Amose 4 - MUKANDA USANDU WA ZAMBI 1975

¹ Ivwenu liji lino, enu ngombe a ku Mbashane, enu nuli mu mulundu wa Samaria, nwakupinjisa yiswale, nwakufwenya akwa kuhona, nwakwamba kuli akwenu-malunga ngwenu, Nehenu tunwe.

² Mwene Yehova halishinga ni usandu wenyi ngwenyi, Matangwa meza kwiza hali yenu muze makanuchizako ni yikungo. Waze makasulako makaachiza ni tuzambu.

³ Munutuhukila ku yituwa ya yipanga-ya-mawe mutu mweswe fwapu kumeso jenyi. Makanumbila ku Kamone. Chocho kanambe Yehova.

⁴ Tweyenu ku Mbetele nukavulumune. Tweyenu ku Ngilingali nukokese milonga. Nehenu yitapo ha chimene tangwa ha tangwa ni milambu yenu ya chihanda cha kumi ha matangwa atatu, ha matangwa atatu.

⁵ Lambulenu milambu ya kusakwila ya yuma ya futunwiso; tambikenu milambu ya mbunge, nukayambulule, mumu chocho nwakuzanga kulinga, enu A-Izalele. Chocho kanambe Mwene Yehova.

⁶ Nanuhele makanwa ja zala mu yihunda yenu yeswe, ni kuhona cha mbolo mweswe mu chifuchi chenu, hindu kunwahilukile kuli yami. Chocho kanambe Yehova.

⁷ Nanuminyine vula muze kwasala hindu tukweji atatu ku matangwa a kucha. Napwile nikutuma vula ha chihunda chimwe ni kukwika vula ha chihunda chikwo. Munda umwe watambwile vula; shimbu munda ukwo kuwatambwile mba womine.

⁸ Akwa yihunda yiali yitatu endele ku chihunda chimuwika akanwe meya hindu pwila kuyahwile. Hindu kunwahilukile kuli yami. Chocho kanambe Yehova.

⁹ Nanulambile ni makonya ni mbundu; napwishile manaka jenu ni minda yenu ya uva ya hululu; mikuyu yenu ni miolevwe yenu yahwile kuli makumbi. Hindu kunwahilukile kuli yami. Chocho kanambe Yehova.

¹⁰ Natumine hakachi kenu chilungo ngwe chize cha Engitu; nashihile akweze jenu ni katana; nambachile tuvwalu twenu; napwishile yilombo yenu ya kukupuka vumba lipi mu mazulu jenu. Hindu kunwahilukile kuli yami. Chocho kanambe Yehova.

¹¹ Nanungwine amwe hakachi kenu ngwe Zambi wanungwine Sondome ni Ngomora, ni yenu nwapwile ngwe lukunyi wa kuchanga mu mbwemena. Hindu kunwahilukile kuli yami. Chocho kanambe Yehova.

¹² Kashika mungulinga chino kuli yenu A-Izalele, mba se mungulinga chino kuli yenu hililulikenu kuliwana ni Zambi yenu enu A-Izalele.

¹³ Mumu nyingikenu; yoze wakuwumba milundu, ni kutanga fuji; yoze wakusolola manyonga jenyi kuli atu; yoze wakwalumuna chimene chikapwe milima; yoze wakuliata ha milundu ya hashi— jina lienyi Yehova, Zambi-ya-Tujita.