela chami, yoze nakumulingila ni spiritu yami mu sango lipema lia Mwanenyi, ngwe nakunuvulwoka mu yilemba yami nikulitwamina nichimwe;

¹⁰ ngunaliumbu, hanji ku jila yimwe akanguwahise ku upale wa Zambi ngukahete kuli yenu.

¹¹ Mumu ngunevu usona kunumona, hanga ngukalianyine ni yenu chawana chimwe cha vumbi, cha uspiritu, hanga nukajikize;

¹² ngwami, Hanga tukalilembejeke hamuwika, mutu ni mutu wa kuli yetu, ku Ufulielo wa mukwo, niwenu kanda niwami.

¹³ Mumu ngunazange nunyingike, mandumbu, ngwe kanji nahalile kuheta kuli yenu, hanga ngukapwe ni mihuko yimwe hakachi kenu nawa, chizechene ngwe hakachi ka akwa mavungu akwo (alioze angukwikile ndo haliapwila).

¹⁴ Kongo nguli nalio kuli A-Ngresia ni kuli tundaka, kuli akwa mana ni kuli waze keshi mana.

¹⁵ Chocho ha kutwala kuli yami ngunazange kwambujola sango lipema kuli yenu nawa nuli mu Roma.

¹⁶ Mumu chishi kwivwa sonyi ha sango lipema: mumu kuliapwa je tachi ja Zambi ha ulamwino kuli mweswe mafuliela; hatangu kuli A-Yunda, ni kuli A-Ngresia nawa.

¹⁷ Mumu ululi wa Zambi kanausololamo wa kukatuka ku Ufulielo, wa kutwala ku Ufulielo: ngwe chinasonewa ngwo, Alioze mukwa ululi kumakenda ku Ufulielo.

¹⁸ Mumu utenu wa Zambi kuunasoloka wa kukatuka mwilu ha utanganyanyi weswe ni uhenge weswe wa atu, waze kakufungika umwenemwene ni uhenge;

¹⁹ mumu chize anachinyingika ha kutwala kuli Zambi chinasoloka kuli ayo; mumu Zambi hanachisolola kuli ayo.

²⁰ Mumu chize ku kutanga cha hashi, yuma yenyi yize kuyishi kumoneka, yinamoneka pundu, se kuyinalumbunuka ku yuma yize yakutangiwa, ni tachi jenyi ja mutolo ni uzambi wenyi; hanga akaapwise keshi kaliongelo.

²¹ Mumu chipwe anyingikine Zambi, kamuchichimiekene ngwe Zambi, chipwe kasakwilile; alioze asekele mu manyonga jo, ni mbunge jo ja kuhulama jatayile.

²² Shimbu malivulwoka akwa mana, alumukine yihepuke.

²³ Alumwine uhenya wa Zambi, yoze keshi kupola, mu kulifwa cha Chizulie cha mutu wa kupola, ni wa tujita, ni wa tushitu, ni tututu akukalala.

²⁴ Kashika Zambi waakunjikile mu usolo wa mbunge jo ku luchisa, mukusaula mijimba yo hakachi ko.

²⁵ Waze asumbakenyene umwenemwene wa Zambi ni mahuza, nikuwayila, nikulingila chuma cha kutanga, hi mwe Tangi ko, mwenawo kafumana ndo ku miaka ya mutolo. Amene.

²⁶ Ha chikuma chino Zambi waakunjikile ku kusasaminya cha sonyi: mumu mapwo jo alumwine chize chinate ni chisemewa mu chize kuchatele:

²⁷ chizechene malunga nawa, nikuhichika chize chinate ni mapwo, asasaminyine mu usolo wo umwe kuli mukwo ni mukwo, lunga ni lunga nikulinga sonyi, no nikutambula muli ayo ene fweto yize yinalite ni kupianguka cho.

²⁸ Mba chizechene ngwe katayile kupwa ni Zambi mu kunyonga cho, Zambi waakunjikile ku manyonga a kulumbuka, mukulinga yuma yize kuyatele:

²⁹ se, azalile tò ni uhenge weswe, ni ungulungulu, ni kuzo, ni uhuka; a tò ni lufwachinda, ni ungalwe, ni vunda, ni kalimbalimba, ni upapwoki; akwa kulinongota,

³⁰ yilamikiji, akwa kuvwila kole Zambi, akwa kupopolola, akwa kulizelula, akwa kulizata, akwa kutomba yuma yipi, yihulia kuli yisemi jo.

³¹ Keshi malinjekela, keshi kushishika ku yilakenyo, keshi zango lia atu, keshi keke;

³² wano, nikunyingika upatwilo wa ululi wa Zambi, ngwe waze akulinga yuma ngwe yino kanatela kufwa, hindu hi kuyilinga wika ko, alioze kakuwaha hamwe ni waze akuyilinga.