Alevi 7 - MUKANDA USANDU WA ZAMBI 1975

¹ Shimbi ya mulambu wa uhie, yino. Wapwa usandu Wahiana.

² Kuze akushihila mulambu wa kulumba, kwenako akashihile mulambu wa uhie. Manyinga jawo akaasapwile kwa kujingilika ha chilumbilo.

³ Akatambule maji eswe, muchila wa maji, ni maji a ha yingambiangambia,

⁴ je njiso jeswe jiali ni maji jaho a ku mialangwe, ni maji a ha liayi akaachize hamwe ni njiso.

⁵ Mwe sasendote makayilumba ha chilumbilo, mulambu wa kahia kuli Yehova, mulambu wa uhie.

⁶ Malunga eswe hakachi ka asasendote mahasa kuulia. Makaulia homa hasandu, wapwa usandu Wahiana.

⁷ Mulambu wa uhie wapwa chizechene ngwe mulambu ha shili. Shimbi yimuwika yikwete; muupwa wa mbala wa sasendote yoze mafuka nawo shili.

⁸ Sasendote mweswe matambula mulambu wa kulumba hali umwe, akazuke lie kupu lia mulambu wa kulumba uze hatambula.

⁹ Mba mulambu weswe wa wunga wa kwocha mu forno, hanji wa kulinga mu chikango, hanji mu forma muukapwa wa mbala wa sasendote yoze makaulambula.

¹⁰ Mulambu weswe wa wunga chipwe wa kuchinga ni maji chipwe umu, ukapwe wa ana eswe a Arone, mweswawo mutu ni mutu.

¹¹ Yino ye shimbi ya chitapo cha mulambu wa sambukila mutu matambula kuli Yehova.

¹² Nyi makaulambula ha kusakwila, akatambule hamwe ni chitapo cha kusakwila yandanda kuyishi futunwiso, ya kuchinga ni maji, ni malikemba keshi futunwiso a kulembula ni maji, ni yandanda ya wunga wafufunuka, ya pwocha ni maji.

¹³ Helu lia yandanda akalambule mbolo ja futunwiso hamwe ni chitapo cha mulambu wenyi wa sambukila ha kusakwila.

¹⁴ Mba akalambule umuwika ukapwe mulambu wa kuzundula kuli Yehova. Muukapwa wa mbala wa sasendote mukwa kusapwila manyinga a mulambu wa sambukila.

¹⁵ Yifwo ya chitapo cha mulambu wa sambukila ha kusakwila, akayilie tangwa lize liene haulambula. Kanda ahichika nichimwe chihanda chayo chikasale ndo chimene.

¹⁶ Nyi chitapo cha mulambu wenyi muchikapwa cha chilakenyo, hanji cha vumbi, akachilie tangwa lize liene hachilambula, mu kucha nawa makalia chize chasala.

¹⁷ Alioze chize cha yifwo ya chitapo chasala ndo tangwa liamuchitatu makachocha ni kahia.

¹⁸ Yifwo yimwe ya chitapo cha mulambu wa sambukila makayilia ha tangwa liamuchitatu, kanda ayitambula; kanda ayalula kuli mukwa kulambula, muyikapwa chuma cha luchisa. Mweswe makayilia makambata uhenge wenyi.

¹⁹ Yifwo yize muyikakwata ha chuma cha luchisa kanda ayilia, akayoche ni kahia, alioze mweswe kanapeme mahasa kulia ye yifwo.

²⁰ Alioze mweswawo makalia yifwo ya chitapo cha mulambu wa sambukila wa Yehova shimbu kali ni luchisa, makamuteta kuli atu jenyi.

²¹ Nyi umwe makakwata chimwe cha luchisa, chipwe luchisa wa mutu, hanji kashitu wa luchisa, hanji luchisa wa lwaji, mba chocho makalia yifwo ya chitapo cha mulambu wa sambukila wa Yehova, makamuteta kuli atu jenyi.

²² Yehova yamba kuli Mose ngwenyi,

²³ Amba kuli A-Izalele ngwe, Kanda nulia maji, apwe a ngombe, apwe a panga, apwe a pembe.

²⁴ Maji a kashitu yoze malifwila, hanji maji a kashitu hamushiha kuli ngongo munulinga no cheswacho nunazange, alioze kanda nwalia, ka.

²⁵ Mumu mweswawo makalia maji a kuli kashitu wa kulambula ni kahia kuli Yehova kumakamuteta kuli atu jenyi.

²⁶ Chikwo nawa mu mazuwo jenu eswe kanda nulia manyinga niamwe, apwe a kajila hanji a kashitu.

²⁷ Yoze makalia manyinga eswo, makamuteta kuli atu jenyi.

²⁸ Yehova yamba kuli Mose ngwenyi,

²⁹ Amba kuli A-Izalele ngwe, Mweswe matambula chitapo cha mulambu wa sambukila kuli Yehova akanehe mulambu wenyi kuli Yehova wa ku chitapo cha mulambu wa sambukila.

³⁰ Akanehe ni moko jenyi mwene milambu ya kahia kuli Yehova. Akanehe maji hamwe ni pambo hanga akahiingise ye pambo mulambu wa kuhungisa kumeso ja Yehova.

³¹ Sasendote akalumbe e maji ha chilumbilo, alioze pambo mulikapwa lia mbala lia Arone ni anenyi a malunga.

³² Mba chilama cha chindume munukahana kuli sasendote chikapwe mulambu wa kuzundula wa ku yitapo ya milambu yenu ya sambukila.

³³ Hakachi ka ana ja Arone yoze makalambula manyinga ni maji a milambu ya sambukila, chilama cha chindume muchikapwa nichenyi.

³⁴ Mumu pambo lia kuhungisa ni chilama cha kuzundula ngunatambula kuli A-Izalele ku yitapo ya milambu yo ya sambukila, hingunayihana kuli sasendote Arone ni anenyi a malunga, yikapwe yihanda yo ya mutolo ya kuli A-Izalele.

³⁵ Chino muchipwa chihanda cha Arone ni anenyi a malunga, cha ku milambu ya Yehova ya kulumba ni kahia, ha tangwa lize aakunjikile kuli Yehova akamulingile usasendote.

³⁶ Yehova watumine A-Izalele akaahecho ha tangwa lize waawayishile ni maji; chiyulo cha mutolo ndusu yisemuko yo yeswe.

³⁷ Yino ye shimbi ya mulambu wa kulumba, ni ya mulambu wa wunga, ni ya mulambu ha shili, ni ya mulambu wa uhie, ni ya kulitumbikila, ni ya chitapo cha mulambu wa sambukila,

³⁸ yize Yehova yatuma Mose ha mulundu wa Sinai tangwa lize atumine A-Izalele akalambule milambu yo kuli Yehova mu puya ya Sinai.