Alevi 9 - MUKANDA USANDU WA ZAMBI 1975

¹ Ha tangwa liamuchinake Mose yasanyika Arone ni anenyi a malunga ni makulwana a Izalele.

² Yamba kuli Arone ngwenyi, Anda chimbembe cha kuji akapwe mulambu ha shili, ni kuji ya panga akapwe mulambu wa kulumba, eswe ni aali keshi chipa, ukaalambule kumeso ja Yehova.

³ Amba kuli A-Izalele ngwe, Andenu kuji ya pembe akapwe mulambu ha shili, ni chimbembe ni mwana-panga, eswe ni aali a mwaka umuwika, keshi chipa, akapwe mulambu wa kulumba;

⁴ ni kuji ya ngombe ni kuji ya panga akapwe milambu ya sambukila, akaatape kumeso ja Yehova; ni mulambu wa wunga wa kuchinga ni maji, mumu musono Yehova kumasoloka kuli yenu.

⁵ Mba yuma yeswe Mose waatumine yayineha kulutwe lia mbalaka ya chikungulwila. Che chikungulwila cheswe chakundama nikumana kumeso ja Yehova.

⁶ Mose yamba ngwenyi, Chino che chuma Yehova wanutumine mba ulemu wa Yehova muusoloka kuli yenu.

⁷ Mba Mose yamba kuli Arone ngwenyi, Kundama ku chilumbilo ukalambule mulambu we ha shili, ni mulambu we wa kulumba, ukalifukile shili hali yena ni hali e atu. Neha nawa mulambu hali atu Ukafuke shili yo, chizechene ngwe Yehova hatuma.

⁸ Chocho Arone yakundama ku chilumbilo, yashiha chimbembe cha mulambu ha shili ya iye mwene.

⁹ Mba ana ja Arone a malunga amukunjikile e manyinga. Iye yachupika munwe wenyi mu manyinga, yaakomona ha mbinga ja chilumbilo, mba manyinga yaazujila ku shina lia chilumbilo.

¹⁰ Alioze e maji, ni njiso, ni maji a ha liayi lia mulambu ha shili yayilumba ha chilumbilo, chizechene ambile Yehova kuli Mose.

¹¹ Ahoze ye yifwo ni kupu yayocha ni kahia haze lia chilombo.

¹² Yashiha mulambu wa kulumba. Ana ja Arone a malunga yamukunjika e manyinga, iye yaasapwila kwa kujingilika ha chilumbilo.

¹³ Yamukunjika mulambu wa kulumba chihanda ha chihanda ni we mutwe. Iye yayilumba ha chilumbilo.

¹⁴ Yakosa yingambiangambia ni molu mba yayilumba hamuwika ni mulambu wa kulumba ha chilumbilo.

¹⁵ Mba yakunjika mulambu wa hali e atu. Yanda pembe wa mulambu ha shili ya e atu, yamushiha, yamulambula ha shili chizechene ngwe mulambu utangu ha shili.

¹⁶ Yakunjika mulambu wa kulumba, yautambula nikulita ni shimbi.

¹⁷ Yakunjika mulambu wa wunga. Yazomonako kwoko lia tò, yaulumba ha chilumbilo, wa kuweza helu lia mulambu wa kulumba wa chimene.

¹⁸ Yashiha mwe kuji ya ngombe ni mwe kuji ya panga nawa yitapo ya milambu ya sambukila hali e atu. Ana ja Arone a malunga yakunjika manyinga kuli iye, mba yaasapwila kwa kujingilika ha chilumbilo;

¹⁹ ni maji a kuji ya ngombe ni a kuji ya panga, ni muchila wa maji, ni a ha yingambiangambia, ni njiso, ni maji a ha liayi.

²⁰ Asele maji ha pambo mba iye walumbile e maji ha chilumbilo.

²¹ Alioze pambo ni chilama cha chindume Arone wayihungishile yikapwe mulambu wa kuhungisa kumeso ja Yehova nikulita ni shimbi ja Mose.

²² Henaho Arone yazundula moko jenyi kuli atu, yaawahisa. Mba yapalumuka kuze walambwile mulambu ha shili, ni mulambu wa kulumba, ni milambu ya sambukila.

²³ Mba Mose ni Arone yanjila mu mbalaka ya chikungulwila. Muze yatuhuka, yawahisa atu, mba ulemu wa Yehova yiusoloka kuli atu eswe.

²⁴ Kahia kakatukile kumeso ja Yehova yalalisa mulambu wa kulumba hamwe ni maji ha chilumbilo. Muze atu eswe hachimona, atetele mba yafulamana ha meso jo.