Amose 5 - MUKANDA USANDU WA ZAMBI 1975

¹ Enu munyachi wa Izalele, ivwenu liji lino ngunande lia kunulilila. Ngwami,

² Mwe *virgem Izalele halimbuka kechi kakatuka nawa. Hamwehuka mu chifuchi chenyi ni yoze mamuhindwisa wakuhi.

³ Mumu Mwene Yehova kanambe ngwenyi, Chihunda kuze kwatuhukile kanunu muchisala ni kulakaji. Ni kuze kwatuhukile kulakaji mukusalako kumi ku munyachi wa Izalele.

⁴ Mumu Yehova kanambe ku munyachi wa Izalele ngwenyi, Ngufupenu, nutwame ni mwono.

⁵ Alioze kanda nufupa ku Mbetele; kanda nunjila ku Ngilingali chipwe kuzauka ku Mbia-shipa. Mumu akwa Ngilingali makaya ku unjize ni akwa Mbetele makaapwisa mokomoko.

⁶ Fupenu Yehova nutwame ni mwono kuchina makalekwoka ngwe kahia mu munyachi wa José. Makalalisa ni mukwa Mbetele yoze makajima kechi kasoloka.

⁷ Enu! Nwakwalumuna upatwilo wa kulita mu musase ni ululi nwakuumbila mu mavu.

⁸ Yoze watangile Kungulwila ni Muta-ni-kawa, yoze wakwalumuna ufuku pwi mu kucha, yoze wakwalumuna mwalwa mu ufuku, yoze wakusanyika meya a kalunga-lwiji nikwazukwila ha kuzazuluka cha hashi, jina lienyi Yehova,

⁹ mukwa kuhenyesa kwonwona chenyi hali yitakame, hanga kwonwona chikeze ha yihunda ya kukolesa.

¹⁰ Mukwa kukanjisa mu chota kakumuvwila kole; kakuvwila kupiha yoze mahanjika umwenemwene.

¹¹ Kashika se nwakuliata yiswale nikumufwetesa tiliku, kashika chipwe hinwatunga mazuwo ja mawe a kululika hindu kunuchi katwamamo. Hinwatumba minda yipema ya uva alioze kunuchi kanwa vinyu yako.

¹² Mumu ngunanyingika kwalula cha milonga yenu ni kutoha cha shili yenu— enu nwakupinjisa akwa ululi, ni kutambula chindo, ni kupiangula mukwa kuhona mu chota.

¹³ Kashika mukwa kukanyama mahola mu mwaka ngwe uno, mumu wapwa mwaka upi.

¹⁴ Fupenu chipema hi chipi ko hanga nukatwame ni mwono. Chocho Yehova Zambi-ya-Tujita mapwa hamwe ni yenu chizechene ngwe hinwamba.

¹⁵ Vwilenu lwaji yuma yipi; zangenu yuma yipema kolesenu upatwilo wa ululi mu chota. Hanji Yehova Zambi-ya-Tujita mavwila vumbi masalila ja José.

¹⁶ Kashika Yehova, Zambi-ya-Tujita, mwe Mwene kanambe ngwenyi, Ku malindalinda eswe kumukukapwa kulila mbimbi; mu matapalo eswe kumakamba ngwo, Mama yami! mama yami! Kumakasanyika njimi akalishimwoke; ni waze ananyingika kulila lungungu maasanyika akalile mbimbi.

¹⁷ Ku minda yeswe ya uva kumukukapwa mbimbi mumu mungupalika hakachi kenu. Chocho kanambe Yehova.

¹⁸ Lamba kuli yenu nunazange tangwa lia Yehova! Kuchi te nunafupu tangwa lia Yehova? Liapwa milima hi pangu ko

¹⁹ ngwe kachi mutu machina ndumba mba matakana ni ursu. Hanji manjila mu zuwo mba ha kujamina ni kwoko ha yishimi kapela mamusuma.

²⁰ Tangwa lia Yehova milima, hi pangu ko. Ufuku pwi uliko ni mwalwa wakuhi.

²¹ Chazangile yiwanyino yenu, ngunayisaula, chevwile kuwaha ni yikungulwila yenu yilemu.

²² Chipwe munungulambula milambu yenu ya kulumba ni ya wunga chichi kuyitambula. Milambu yenu ya sambukila ni yimuna jenu a maji, chipwe kutala chichi kayitala.

²³ Chiza kuli yami zungo lia miaso yenu; chichi kapanjika ku miaso ya tulialia twenu.

²⁴ Alioze upatwilo wa kulita ukapwe ngwe sanga lia meya; ululi ukapwe ngwe muhwiji wa mutolo.

²⁵ Te nwangunehenene yitapo yenu ni milambu yenu ha makumi aze awana a miaka mu puya, enu munyachi wa Izalele?

²⁶ Munukambata mwanangana wenu Sakute, ni Kaiwana zambi yenu wa matongonoshi, ni tuponya twenu aze hinwalilingila,

²⁷ kashika mungukanutwala ku unjize sali lize lia Ndamaseku. Chocho kanambe Yehova yoze kali ni jina lia Zambi-ya-Tujita.