Amose 1 - MUKANDA USANDU WA ZAMBI 1975

¹ Maliji ja Amose, aye wapwile hakachi ka tufunga twa mapanga a ku Tekoa; maliji aze amwene ha kutwala kuli Izalele ha matangwa a Uzia mwanangana wa Yunda, ni matangwa a Jeroboame mwana Njoashe mwanangana wa Izalele miaka yiali shimbu munyiko kanda wiza.

² Yamba ngwenyi, Yehova kanakulunguza ku Zaione, kanahiohesa liji lienyi ku Yerusaleme. Ulilo wa tufunga unalili; helu lia mulundu wa Karmela hanalele.

³ Yehova kanambe ngwenyi, Mumu ha milonga yitatu ya Ndamaseku, hanji yiwana, chichi kahilwisa kastigu, mumu hanazungula Ngiliate ni chikungo cha utale.

⁴ Kashika mungutuma kahia ku zuwo lia Hazaele mba mukalalisa mbonge ja Mbene-Hadade.

⁵ Mungumakuna njalo ja Ndamaseku, mungutetaho waze atwama mu chikulo cha Avene; munguteta ku Mbete-Endene mwe mukwa lukanda, ni atu ja Seria maya ku unjize ku Kiri. Chocho kanambe Yehova.

⁶ Yehova kanambe ngwenyi, Mumu ha milonga yitatu ya Ngeza hanji yiwana, chichi kahilwisa kastigu, mumu ambachile ku unjize vungu lia muwundu akaakunjike ku Endome.

⁷ Chocho mungutuma kahia ha chipanga cha Ngeza mba mukalalisa mbonge jako.

⁸ Mungutetaho waze atwama mu Ashedode; munguteta ku Asekalone mwe mukwa lukanda. Mungutalikisa kwoko liami kulimika ni Ekrone ni masalila ja A-Filistea kumakanonga. Chocho kanambe Mwene Yehova.

⁹ Yehova kanambe ngwenyi, Mumu ha milonga yitatu ya Teru hanji yiwana, chichi kahilwisa kastigu, mumu akunjikile vungu lia muwundu ku Endome kewulukile usendo wa usoko.

¹⁰ Chocho mungutuma kahia ha chipanga cha Teru, mba mukalalisa mbonge jako.

¹¹ Yehova kanambe ngwenyi, Mumu ha milonga yitatu ya Endome hanji yiwana, chichi kahilwisa kastigu, mumu yakaula mwanakwo ni katana nikumbila keke yeswe. Utenu wenyi wapapulwile matangwa eswe; wafungile ufwatulo wenyi wa mutolo.

¹² Chocho mungutuma kahia ku Temane, mba mukalalisa mbonge ja Mbozera.

¹³ Yehova kanambe ngwenyi, Mumu ha milonga yitatu ya A-Amone hanji yiwana, chichi kahilwisa kastigu, mumu yahangula mapwo tufumba mu Ngiliate hanga akatohese manjiza jo.

¹⁴ Chocho mungukawika kahia mu chipanga cha Raba, mukalalisa mbonge jenyi, ni kulikumbukila ha tangwa lia jita, ni kangonga ha tangwa lia chijimbi.

¹⁵ Mba mwanangana wo makaya ku unjize iye ni alemu jenyi hamuwika. Chocho kanambe Yehova.