Alevi 3 - MUKANDA USANDU WA ZAMBI 1975

¹ Nyi kachi mulambu wenyi muukapwa chitapo cha sambukila, kachi matambula wa ngombe, chipwe kuji, chipwe chihwo, akamutambule keshi chipa kumeso ja Yehova.

² Akase kwoko lienyi ha mutwe wa mulambu wenyi, akamushihe ku chikolo cha mbalaka ya chikungulwila. Mba asasendote, ana ja Arone, makasapwila e manyinga kwa kujingilika ha chilumbilo.

³ Akatambule mulambu wa kahia kuli Yehova wa ku chitapo cha mulambu wa sambukila, ngwami, maji a kufuka yingambiangambia, ni maji eswe a ku yingambiangambia,

⁴ ni njiso jeswe jiali ni maji jaho a ku mialangwe, ni maji a ha liayi, akaachize hamuwika ni njiso.

⁵ Ana ja Arone, akayilumbe ha chilumbilo ha mulambu wa kulumba uze uli ha kunyi ha kahia, ukapwe mulambu wa kahia, wa lupembo mupema kuli Yehova.

⁶ Nyi mulambu wenyi wa chitapo cha sambukila kuli Yehova muukapwa wa panga, hanji pembe, chipwe kuji, chipwe chihwo, akamutambule keshi chipa.

⁷ Nyi matambula mwana-panga akamutambule kumeso ja Yehova.

⁸ Akase kwoko lienyi ha mutwe wa mulambu wenyi, akamushihe kulutwe lia mbalaka ya chikungulwila, mba ana ja Arone akasapwile manyinga jenyi kwa kujingilika ha chilumbilo.

⁹ Akatambule mulambu wa kahia kuli Yehova wa ku chitapo cha mulambu wa sambukila, ngwami, maji jaho, ni muchila wa maji wa muwundu, akauchize kwe ku mitanda, ni maji a kufuka yingambiangambia, ni maji eswe a ku yingambiangambia,

¹⁰ ni njiso jeswe jiali ni maji jaho a ku mialangwe, ni maji a ha liayi, akaachize hamuwika ni njiso.

¹¹ Sasendote akayilumbe ha chilumbilo, che kulia cha ku mulambu wa kahia kuli Yehova.

¹² Nyi mulambu wenvi muukapwa wa pembe akamutambule kumeso ja Yehova.

¹³ Akase kwoko lienyi ha mutwe wa mulambu akamushihe kulutwe lia mbalaka ya chikungulwila. Ana ja Arone akasapwile manyinga jenyi kwa kujingilika ha chilumbilo.

¹⁴ Mba makalambulako mulambu wenyi ukapwe mulambu wa kahia kuli Yehova, ngwami, maji a kufuka yingambiangambia, ni maji eswe a ku yingambiangambia,

¹⁵ ni njiso jeswe jiali ni maji jaho a ku mialangwe, ni maji a ha liayi, akaachize hamuwika ni njiso.

¹⁶ Sasendote akayilumbe ha chilumbilo, che kulia cha ku mulambu wa kahia wa lupembo mupema. Maji eswe a mbala a Yehova.

¹⁷ Chino chikapwe chiyulo cha mutolo mu mazuwo jenu ndusu yisemuko yenu yeswe ngwami, Kanda nulia chipwe maji chipwe manyinga.