Alevi 23 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Amba kuli A-Izalele ngwe, Yiwanyino ya kutongola ya Yehova, yize munulakenya yikapwe yikungulwila yisandu, ye yiwanyino yami ya kutongola, yino:

³ munulinga milimo ha matangwa asambano alioze liamuchishimbiali mulipwa Sambata yilemu ya kuhwima. Munupwa ni chikungulwila chisandu, kanda nulinga milimo niyimwe mumu muyipwa Sambata ya Yehova kweswako munutwama.

⁴ Yiwanyino ya Yehova ya kutongola, ye yikungulwila yisandu, munuyilakenya ha matangwa jayo ngwami, yino:

⁵ ha kakweji mutangu, ha tangwa kumi ni liamuchiwana ha chingoloshi muhapwa Chizomboka cha Yehova.

⁶ Mba ha tangwa kumi ni liamuchitano lia kakweji yomwene muhapwa chiwanyino kuli Yehova cha mbolo kuyishi futunwiso. Matangwa shimbiali munukalia mbolo kuyishi futunwiso.

⁷ Tangwa litangu munupwa ni chikungulwila chisandu. Kanda nulinga milimo yilemu niyimwe.

⁸ Alioze munuhana kuli Yehova mulambu wa kahia matangwa shimbiali, mba ha tangwa liamuchishimbiali munupwa ni chikungulwila chisandu. Kanda nulinga milimo yilemu niyimwe.

⁹ Yehova yamba kuli Mose ngwenyi,

¹⁰ Amba kuli A-Izalele ngwe, Muze mununjila mu chifuchi chize ngunanwehe, munukacha mbuto yamo, nukwete kuneha chichita cha mbuto yitangu ya kucha chenu kuli sasendote.

¹¹ Iye makahungisa che chichita kumeso ja Yehova hanga akanutambule. Ha tangwa lia kukaula Sambata machihungisa.

¹² Ha tangwa lize munuhungisa chichita nukalambule kuji ya panga wa mwaka umuwika, keshi chipa, akapwe mulambu wa kulumba kuli Yehova.

¹³ Mulambu wawo wa wunga muupwa wa yihanda yiali ya ku yihanda kumi ya njongo ya efa ya wunga wafufunuka wa kuchinga ni maji. Akaulambule ni kahia kuli Yehova ha lupembo mupema. Mulambu wawo wa kunwa ukapwe wa vinyu, chihanda chamuchiwana cha njongo ya hine.

¹⁴ Kanda nulia mbolo hanji mbuto, yipwe yumu, yipwe ya wisu, ndo tangwa lize, ndo hinwaneha mulambu wa Zambi yenu. Acho chiyulo cha mutolo ndusu yisemuko yenu yeswe kweswako munutwama.

¹⁵ Mba munwalula semana shimbiali ja muwundu chize ku tangwa lia kukaula Sambata, chize ku tangwa nwaneha chichita cha mulambu wa kuhungisa.

¹⁶ Ha kwalula makumi atano a matangwa ndo tangwa lia kukaula Sambata liamuchishimbiali nukakunjike mulambu wa wunga wa mbuto yaha kuli Yehova.

¹⁷ Munuchiza ku mazuwo jenu mbolo jiali akajihungise ja kulinga ni yihanda yiali ya ku yihanda kumi ya njongo ya efa. Jikapwe ja wunga wafufunuka, ja kwocha ni futunwiso jikapwe ja mbuto yitangu kuli Yehova.

¹⁸ Hamuwika ni mbolo munukunjika ana-mapanga shimbiali a mwaka umuwika keshi chipa, ni chimbembe wa kuji umuwika, ni kuji a mapanga aali. Akapwe mulambu wa kulumba kuli Yehova hamuwika ni mulambu wawo wa wunga, ni milambu yawo ya kunwa, te mulambu wa kahia wa lupembo mupema kuli Yehova.

¹⁹ Munulambula kuji ya pembe umuwika mulambu ha shili, ni kuji a mapanga aali a mwaka umuwika akapwe chitapo cha milambu ya sambukila.

²⁰ Mwe sasendote maahungisa hamuwika ni mbolo ya mbuto yitangu, mulambu wa kuhungisa kumeso ja Yehova, ayo hamuwika ni ana-mapanga aali. Kumuyikapwa yisandu kuli Yehova, ya mbala ya sasendote.

²¹ Mba munulakenya ha tangwa lioliene nukapwe ni chikungulwila chisandu. Kanda nulinga milimo niyimwe yilemu. Chino muchipwa chiyulo cha mutolo kweswako munutwama ndusu yisemuko yenu yeswe.

