Alevi 26 - MUKANDA USANDU WA ZAMBI 1975

¹ Kanda nulilingila tuponya. Kanda numika kulifwa chimwe cha kwola hanji liwe limwe. Kanda numika liwe lia kwola mu chifuchi chenu. Kanda nulihetamina ku yino yuma mumu yami Yehova Zambi yenu.

² Fungenu Sambata jami. Lemesenu zuwo liami lisandu. Yami Yehova.

³ Nyi munwenda nikulita ni yiyulo yami ni kufunga shimbi jami kujilinga,

⁴ mba mungunwaha vula ha tukweji twenyi, ni e mavu mahana mbuto, ni mitondo yeswe muyihana mihuko yayo.

⁵ Mwaka wa kuzungula muuheta ndo ku mwaka wa kuhela uva. Mwaka wa kuhela uva muuheta ndo ku mwaka wa kukuwa mbuto. Munukalia nikukuta. Munukatwama mu chifuchi chenu, ni woma ka.

⁶ Mungunwaha uhwimino mu chifuchi. Munupomba kanawa, niumwe manuvwisa woma. Munguchiza ngongo api mu chifuchi. Chipwe katana ka jita kechi kupalika mu chifuchi chenu.

⁷ Munuhuma akwa kole jenu; kumafwa ni katana kumeso jenu.

⁸ Atano a yenu mahuma kulakaji lia atu. Kulakaji lia yenu mahuma kumi lia tununu twa atu. Akwa kole jenu kumafwa kumeso jenu ni katana.

⁹ Mungununyonga; mungunupwisa semi; mungunwokesa. Mungukolesa usendo wami ni yenu.

¹⁰ Munukalia yuma ya kutulika shimbu linene. Munumbila yikulu hanga nukasweke yaha.

¹¹ Mungutwama hakachi kenu; mbunge yami kuyichi kunuvwila kole.

¹² Mungwenda hakachi kenu. Mungupwa Zambi yenu, ni yenu munupwa atu jami.

¹³ Yami Yehova Zambi yenu. Nanuchijile ku chifuchi cha Engitu hanga nukatusuke ku upinji wo. Namakwine mitondo ya kúli jenu. Nanwendesele nikwoloka.

¹⁴ Alioze nyi kunuchi kungwivwa, hanji kunuchi kulinga shimbi jino jeswe,

¹⁵ nyi munulelesa yiyulo yami, hanji mbunge jenu mujivwila kupiha yize mungutuma mba kunuchi kulinga shimbi jami jeswe, alioze munutangula usendo wami,

¹⁶ chino mungulinga kuli yenu: Mungunutongwela mwongo wa susumuku, ni mukaka, ni kachiki yoze wakupokiekesa meso nikuhongesa mwono. Munukuwa mbuto yamokomoko, mumu akwa kole jenu mayilia.

¹⁷ Mungulimika ni yenu, mba manukumba kuli akwa kole jenu. Waze akunuvwila kole manuyula; munuchina chipwe niumwe kanuhangile.

¹⁸ Nyi chipwe chocho kunwanguvwile, mba mungunulamba cheka nawa yisuho shimbiali ha milonga yenu.

¹⁹ Mungumakuna kulenga chenu cha tachi. Mungwalumuna malilu ngwe utale ni mavu jenu mungwaalumuna ngwe unengu.

²⁰ Munuhwisa tachi jenu mokomoko mumu mavu kechi kuhana tachi jo, ni mitondo ya chifuchi kuyichi kuhana mihuko yayo.

²¹ Nyi hindu munwenda nikulimika ni yami nikungwivwa ka, mba mungutuma yipupu yikwo hali yenu, muyihiana ha milonga yenu yisuho shimbiali.

²² Mungutusula ngongo hakachi kenu kumakanwiya ana jenu, kumakanwonwona yimuna jenu. Kumakanutepulula hanga jila jenu jikalumuke puya.

²³ Nyi hindu chipwe ni lufumbo yono kunuchi kutewulukila kuli yami, alioze munwenda nikulimika ni yami,

²⁴ mba ni yami nawa mungulimika ni yenu. Yami mwene mungunulamba yisuho shimbiali ha milonga yenu.

²⁵ Mungutuma hali yenu katana wa kukala ha usendo. Munukunguluka mu yihunda yenu mba mungutuma misongo ya kulukumuka hakachi kenu akanukunjike kuli akwa kole jenu.

