Alevi 4 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Amba kuli A-Izalele ngwe, Nyi umwe makavulumuna mutonga wa susumuku mu yuma yeswayo yize Yehova hanayikanjisa mba iye hayilinga;

³ nyi sasendote wa kuwayisa ni maji makavulumuna nikukoka uhie hali atu, akatambule kuli Yehova ha mutonga wenyi uze havulumuna chimbembe wa kuji keshi chipa, akapwe mulambu ha shili.

⁴ Akatwale mwe kuji ku chikolo cha mbalaka ya chikungulwila kumeso ja Yehova. Akase kwoko lienyi ha mutwe wa kuji akashihe mwe kuji kumeso ja Yehova.

⁵ Sasendote wa kuwayisa ni maji akande amwe manyinga a mwe kuji akaanehe ku mbalaka ya chikungulwila.

⁶ Mba sasendote akachupike munwe wenyi mu manyinga akasapwile amwe manyinga yisuho shimbiali kumeso ja Yehova kulutwe lia chikalakala cha hina cha muma musandu.

⁷ Sasendote akakomone amwe manyinga ha mbinga ja chilumbilo cha insensu ya lupembo mupema kumeso ja Yehova, chili mu mbalaka ya chikungulwila. Mba manyinga eswe asala a mwe kuji makaazujila ku shina lia chilumbilo cha milambu ya kulumba chili ku chikolo cha mbalaka ya chikungulwila.

⁸ Maji eswe a mwe kuji wa mulambu ha shili akamuchizo, ni maji a kufuka yingambiangambia, ni maji eswe a ku yingambiangambia,

⁹ ni njiso jeswe jiali ni maji jaho a ku mialangwe, ni maji a ha liayi, akaachize hamuwika ni njiso,

¹⁰ chizechene ngwe akwachiza kuli ngombe wa chitapo cha mulambu wa sambukila. Sasendote akayilumbe ha chilumbilo cha milambu ya kulumba.

¹¹ Kupu lia mwe kuji, ni yifwo yenyi yeswe, ni mutwe wenyi, ni molu jenyi, ni yingambiangambia yenyi ni ufwachi wenyi,

¹² mwe kuji mweswe akamumbate haze lia chilombo kuma kupema ku chichilila cha uto akamwoche ni kahia ha kunyi. Ku chichilila cha uto akamwoche.

¹³ Nyi kachi chikungulwila cheswe cha Izalele muchikavulumuna mutonga wa susumuku, che chuma chinaswame ku meso ja chikungulwila, hanji halinga yimwe yuma Yehova hanayikanjisa, mba hahia,

¹⁴ muze mutonga havulumuna hiwasoloka, mba akwa chikungulwila akatambule chimbembe wa kuji akapwe mulambu ha shili. Akamunehe ku mbalaka ya chikungulwila.

¹⁵ Makulwana a chikungulwila akase moko jo ha mutwe wa mwe kuji kumeso ja Yehova, akashihe mwe kuji kumeso ja Yehova.

¹⁶ Mba sasendote wa kuwayisa ni maji akanehe manyinga a mwe kuji ku mbalaka ya chikungulwila.

¹⁷ Mwe sasendote akachupike munwe wenyi mu manyinga akaasapwile yisuho shimbiali kumeso ja Yehova kulutwe lia chikalakala cha hina.

¹⁸ Akakomone amwe manyinga ha mbinga ja chilumbilo chili kumeso ja Yehova mu mbalaka ya chikungulwila. Manyinga eswe asala akaazujile ku shina lia chilumbilo cha milambu ya kulumba chili ku chikolo cha mbalaka ya chikungulwila.

¹⁹ Maji eswe akaachizeho, akaalumbe ha chilumbilo.

²⁰ Chocho akalinge ni mwe kuji, chizechene alingile ni mwe kuji wa mulambu ha shili chocho akalinge ni yono. Mwe sasendote akafuke shili yo mba makaakonekenayo.

²¹ Akambate mwe kuji haze lia chilombo, akamwoche ngwe ochele mwe kuji mutangu, mumu mulambu ha shili ya chikungulwila.

²² Muze mukwa kuyula makavulumuna mutonga wa susumuku ha chuma cheswacho cha yuma yize Yehova Zambi yenyi hanayikanjisa, mba hahia,

²³ nyi mutonga uze havulumuna hamulwezawo, akanehe pembe ha mulambu wenyi, kuji keshi chipa.

²⁴ Akase kwoko lienyi ha mutwe wa pembe akamushihe kuze akushiha mulambu wa kulumba kumeso ja Yehova. Wapwa mulambu ha shili.

²⁵ Sasendote makanda amwe manyinga a mulambu ha shili ha munwe wenyi, akaakomone ha mbinga ja chilumbilo cha milambu ya kulumba, mba manyinga asala akaazujile ku shina lia chilumbilo cha milambu ya kulumba.

²⁶ Maji jaho eswe akaalumbe ha chilumbilo ngwe akulumba maji a yitapo ya milambu ya sambukila. Chocho mwe sasendote akamufukile shili yenyi hanga amukonekeneyo.

²⁷ Nyi umwe mutu mweswawo nuvulumuna mutonga wa susumuku mukulinga chuma cheswacho cha yuma yize Yehova hanayikanjisa, mba hahia,

²⁸ nyi mamulweza mutonga wenyi havulumuna, akanehe mulambu wenyi, chihwo cha pembe keshi chipa ha mutonga wenyi havulumuna.

²⁹ Akase kwoko lienyi ha mutwe wa mulambu ha shili, akashihe we mulambu ha shili kuze akushiha mulambu wa kulumba.

³⁰ Sasendote makanda amwe manyinga ha munwe wenyi akaakomone ha mbinga ja chilumbilo cha milambu ya kulumba, mba manyinga eswe asala akaazujile ku shina lia chilumbilo.

³¹ Maji jawo eswe akaachizeho ngwe akuchiza maji eswe a yitapo ya milambu ya sambukila. Mwe sasendote akaalumbe ha chilumbilo akapwe lupembo mupema kuli Yehova, mba sasendote akamufukile shili yenyi hanga amukonekeneyo.

³² Nyi makaneha mwana-panga akapwe mulambu ha shili akamunehe chihwo keshi chipa.

³³ Akase kwoko lienyi ha mutwe wa mulambu ha shili, akamushihe kuze akushiha mulambu wa kulumba, akapwe mulambu ha shili.

³⁴ Mwe sasendote makanda ha munwe wenyi amwe manyinga a mulambu ha shili akaakomone ha mbinga ja chilumbilo cha milambu ya kulumba, mba manyinga eswe asala akaazujile ku shina lia chilumbilo.

³⁵ Maji jawo eswe akaachizeho ngwe maji a mwana-panga akwachiza ku yitapo ya milambu ya sambukila. Mba sasendote akaalumbe ha chilumbilo nikulita ni milambu ya kahia kuli Yehova. Chocho mwe sasendote akamufukile shili yenyi hanga amukonekeneyo.