Amose 6 - MUKANDA USANDU WA ZAMBI 1975

¹ Lamba kuli waze anatwama nikwoloka mu Zaione, ni waze anatwama kawape ha mulundu wa Samaria, malunga alemu a mavungu akwa lutwe, kuli ayo akwa munyachi wa Izalele kakuya.

² Yénu ku Kalenehe numone; mba chize ku kuze yénu ku Hamate yinene, mba nupalumuke ku Ngata ya A-Filistea. O te ahiana mavungu wano? Hanji chifuchi cho chinene, cha yenu chikehe?

³ Yenu ngunahula, nwakumona kusuku lie tangwa lipi nwakukoka hakamwihi chitwamo cha upupilo.

⁴ Lamba kuli waze akupomba ha mihela ya mazo a njamba nikuholola ha miu yo. Waze akulia ana-mapanga a ku mbunga ni yimbembe ya ngombe a hakachi ka tanga. Waze akwimba miaso ya uleya ku liji ha

⁵ kalialia ngwe David kakulinyongena yisaji ya miaso.

⁶ Kakunwa vinyu mu misenge yinene; kakulikwita maji apema alioze kevwile kupiha ha kuji-ni-tomo lia José.

⁷ Haliapwila kashika mapwa e atangu hakachi ka waze maya ku unjize, ni chimbangwinya cha akwa kuliolola muchikahwa.

⁸ Yehova mwe Zambi-ya-Tujita ngwenyi, Mwene Yehova halishinga ni jina lienyi mwene ngwenyi, Kulengumuka cha Yakomba changuvwisa lwaji; mbonge jenyi jangupihila, kashika mungukunjika chihunda ni yize yeswe yilimo.

⁹ Nyi kumi lia malunga masala mu zuwo limuwika kumakafwa.

¹⁰ Mba muze usoko wa mutu, yoze te mamwocha, mamuzundula kuchiza yifwaha mu zuwo, mamba kuli mukwo uli mwe muchima lia zuwo ngwenyi, Kwasala umwe mukwo nawa hamwe ni yena? Aye makumbulula ngwenyi, Ka. Mba mukwo mamba ngwenyi, Kala! Mumu kuchatutambile kuvuluka jina lia Yehova.

¹¹ Mumu Yehova kanatumu, mba lie zuwo linene malifwenyona, ni zuwo likepe malipalwola yipalupalu.

¹² Tuvwalu kakuzomboka ha yimawe? Kakuchipa kalunga-lwiji ni ngombe? Alioze enu hinwalumuna upatwilo wa kulita mu utende; ni mihuko ya ululi hinwayalumuna musase.

¹³ Enu nwakuwahilila ni Lo-Devale nikwamba ngwenu, Te ni tachi ja yetwene kutwatambwile Karnaime?

¹⁴ Yehova Zambi-ya-Tujita kanambe ngwenyi, Mungusolola limwe vungu kulimika ni yenu munyachi wa Izalele. O kumakanupinjisa chize ku unjililo wa Hamate ndo ku chitwetwe cha ku Arapa.