Alevi 5 - MUKANDA USANDU WA ZAMBI 1975

¹ Nyi umwe mavulumuna, nyi hevwa liji lia kumushingisa, hapwa chela, chipwe ha kumona chipwe ha kunyingika, nyi kachilwezele, mambata uhenge wenyi.

² Nyi umwe hakwata chuma cha luchisa, chipwe mujimba wa kashitu wa luchisa yoze hafwa kulu, hanji mujimba wa chimuna wa luchisa, hanji wa mukwa kukalala wa luchisa, chipwe kachinyingikine, halichisa, hahia.

³ Chipwe hakwata ku luchisa wa mutu, luchisa wenyi mweswawo wa kuchisa mutu, alioze kachinyingikine, muze machinyingika, mba hahia.

⁴ Chipwe umwe halipupula kulishinga ni kanwa lienyi kulinga chipi hanji chipema, cheswacho mutu malipupula kwamba ni shingo, hanji kachinyingikine, muze machinyingika hahila chimwe hakachi ka yuma yino.

⁵ Mba muze mahila chimwe cha yuma yino akashikise chize havulumuna.

⁶ Akanehe kuli Yehova mulambu wa uhie ha mutonga uze havulumuna, chihwo wa ku chendo, chipwe panga chipwe pembe, akapwe mulambu ha shili. Mwe sasendote akamufukile shili yenyi.

⁷ Nyi kahashile kuneha mwana-panga akanehe kuli Yehova mulambu wa uhie ha mutonga havulumuna, tutele aali, hanji ana-a-membe aali, umwe akapwe mulambu ha shili, mukwo mulambu wa kulumba.

⁸ Akaanehe kuli sasendote. Iye akaliange kulambula yoze ha shili; akahonde mutwe wenyi ku mukonga alioze kanda akamupula hakachi.

⁹ Akasapwile amwe manyinga a mulambu ha shili ha lumbu lia chilumbilo. Manyinga akwo asala akaazujile ku shina lia chilumbilo—mulambu ha shili.

¹⁰ Akatambule wamuchiali akapwe mulambu wa kulumba, nikulita ni shimbi. Sasendote akamufukile shili yenyi havulumuna, akamukonekeneyo.

¹¹ Nyi kahashile kuneha tutele aali, hanji ana-a-membe aali, mba akanehe mulambu wenyi ha uhie wenyi, ngwami, Chihanda chimuwika cha ku kumi lia yihanda ya efa ya wunga wafufunuka ukapwe mulambu ha shili. Kanda asaho maji niamwe, chipwe libano, mumu mulambu ha shili.

¹² Akaunehe kuli sasendote, mba sasendote mazomonako kwoko lienyi likapwe Chiwulwiso, akaulumbe ha chilumbilo nikulita ni milambu ya kahia kuli Yehova—mulambu ha shili.

¹³ Mba sasendote akamufukile mutonga wenyi havulumuna mu chuma cheswacho cha yino, amukonekenewo. Wunga weswe wasala muukapwa wa sasendote, ngwe mulambu wa wunga.

¹⁴ Yehova yamba kuli Mose ngwenyi,

¹⁵ Nyi umwe makavulumuna mutonga wa susumuku mu chuma chisandu cha Yehova, akanehe kuli Yehova mulambu wa uhie, kuji ya panga keshi chipa, wa kuchiza ku chendo nikulita ni ndando yize musela mu shekele ja prata, te shekele ya muma musandu, akapwe mulambu wa uhie.

¹⁶ Akawezeko nawa ha chize hahengesa mu yuma yisandu, akawezeko chihanda chamuchitano cha ndando akachihane kuli sasendote. Mba sasendote akamufukile shili yenyi ni panga wa mulambu wa uhie, amukonekeneyo.

¹⁷ Nyi umwe mavulumuna ha kulinga chuma chimwe cha yize Yehova hanakanjisa, chipwe kachinyingikine, hindu hahia, mambata uhenge wenyi.

¹⁸ Akanehe kuli sasendote kuji ya panga keshi chipa, wa kuchiza mu chendo, nikulita ni ndando musela ha mulambu wa uhie. Mba sasendote akamufukile mutonga wenyi wa susumuku, te kachinyingikine, amukonekenewo.

¹⁹ Wapwa mulambu wa uhie, se hapwa ni uhiso kumeso ja Yehova.