²⁶ Muze mungunuhonesa kulia chize nwafuliela, kumi lia mapwo mocha mbolo jenu mu forno yimuwika. Manuzongelajo ha pezu hindu munulia kunuchi kukuta.

²⁷ Nyi hindu kunuchi kungwivwa alioze munwenda nikulimika ni yami,

²⁸ mba mungulimika ni yenu ni ufwatulo. Mungunulamba yami mwene yisuho shimbiali ha milonga yenu.

²⁹ Munukalia yifwo ya anenu a malunga ni ya anenu a mapwo.

³⁰ Mungwonwona manangamo jenu. Mungupuzula yilumbilo yenu ya insensu. Mungulumbika mijimba ya afu jenu ha mijimba ya tuponya twenu afu, mba mbunge yami muyinuvwila kole.

³¹ Mungupwisa yihunda yenu yahululu. Mungupwisa mazuwo jenu asandu ngwe puya, mba chichi kuhumbika milambu yenu ya lupembo mupema.

³² Mungwenyeka chifuchi, chocho chipwe akwa kole jenu aze meza kutwamamo malishimwoka.

³³ Mungunumwanga hakachi ka mavungu. Mungutomona katana ka jita kunyima yenu mba chifuchi chenu muchipwa puya ni yihunda yenu muyipwa yahululu.

³⁴ Mba chifuchi chenu muchiwaha kanawa ni Sambata jacho, shimbu chinatwama kuchishi atu shimbu yenu nuli mu chifuchi cha akwa kole jenu. Chifuchi muchihwima nikuwaha ni Sambata jacho.

³⁵ Shimbu lieswe muchitwama kuchishi atu muchihwima we uhwimino kuchauwanyine mu Sambata jenu shimbu lieswe nwatwaminemo.

³⁶ Ha kutwala kuli waze akwenu masala mungutuma kulezumuka mu mbunge jo mu yifuchi ya akwa kole jo. Kuholoka cha lifwo muchiachinyisa, ngwe mutu wakuchina katana chocho machina, mba malimbuka chipwe kaahangile niumwe.

³⁷ Kumakatalinga umwe hali mukwo ngwe atu waze machina katana, chipwe kaahangile niumwe. Kunuchi kupwa ni tachi ja kumana kumeso ja akwa kole jenu.

³⁸ Munukafwa hakachi ka mavungu. Chifuchi cha akwa kole jenu muchinulia.

³⁹ Waze hakachi kenu kafwile kumakawangamina mu yifuchi ya akwa kole jenu mumu ha uhenge wo. Ha uhenge wa akako nawa kumakawangama ngwe ayo nawa.

⁴⁰ Alioze nyi mashikisa uhenge wo ni uhenge wa akako, ni mafwefwe aze alingile a kulimika ni yami, ni chize endele nikulimika ni yami,

⁴¹ chocho yami nalimikine no nikwatwala ku chifuchi cha akwa kole jo, ngwami, nyi mbunge jo ja ulima mujililelesa, mazeya ku lufumbo wami wa uhenge wo,

⁴² mba mungwiwuluka usendo wami nakolesele ni Yakomba, ni usendo nakolesele ni Izake, ni usendo nakolesele ni Apalahama. Mungwiwuluka chifuchi.

⁴³ Alioze chifuchi o machihichika chikahwime ni Sambata jacho shimbu muchipwa ngwe puya, o te keshiko. Mba mazeya ku lufumbo wami wa uhenge wo, mumu ha kulelesa shimbi jami, mbunge jo jalipihilile ni yiyulo yami.

⁴⁴ Chipwe chocho shimbu ali mu chifuchi cha akwa kole jo chichi kwalelesa, hanji kwavwila kole ngukaonwone liakulu nikutangula usendo uze nakolesele no, mumu yami Yehova Zambi yo.

⁴⁵ Alioze mumu ha mukunda wa ayo mungwiwuluka usendo uze nakolesele ni tulamba two aze nachijile ku chifuchi cha Engitu kumeso ja mavungu hanga ngukapwe Zambi yo. Yami Yehova.

⁴⁶ Yino ye yiyulo, ni ye yuma ya kutuma, ni je shimbi Yehova wasele hakachi ka iye ni A-Izalele ha mulundu wa Sinai kuli Mose.