²² Muze munukacha mbuto ya mu chifuchi chenu kanda nukacha mu minda yenu ndusu ndo ku njiza. Chikwo nawa kanda nukahuhujola yize yinasala ha kucha. Munuyihichika kuli yiswale ni njize. Yami Yehova Zambi yenu.

²³ Yehova yamba kuli Mose ngwenyi,

²⁴ Amba kuli A-Izalele ngwe, Ha kakweji wamuchishimbiali, ha tangwa litangu lia kakweji, munukafunga tangwa lilemu lia kuhwima. Chikapwe Chiwulwiso cha kuhumuna yitavwi, chikungulwila chisandu.

²⁵ Kanda nulinga milimo niyimwe yilemu. Munukunjika mulambu wa kahia kuli Yehova.

²⁶ Yehova yamba kuli Mose ngwenyi,

²⁷ Ha kakweji mwenawo wamuchishimbiali ha tangwa liamuchikumi mulipwa tangwa lia kufuka shili. Mulipwa kuli yenu tangwa lia chikungulwila chisandu. Munufwichisa mbunge jenu, mba mununeha mulambu wa kahia kuli Yehova.

²⁸ Ha tangwa lienalio kanda nulinga milimo niyimwe, mumu liapwa tangwa lia kufuka shili, akanufukileyo kumeso ja Yehova Zambi yenu.

²⁹ Mumu mweswawo kalifwichile ha tangwa lienalio kumakamuteta kuli atu jenyi.

³⁰ Mweswawo malinga milimo ha tangwa lize mungumunongesa hakachi ka atu jenyi.

³¹ Kanda nulinga milimo niyimwe. Yikapwe chiyulo cha mutolo, ndusu yisemuko yenu yeswe, kweswako munutwama.

³² Mulipwa kuli yenu Sambata yilemu ya kuhwima, mba munufwichisa mbunge jenu. Ha tangwa liamuchilivwa lia kakweji, putu ku chingoloshi ndo ku chingoloshi, munufunga Sambata yenu.

³³ Yehova yamba kuli Mose ngwenyi,

³⁴ Amba kuli A-Izalele ngwe, Ha kakweji yono mwene wamuchishimbiali, ha tangwa kumi ni liamuchitano ndusu ha matangwa shimbiali che chiwanyino cha yisakila kuli Yehova.

³⁵ Tangwa litangu mulipwa chikungulwila chisandu. Kanda nulinga milimo niyimwe yilemu.

³⁶ Matangwa shimbiali munulambula milambu ya kahia kuli Yehova. Ha tangwa liamuchinake munupwa ni chikungulwila chisandu nukalambule mulambu wa kahia kuli Yehova. Acho chikungulwila chilemu, kanda nulinga milimo niyimwe yilemu.

³⁷ Yino ye yiwanyino ya Yehova munulakenya yikapwe matangwa a yikungulwila yisandu ya kutongola, hanga nukalambule kuli Yehova milambu ya kahia. Ngwami, Milambu ya kulumba, ni milambu ya wunga, ni yitapo, ni milambu ya kunwa, weswe ha tangwa liawo,

³⁸ ya kuweza helu lia Sambata ja Yehova, ni helu lia yawana yenu, ni helu lia milambu yenu yeswe ya yilakenyo, ni helu lia milambu yenu yeswe ya mbunge yize nwakuhana kuli Yehova.

³⁹ Ha tangwa kumi ni liamuchitano lia kakweji wamuchishimbiali muze hinwasweka mbuto ya chifuchi munufunga che chiwanyino cha Yehova matangwa shimbiali. Tangwa litangu mulipwa lilemu lia kuhwima, ni tangwa liamuchinake mulipwa lilemu lia kuhwima.

⁴⁰ Ha tangwa litangu munutambula mihuko ya mitondo yipema, mitango ya mingaji, ni mitango ya mitondo ya mafwo, ni misombo ya ku lwiji. Mba munuwahilila kumeso ja Yehova Zambi yenu matangwa shimbiali.

⁴¹ Munufunga chiwanyino chino kuli Yehova matangwa shimbiali ha mwaka. Chino chapwa chiyulo cha mutolo ndusu yisemuko yenu yeswe. Munukachifunga mu kakweji wamuchishimbiali.

⁴² Munutwama mu yisakila matangwa shimbiali. Waze eswe apwa e enyembo A-Izalele matwama mu yisakila.

⁴³ Hanga akwa yisemuko yenu akanyingike chize yami natwamishine A-Izalele mu yisakila muze naachijile ku chifuchi cha Engitu. Yami Yehova Zambi yenu.

⁴⁴ Chocho Mose wambulwilile A-Izalele yiwanyino ya kutongola ya Yehova.