Amose 2 - MUKANDA USANDU WA ZAMBI 1975

¹ Yehova kanambe ngwenyi, Mumu ha milonga yitatu ya Moape hanji yiwana, chichi kahilwisa kastigu, mumu halumuna kale yifwaha ya mwanangana wa Endome.

² Chocho mungutuma kahia ha Moape mukalalisa mbonge ja Keriote, mba Moape makafwa ni Chizungozungo, ni kukalumioka ni liji lia chitavwi.

³ Munguteta mukwa kuyula hakachi ko, mungukashiha alemu eswe hamwe nenyi. Chocho kanambe Yehova.

⁴ Yehova kanambe ngwenyi, Mumu ha milonga yitatu ya Yunda hanji yiwana, chichi kahilwisa kastigu, mumu halituna shimbi ya Yehova kafungile yiyulo yenyi. Yuma yo ya kwonga hiyinaapiangula, yize tulamba two endele nayo.

⁵ Chocho mungutuma kahia hali Yunda mukalalisa mbonge ja Yerusaleme.

⁶ Yehova kanambe ngwenyi, Mumu ha milonga yitatu ya Izalele hanji yiwana, chichi kahilwisa kastigu, mumu kakulanjisa akwa ululi ha mbongo ja prata; kakulanjisa yiswale ha haku jiali.

⁷ Wano kakuliachila mitwe ya yiswale mu fufuta ya hashi; kakupiangula jila ya akwa lamba. Lunga ni tato kakupomba ni mwana-pwo umuwika chocho kanajilula jina liami lisandu.

⁸ Kakupomba ku lumbu lia chilumbilo cheswe mu mahina a chifungo; mba mu zuwo lia Zambi yo kakunwa vinyu ya waze hanaafwetesa milonga.

⁹ Alioze nanongesene A-Amore aze aaliangile; Chizundamo cho chapwile ngwe cha misedru, ni tachi jo ngwe tachi ja mitondo ya carvalho. Nanongesene mihuko yenyi kwilu ni miji yenyi kushi.

¹⁰ Chikwo nawa nanuchijile mu chifuchi cha Engitu nikungongwela mu puya makumi awana a miaka hanga nukatunge chifuchi cha A-Amore.

¹¹ Nazundwile amwe hakachi ka ana jenu akapwe aprofeta, ni amwe hakachi ka akweze jenu akapwe Anazireu. Yehova kanambe ngwenyi, Hi chocho ko, enu A-Izalele?

¹² Alioze nwanwishine Anazireu vinyu; nwambile aprofeta ngwenu, Kanda nuprofeteza.

¹³ Kumanyi mungunushindununa muma mwenu, ngwe temba lia yichita yakushindunuka.

¹⁴ Tambu mujihwa kuli akwa tambu ni akwa tachi kechi kapwa nawa ni tachi jo. Chipwe akwa ndundo kechi kulamwina mwono wo.

¹⁵ Ngashi kechi kalikoleza; mukwa tambu kechi kalilamwina; chipwe mukwa kwenda hali kavwalu kechi kalamwina mwono wenyi.

¹⁶ Mukwa mbunge ya hamu hakachi ka yitakame, ha tangwa lize makachina uselesele. Chocho kanambe Yehova.