Alevi 21 - MUKANDA USANDU WA ZAMBI 1975

¹ Yehova yamba kuli Mose ngwenyi, Hanjika ni asasendote, ana ja Arone, ukambe kuli ayo ngwe, Niumwe hakachi ko makalichisa mumu hali afu hakachi ka atu jenyi.

² Ndo mapwa usoko wenyi wa ha muchima lume, hanji naye, hanji tato, hanji mwanenyi wa lunga, hanji mwanenyi wa pwo, hanji mwanakwo, hanji yayo,

³ hanji ndumbwenyi yoze kanda alimona ni lunga (iye hapwa usoko wenyi wa hakamwihi mumu keshi lunga. Hali iye mahasa kulichisa).

⁴ Kanda akalichisa mumu hali pwo hakachi ka atu jenyi nikulijilula.

⁵ Kanda alitewula kawewe, hanji kuteta chihanda cha wevu, hanji kulitetateta ha mujimba wenyi.

⁶ Akapwe asandu kuli Zambi yo. Kanda akajilula jina lia Zambi yo. Mumu o kakulambula milambu ya kahia kuli Yehova, che kulia cha Zambi yo. Kashika akapwe asandu.

⁷ Kanda ambata chikoi hanji pwo yoze hamulumbula. Kanda ambata pwo wa kulakula, mumu sasendote iye musandu kuli Zambi yenyi.

⁸ Nukamusele ku usasendote mumu kakulambula kulia cha Zambi yenu. Akapwe musandu kuli yenu mumu yami Yehova mukwa kunusela ku usandu nguli musandu.

⁹ Nyi mwana wa pwo wa umwe sasendote malijilula ha kulinga ukoi, hajilula tato, akamwoche ni kahia.

¹⁰ Sasendote wa lutwe hakachi ka akwo, yoze te hamuwayisa ni maji ha mutwe, hamutumbikila kuzala e mazalo, kanda akasulula kambu jenyi, kanda asonya mazalo jenyi.

¹¹ Kanda akundama ku mujimba wa mufu. Kanda alichisa chipwe hali tato hanji naye.

¹² Kanda akatuka kuma kusandu. Kanda ajilula kuma kusandu kwa Zambi yenyi mumu maji a Zambi yenyi a kumusela ku usandu hapwa hali iye. Yami Yehova.

¹³ Iye mambata pwo yoze kanda alimona ni lunga.

¹⁴ Kanda ambata yoze wafwisa lunga, hanji wa kulakula, hanji yoze hamulumbula, hanji chikoi. Akambate pwo wa kuli atu jenyi mwene yoze kanda alimona ni lunga,

¹⁵ kuchina majilula ana jenyi hakachi ka atu jenyi. Mumu yami Yehova mukwa kumusela ku usandu.

¹⁶ Yehova yamba kuli Mose ngwenyi,

¹⁷ Ambila Arone ngwe, Niumwe chilema hakachi ka ana je, ndusu yisemuko yo, kanda akundama kulambula kulia cha Zambi yenyi.

¹⁸ Mumu niumwe chilema kanda akundama, yoze wapwa kapuputa, hanji chitonji, hanji yoze halumbuka ku meso, hanji yoze uli ni kulu lisuku,

¹⁹ hanji kulu liawondeka, hanji kwoko liawondeka;

²⁰ hanji mukwa kunda, hanji chimbinda, hanji yoze kamwene kanawa, hanji kali ni musongo wa kuzwa, hanji yilonda, hanji mbili ja kuwonda.

²¹ Niumwe chilema hakachi ka ana ja Arone mwe sasendote kanda akundama akalambule milambu ya Yehova ni kahia. Se iye chilema kanda akundama mukulambula kulia cha Zambi yenyi.

²² Mahasa kulia ya kulia ya Zambi yenyi, chipwe yisandu yahiana chipwe ye yisandu.

²³ Alioze kanda akundama ku chikalakala, hanji chilumbilo, mumu iye chilema, kuchina majilula zuwo liami lisandu. Mumu yami Yehova mukwa kuyisela ku usandu.

²⁴ Chocho Mose yalumbununa kuli Arone, ni kuli anenyi a malunga, ni kuli A-Izalele eswe.