Amose 7 - MUKANDA USANDU WA ZAMBI 1975

¹ Chocho Mwene Yehova yangulweza, iye te ha kuputuka kusokoloka cha mbuto kanalulika makumbi. Chapwile ha kusokoloka kulutwe lia kucha cha mwanangana.

² Muze te hamana kulia mwambu weswe wa chifuchi nambile ngwami, Mwene Yehova ngunaliumbu Ukonekene kama! Yakomba kuchi mahasa kulikoleza? Aye wakeha Chichize.

³ Mba Yehova yalikonyeka ha chuma chino. Yehova yamba ngwenyi, Kuchichi kupwa.

⁴ Chocho Mwene Yehova yangulweza, Mwene Yehova te kanasanyika upatwilo wa kahia. Kahia te hikanalalisa kalunga-lwiji mba kanaputuka kulia chifuchi.

⁵ Aho yingwamba ngwami, Mwene Yehova, litwamine kama, ngunaliumbu! Yakomba kuchi mahasa kulikoleza? Aye wakeha Chichize.

⁶ Mba Yehova yalikonyeka ha chuma chino. Mwene Yehova yamba ngwenyi, Chino nawa kuchichi kupwa.

⁷ Yangulweza nawa, Mwene te kanamana ku chipanga-cha-mawe cha kutunga ni prumo, kali ni prumo mu kwoko lienyi.

⁸ Yehova yamba kuli yami ngwenyi, Amose, yika unamono? Yingwamba ngwami, Ngunamono prumo. Mba Mwene yamba ngwenyi, Yami ngunase prumo hakachi ka atu jami A-Izalele; chichi kwapalika nawa nilimwe tangwa.

⁹ Mungwenyeka manangamo ja Izake, ni mazuwo asandu ja Izalele mungwapwisa a hululu mungukatukila zuwo lia Jeroboame ni katana.

¹⁰ Henaho Amazia sasendote wa Mbetele yatuma kuli Jeroboame mwanangana wa Izalele ngwenyi, Amose hakutwama punga hakachi ka munyachi wa Izalele, ni chifuchi kuchichi kuhasa kujikiza ni maliji jenyi eswe.

¹¹ Mumu Amose kanambe ngwenyi, Jeroboame kumakafwa ni katana, ni A-Izalele kumakaya ku unjize kusuku ni chifuchi chino.

¹² Mba Amazia yamba kuli Amose ngwenyi, Ena mukwa kumona katuka, Chinyina ku chifuchi cha Yunda ukalileko mbolo ni kuprofetezelako.

¹³ Alioze kanda ukaprofetezela ku Mbetele nawa mumu kwapwa kuma kusandu kwa mwanangana kanda tembele ya wanangana wenyi.

¹⁴ Alioze Amose yakumbulula Amazia ngwenyi, Ami chapwile profeta, chipwe mwana wa profeta. Napwile kafunga ka yimuna kanda mukwa kufunga misuwa.

¹⁵ Mba Yehova wanguchijile shimbu mungukaula yimuna; Yehova wambile kuli yami ngwenyi, Yako uprofeteze kuli atu jami A-Izalele.

¹⁶ Kashika ivwa liji lia Yehova. Ena unambe ngwe, Kanda uprofeteza kulimika ni Izalele, kanda ushindakenya kulimika ni munyachi wa Izake.

¹⁷ Kashika Yehova kanambe ngwenyi, Pwo lie makapwa chikoi mu chihunda, anenu a malunga ni a mapwo makafwa ni katana, ni chifuchi che machipangila ni muhipu, ni yena mwene kumukafwa mu chifuchi cha luchisa, ni A-Izalele kumakaya ku unjize kusuku ni chifuchi cho.