Amose 3 - MUKANDA USANDU WA ZAMBI 1975

¹ Enu A-Izalele, ivwenu liji lino Yehova hanahanjika lia kulimika ni yenu, munyachi uze weswe nachijile ku chifuchi cha Engitu, ngwami,

² Hakachi ka minyachi yeswe ya hashi yenu wika hinanunyingika, kashika mungukanwaha kastigu mumu ha uhenge wenu weswe.

³ Atu aali kakuliendela nyi kalitesele?

⁴ Ndumba kakuhiohia mu yambu nyi keshi ni yifwo? Mwevu wa ndumba kakuteta mu chivwenge chenyi nyi kakwachile chimwe?

⁵ Kajila mafwa mu kambwila nyi kamutelelelio? Kambwila kuliakukambuluka nyi kashitu wakuhi?

⁶ Atu kechi kwivwa woma nyi hasunga chitavwi mu chihunda? Chuma chikalu muchiwana chihunda nyi Yehova kachitumine?

⁷ Pundu Mwene Yehova keshi kulinga chuma shina malweza chijimbikilo chenyi kuli tuvumbi twenyi aprofeta.

⁸ Ndumba hahiohia, iya kechi kwivwa woma? Mwene Yehova hanahanjika, iya mahasa kuhola ni uprofeto?

⁹ Ambululenu mu mbonge ja Ashedode ni mu mbonge ja chifuchi cha Engitu ngwenu, Kungulukenu ha milundu ya Samaria nukamone chizungozungo muli ayo ni we upinjiso hakachi ko.

¹⁰ Yehova kanambe ngwenyi, Waze akuvundula upupilo ni wiji mu mbonge jo; kanyingikine kulinga yipema.

¹¹ Kashika Mwene Yehova kanambe ngwenyi, Mukwa kulimika makaseleka chifuchi nikunupuzwila yipanga yenu ni kupupa mbonge jenu.

¹² Yehova kanambe ngwenyi, Ngwe kafunga matambula ku kanwa lia ndumba molu aali hanji chipinji cha twitwi, chocho makupulula A-Izalele waze anatwama mu Samaria, ha mbango ya muu, hanji ha muhela wa kulilengela.

¹³ Mwene Yehova, Zambi-ya-Tujita kanambe ngwenyi, Ivwenu nukashindakenye munyachi wa Yakomba ngwe,

¹⁴ Ha tangwa lize mungulamba Izalele mumu ha mutonga wenyi, mungulamba yilumbilo ya Mbetele. Makateta mbinga ja chilumbilo jikaholoke hashi.

¹⁵ Mungulamba zuwo lia lushiho hamwe ni zuwo lia lwiza, ni mazuwo ja mazo a njamba makanonga ni mazuwo anene kumakahwa. Chocho kanambe Yehova.