Amose 9 - MUKANDA USANDU WA ZAMBI 1975

¹ Namwene Mwene kanamana hakamwihi ni chilumbilo. Yamba ngwenyi, Lamba manguji ha masongo ndo yikuli muyichikima ukayifwenye ha mitwe ya atu eswe. Waze malisalaho mungukaashihisa ni katana. Kechi kahasa kuchina niumwe; kechi kahasa kwomboka niumwe.

² Chipwe mafulila ndo ku Shiole hindu kwoko liami mulikaachizako. Chipwe manyina ku malilu mungukaahulumunamo.

³ Chipwe maswamina ha mbulwa mulundu wa Karmela kwenako mungukaafupa ni kwakwata. Chipwe manguswamina mu mashima a kalunga-lwiji mungukatuma kapela mba makaasuma.

⁴ Chipwe maya ufunge kuli akwa kole jo, kwenako mungukatuma katana mba makaashiha. Mungwahulikila meso jami kwalinga chipi hi chipema ko.

⁵ Mwene Yehova-wa-Tujita, yoze masunga hashi mba muhasangunuka, mba waze eswe aliho malishimwoka, neho heswe muhazunduka ngwe lwiji Nilo ni kuhuwa nawa ngwe Nilo wa Engitu;

⁶ yoze wakutunga yipatulo yenyi ya kwilu mu malilu nikusa kuzazuluka chenyi helu lia hashi, yoze wakusanyika meya a kalunga-lwiji nikwazukwila ha mavu—jina lienyi Yehova.

⁷ Yehova kanambe ngwenyi, Enu A-Izalele kunwapwile ngwe A-Etiopia kuli yami? Te chachijile A-Izalele ku chifuchi cha Engitu? Ni A-Filistea ku Kafetore ni A-Seria ku Kiri?

⁸ Meso ja Mwene Yehova ha chifuchi cha shili anaahulikila, mba mungukachonwona he ha mavu: Munyachi wa Yakomba wika chichi kaunongesa liakulu. Chocho kanambe Yehova.

⁹ Mumu mungukatuma kusakumuna munyachi wa Izalele hakachi ka mavungu ngwe umwe kakusakumuna musalo wa masekeseke, alioze nikamwe kaliwe mukaholoka hashi kakuhi.

¹⁰ Yivulumunyi eswe a atu jami makafwa ni katana waze akwamba ngwo, Chipi kuchichi kutuwana chipwe kutakana ni yetu.

¹¹ Ha tangwa lize mungutungulula nawa mbalaka ya David yize hiyinapuzuka. Mungukalulika yituwa yayo, nikumika nawa yize yalimbuka hashi, ni kuyitungulula chizechene ngwe ha matangwa a kunyima,

¹² hanga akazuke masalila ja Endome, ni mavungu aze eswe hanaaluku jina liami. Chocho kanambe Yehova mukwa kulinga chuma chino.

¹³ Yehova kanambe ngwenyi, Matangwa kaneza muze mukwa kuchipa maheta mukwa kucha, ni mukwa kukama uva maheta mukwa kutumba mbuto. Milundu muyikasulumuka ni vinyu yipema, ni mindundena muyikapukukila nayo.

¹⁴ Mungukahilwisa kuwaha cha atu jami A-Izalele mba makatungulula yihunda yize hiyapuzuka, makatwamamo. Makalima minda ya uva nikunwa vinyu yayo; makalinga manaka nikulia mihuko yo.

¹⁵ Mungukaatumba mu chifuchi cho, mba kechi katukukako nawa ku chifuchi chize hinaaha. Chocho kanambe Yehova Zambi yenu.