Alevi 8 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Twala Arone ni anenyi a malunga hamwe nenyi, ni e mazalo, ni e maji a kuwayisa no, ni kuji ya ngombe wa mulambu ha shili, ni kuji a mapanga aali, ni matonga wa mbolo kuyishi futunwiso.

³ Ukakungulule chikungulwila cheswe ku chikolo cha mbalaka ya chikungulwila.

⁴ Mose yalinga chize Yehova hamutuma, mba chikungulwila chaswile ku chikolo cha mbalaka ya chikungulwila.

⁵ Mose yamba ku chikungulwila ngwenyi, Chuma chino Yehova hachituma tuchilinge.

⁶ Mba Mose yaneha Arone ni anenyi a malunga, yaasanyisa ni meya,

⁷ yamujika che chikuto, yamujichika we muya wa ponda, yamusa lie hina lia ngungu, ni ye efode, yamujichikayo ni muya wa ponda wa ulangaji wa ku efode.

⁸ Yamusa che chipwiko, mba mu chipwiko yasa Urimi ni Tumimi.

⁹ Yamusa kapusa ha mutwe wenyi, mba ha kapusa kulutwe wasele chipenya cha oru, che chipangula chisandu chizechene ngwe Yehova watumine Mose.

¹⁰ Mba Mose wanjile maji a kuwayisa no, yawayisa tabernakulu ni yize yeswe yilimo, yayisela ku usandu.

¹¹ Yasapwila amwe ha chilumbilo yisuho shimbiali. Yawayisa chilumbilo ni yikashi yacho yeswe, ni lumbasia ni nganda yalwo akayisele ku usandu.

¹² Yazujila amwe maji a kuwayisa no ha mutwe wa Arone. Yamuwayisa akamusele ku usandu.

¹³ Mose yaneha ana ja Arone, yaajika yikuto, yaajichika miya ya ponda, yaajichika tupusa chizechene ngwe Yehova watumine Mose.

¹⁴ Mba yaneha kuji ya ngombe wa mulambu ha shili. Arone ni anenyi a malunga yasa moko jo ha mutwe wa kuji ya ngombe wa mulambu ha shili.

¹⁵ Mose yamushiha, yanda manyinga ha munwe wenyi, yaakomona ha mbinga ja chilumbilo ha kujingilika, nikupemesa chilumbilo. Yazujila manyinga ku shina lia chilumbilo nikuchisela ku usandu, kuchifukila shili.

¹⁶ Yanda maji eswe a ha yingambiangambia, ni ha liayi, ni njiso jiali hamwe ni maji jaho, ayo Mose yayilumba ha chilumbilo.

¹⁷ Alioze mwe kuji, ni kupu lienyi, ni yifwo yenyi, ni ufwachi wenyi, ayo yayocha ni kahia haze lia chilombo chizechene ngwe Yehova watumine Mose.

¹⁸ Mba yakunjika kuji ya panga ha mulambu wa kulumba. Arone ni anenyi a malunga yasa moko jo ha mutwe wa kuji.

¹⁹ Mose yamushiha, yasapwila manyinga kwa kujingilika ha chilumbilo.

²⁰ Muze hahanwona mwe kuji ya panga Mose walumbile mutwe ni yipinji ni maji.

²¹ Muze hakosa yingambiangambia ni molu mu meya, mba Mose yalumba mwe kuji ya panga mweswe ha chilumbilo akapwe mulambu wa kulumba wa lupembo mupema, mulambu wa kahia kuli Yehova, chizechene ngwe Yehova watumine Mose.

²² Mba yakunjika kuji ya panga mukwo te yoze wa kwatumbikila ku usasendote. Arone ni anenyi a malunga yasa moko jo ha mutwe wa kuji.

²³ Mose yamushiha, yanda amwe manyinga yaakomona ha songo lia twitwi lia chindume lia Arone, ni ha munwe wa shina wa kwoko lienyi lia chindume, ni ha munwe wa shina wa kulu lienyi lia chindume.

²⁴ Yaneha ana ja Arone a malunga, mba Mose yakomona amwe manyinga ha masongo ja matwi jo a chindume, ni ha minwe ya shina ya moko jo a chindume, ni ha minwe ya shina ya molu jo a chindume. Mba Mose yasapwila manyinga kwa kujingilika ha chilumbilo.

²⁵ Mba yanda e maji, ni muchila wa maji, ni maji eswe a ha yingambiangambia, ni maji a ha liayi, ni njiso jeswe jiali ni maji jaho, ni chilama cha chindume.

²⁶ Ha mutonga wa mbolo yize kuyishi futunwiso yatwama kumeso ja Yehova yanda chandanda chimuwika kuchishi futunwiso ni chandanda chimuwika cha mbolo ya maji, ni likemba limuwika. Yayisa ha maji ni ha chilama cha chindume.

²⁷ Ayo yeswe yayitumbika mu moko ja Arone ni mu moko ja anenyi a malunga. O yayihungisa mulambu wa kuhungisa kumeso ja Yehova.

²⁸ Mba Mose yayichiza ha moko jo, yayilumba ha chilumbilo hamuwika ni mulambu wa kulumba yikapwe mulambu wa kutumbikila ku usasendote, lupembo mupema, mulambu wa kahia kuli Yehova.

²⁹ Mose yanda lie pambo yalihungisa mulambu wa kuhungisa kumeso ja Yehova. Liapwile lia mbala lia Mose lia ku kuji ya panga, mulambu wa kutumbikila ku usasendote, chizechene ngwe Yehova watumine Mose.

³⁰ Mba Mose yanda chihanda cha maji a kuwayisa ni chihanda cha manyinga chapwile ha chilumbilo, yasapwila hali Arone ni ha mazalo jenyi, ni hali anenyi a malunga, ni ha mazalo jo hamwe nenyi. Chocho yasela ku usasendote Arone ni mazalo jenyi, ni anenyi a malunga ni mazalo jò hamwe nenyi.

³¹ Mba Mose yamba kuli Arone ni anenyi a malunga ngwenyi, Telekenu ye yifwo ku chikolo cha mbalaka ya chikungulwila nukayilie kuze kwene hamuwika ni mbolo yize yili mu mutonga wa milambu ya kulitumbikila ku usasendote, ngwe nanutumine ngwami, Arone ni anenyi a malunga akayilie.

³² Chize muchisala cha ku yifwo ni mbolo nukachoche ni kahia.

³³ Kanda nutuhuka ku chikolo cha mbalaka ya chikungulwila ndo matangwa shimbiali, ndo matangwa jenu ja kutumbikila ku usasendote hahwa. Mumu matangwa shimbiali makahwa ha kunusela ku usasendote.

³⁴ Chize halinga musono Yehova wachitumine cha kunufukila shili.

³⁵ Kwe ku chikolo cha mbalaka ya chikungulwila munukatwama matangwa shimbiali, mwalwa ni ufuku, ni kufunga chiyulo cha Yehova kuchina munufwa, mumu chocho angutumine.

³⁶ Chocho Arone ni anenyi a malunga alingile yuma yeswe Yehova watumine Mose.