Alevi 27 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Amba kuli A-Izalele ngwe, Muze umwe malakenya chilakenyo kuli Yehova ha kutwala kuli atu nikulita ni ndando yize munutongola,

³ ndando yize munusela hali lunga chize ku makumi aali a miaka ndo ku makumi asambano a miaka, muyipwa makumi atano a shekele ja prata nikulita ni shekele ya muma musandu.

⁴ Nyi mapwa pwo ndando munusela makumi atatu a shekele.

⁵ Nyi mutu mapwa chize ku miaka yitano ndo ku makumi aali a miaka munumusela ndando, hali lunga makumi aali a shekele, hali pwo kumi lia shekele.

⁶ Nyi mapwa chize ku kakweji umuwika ndo ku miaka yitano munumusela ndando, hali lunga shekele jitano ja prata, hali pwo shekele jitatu ja prata.

⁷ Nyi hahiana makumi asambano a miaka munumusela ndando, hali lunga kumi lia shekele ni shekele jitano; hali pwo kumi lia shekele.

⁸ Nyi mutu mapwa chiswale naye kufweta ndando yize munumusela, akanehe mwe mutu kuli sasendote, mba sasendote mamusela ndando. Mamusela ndando nikulita ni kuhasa cha yoze walakenyene chilakenyo.

⁹ Ha kutwala kuli chimuna yoze mutu matambula mulambu kuli Yehova, o eswe mutu mahana kuli Yehova hapwa asandu.

¹⁰ Kanda asalakanyisa mupema hali mupi, hanji mupi hali mupema, chipwe kwasumbakenya. Nyi masalakanyisa chimuna hali chimuna, mba mwe chimuna ni yoze asalakanyisanga kumapwa asandu.

¹¹ Nyi mapwa chimuna wa luchisa yoze keshi kulambula mulambu kuli Yehova, mba mwe mutu maneha chimuna kuli sasendote.

¹² Sasendote mamusela ndando nikulita ni upeme wenyi hanji upi wenyi. Ndando yeswayo sasendote mamusela yenayo lume.

¹³ Alioze nyi mazanga kumukula, chamutamba kuwezaho chihanda cha tano ku ndando yenyi.

¹⁴ Muze mutu masela zuwo lienyi lisandu kuli Yehova sasendote masela ndando nikulita ni upeme walio hanji upi walio. Ndando malisela kuli sasendote, yenayo lume.

¹⁵ Nyi mukwa kusela ku usandu lie zuwo mazanga kulikula maweza chihanda cha tano ku ndando ya zuwo, mba mulipwa nilienyi.

¹⁶ Nyi umwe masela chihanda cha chihinga chenyi cha chifuchi chisandu kuli Yehova, mba ndando munusela muyilita ni mbuto yacho. Mavu aze malita nikulima njongo ya homere yimuwika ya sevada munusela ndando ya makumi atano a shekele ja prata.

¹⁷ Nyi hasela ku usandu munda wenyi chize ku mwaka wa uwahililo Utwame chizechene ni ye ndando yeswe nwasele.

¹⁸ Alioze nyi masela ku usandu munda wenyi kulutwe lia mwaka wa uwahililo, mwe sasendote mahila ndando yawo mu mbongo nikulita ni miaka yize yasala ndo ku mwaka wa uwahililo. Mba machitepulula ku ndando yenu.

¹⁹ Nyi mukwa kusela ku usandu munda mazanga kuukula maweza chihanda cha tano cha ndando ya mbongo, mba muusala niwenyi.

²⁰ Alioze nyi kazangile kukula munda, hanji haulanjisa kuli mutu weka mba kechi kuukula nawa.

²¹ Hindu munda uze muze mautusula ha mwaka wa uwahililo muukapwa usandu kuli Yehova. Wapwa munda wa kutumbika, sasendote mauzuka.

²² Nyi masela usandu kuli Yehova munda wa kulanda, hi chihanda cha chihinga chenyi ko,

²³ mwe sasendote malula ndando yawo ndo ku mwaka wa uwahililo, mba ha tangwa lize mwe mutu mahana ndando nwasele, chuma chisandu kuli Yehova.

²⁴ Ha mwaka wa uwahililo munda muuhiluka kuli yoze waulanjishile yoze waupichile wa chihinga.

²⁵ Ndando yeswe munusa muyipwa nikulita ni shekele ya muma musandu. Makumi aali a ngera muyifwika shekele yimuwika.

²⁶ Kapula-jimo wa chimuna se wapwa kapula-jimo, wa mbala wa Yehova, kashika niumwe mahasa kumusela ku usandu. Apwe wa ngombe, apwe wa panga, wa mbala wa Yehova.

²⁷ Nyi wapwa chimuna wa luchisa mamulanda ha ndando munumusela nikuweza chihanda cha tano. Nyi kamukulile munumulanjisa ha ndando yenyi.

²⁸ Alioze nichimwe chuma lunga machitumbikila hakachi ka yuma yenyi kuli Yehova, kechi kuhasa kulanda hanji kukula, chipwe mutu, chipwe chimuna, hanji cha ku minda yenyi ya kuhinga. Yuma yeswe ya kutumbikila ni shingo muyipwa yisandu yahiana kuli Yehova.

²⁹ Niumwe hamutumbikila ni shingo kumwonwona hakachi ka atu kanda amukula. Akamushihe lume.

³⁰ Chihanda cha kumi cha ha mavu, chipwe cha mbuto ya mavu, chipwe cha mihuko ya mitondo, cha mbala cha Yehova. Muchipwa chisandu kuli Yehova.

³¹ Nyi mutu mazanga kukula cha ku chihanda chenyi cha kumi akawezeho chihanda cha tano.

³² Chihanda cha kumi cha ngombe ni mapanga ni pembe eswe, chimuna mweswe wamuchikumi wa kwalula kuli kafunga mapwa musandu kuli Yehova.

³³ Niumwe mahasa kumuhula nyi mupema nyi mupi, chipwe kusumbakenya kechi kumusumbakenya. Nyi mamusumbakenya mba ni mwe chimuna ni yoze wa kusumbakenya eswe mapwa asandu, kechi kumukula.

³⁴ Jino je shimbi Yehova watuminyine A-Izalele kuli Mose ku mulundu wa Sinai.