Alevi 6 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Nyi umwe mavulumuna akapwe ni mutonga kuli Yehova, hanji ha kwonga mukwo ha kutwala ku chifungo, hanji kapopo, hanji kuhupa, hanji hapinjisa mukwo;

³ hanji hawana chuma chatokele mba hahanjika mahuza nikulishinga ni mahuza, mu chuma cheswacho cha yino yeswe mutu malinga nikuvulumuna,

⁴ mba nyi havulumuna, hahia, kumakahilwisa chuma chize hahupa, hanji chuma hatambula ku upinjiso, hanji kapopo amukunjikile, hanji chuma chatokele iye hachiwana,

⁵ hanji chuma cheswacho halishingilacho ni mahuza, akachihilwise cheswe nikuweza helu nawa chihanda chamuchitano cha ndando. Akachihane kuli mwenyacho ha tangwa lia kuhia chenyi.

⁶ Akanehe kuli Yehova mulambu wenyi wa uhie kuji ya panga wa ku chendo, yoze keshi chipa, nikulita ni ndando makasela ha mulambu wa uhie kuli sasendote.

⁷ Mwe sasendote akamufukile shili yenyi kumeso ja Yehova ha chuma cheswacho halinga ni uhie, akamukone-kenecho.

⁸ Yehova yamba kuli Mose ngwenyi,

⁹ Amba Arone ni anenyi a malunga ngwe, Shimbi ya mulambu wa kulumba yino; mulambu wa kulumba muukapwa ha kunyi jawo ha chilumbilo Ufuku weswe ndo chimene. Kahia ka ha chilumbilo mukayilaho.

¹⁰ Mba sasendote akazale chikuto chenyi cha hina lipema litoma. Akazale kaputula kenyi wa hina lipema litoma ha mujimba wenyi. Akande uto wa mulambu wa kulumba wasala ku kahia ka ha chilumbilo, akautumbike ku shina lia chilumbilo.

¹¹ Akazule mazalo jenyi, akazale akwo eka, akatwale uto haze lia chilombo kuma kupema.

¹² Alioze kahia ka ha chilumbilo kumukayilaho, kanda akajima, mwe sasendote akaseho kunyi chimene ha chimene. Akaseho mulambu wa kulumba mu ngango jawo. Akalumbeho nawa maji a milambu ya sambukila.

¹³ Kahia mukakayila ha chilumbilo matangwa eswe nikujima, ka.

¹⁴ Shimbi ya mulambu wa wunga yino. Ana ja Arone akaulambule kumeso ja Yehova kulutwe lia chilumbilo.

¹⁵ Akazo-moneko kwoko lienyi lia wunga wafufunuka wa mulambu wa wunga, ni maji jawo, ni libano yeswe yili ha mulambu wa wunga, akayilumbe ha chilumbilo yikapwe ya lupembo mupema, Chiwulwiso chawo kuli Yehova.

¹⁶ Chize muchisalaho Arone ni anenyi a malunga akachilie. Akachilie kuchishi futunwiso kuma kusandu, akachilie mu yize ya mbalaka ya chikungulwila.

¹⁷ Kanda akachocha ni futunwiso. Ngunachihana chikapwe chihanda* cho cha milambu yami ya kahia. Chuma chisandu chahiana, chimuwika ni mulambu ha shili, ni mulambu wa uhie.

¹⁸ Malunga eswe hakachi ka ana ja Arone makachilia, chihanda cho cha mutolo ndusu yisemuko yenu yeswe cha ku milambu ya kahia kuli Yehova. Mweswe makayikwata makapwa musandu.

¹⁹ Yehova yamba kuli Mose ngwenyi,

²⁰ Mulambu wa Arone ni anenyi a malunga matambula kuli Yehova ha tangwa lize mamuwayisa ni maji, uno; chihanda chimuwika cha ku kumi lia yihanda ya efa ya wunga wafufunuka ukapwe mulambu wa wunga wa tangwa ha tangwa. Chihanda ha chimene, chihanda ha chingoloshi.

²¹ Mu forma ya kwochela akaulinge ni maji. Ukaunehe wa pwocha ni maji. Tuyihanda twa kwocha mulambula mulambu wa wunga, ukapwe lupembo mupema kuli Yehova.

²² Mba mwe sasendote wa kuwayisa ni maji kumusalakana hakachi ka ana jenyi akaulambule. Chino chiyulo cha mutolo—akaulumbe wupu kuli Yehova.

²³ Mulambu weswe wa wunga wa sasendote akaulumbe wupu. Keshi kuulia.

²⁴ Yehova yamba kuli Mose ngwenyi,

²⁵ Amba kuli Arone ni anenyi a malunga ngwe, Shimbi ya mulambu ha shili yino. Kuma kwa kushihila mulambu wa kulumba kwenako akashihile mulambu ha shili kumeso ja Yehova. Wapwa usandu wahiana.

²⁶ Sasendote yoze makaulambula ha shili makaulia. Kumwe kuma kusandu makaulila mu yize ya mbalaka ya chikungulwila.

²⁷ Mweswawo makakwata ku yifwo yawo makapwa musandu. Nyi masapwila manyinga jawo ha uzalo umwe, ukakose hina lize asapwilile kumwe kuma kusandu.

²⁸ Nyi hauteleka mu ndeho ya uma akayishihe. Nyi hayiteleka mu ndeho ya unengu akayicheke nikuyikosongona ni meya.

²⁹ Malunga eswe hakachi ka asasendote akaulie. Wapwa usandu Wahiana.

³⁰ Alioze kanda akalia mulambu ha shili, uze manyinga jawo haaneha mu mbalaka ya chikungulwila ha kufuka mwe muma musandu. Akawoche ni kahia.