Alevi 2 - MUKANDA USANDU WA ZAMBI 1975

¹ Mba muze umwe makalambula mulambu wa wunga kuli Yehova, mulambu wenyi ukapwe wa wunga wafufunuka. Akaseho maji ni libano.

² Akaunehe kuli asasendote, ana ja Arone. Akazomoneko kwoko lienyi lia wunga wafufunuka, ni chihanda cha maji, ni ye libano yeswe. Mwe sasendote akalumbe ha chilumbilo Chiwulwiso chayo chikapwe mulambu wa kahia, wa lupembo mupema kuli Yehova.

³ Chize cheswe chasala cha ku mulambu wa wunga chikapwe cha Arone ni anenyi a malunga; chapwa chuma chisandu chahiana hakachi ka milambu ya kahia kuli Yehova.

⁴ Muze mukalambula mulambu wa wunga wa kwocha mu forno, ukapwe wa yandanda ya wunga wafufunuka kuushi futunwiso, wa kuchinga ni maji, hanji ukapwe wa malikemba keshi futunwiso a kulembula ni maji.

⁵ Nyi mulambu we muukapwa wa kwocha mu forma, ukapwe wa wunga wafufunuka, kuushi futunwiso, wa kuchinga ni maji.

⁶ Ukaupalule, ukazujileho maji, mumu mulambu wa wunga.

⁷ Nyi mulambu we muukapwa wa ha chikango, ukapwe wa wunga wafufunuka wa kuchinga ni maji.

⁸ Mulambu wa yino yuma nukaunehe kuli Yehova. Akauhane kuli sasendote mba iye makautwala ku chilumbilo.

⁹ Sasendote makachiza ku mulambu Chiwulwiso chawo akachilumbe ha chilumbilo. Wapwa mulambu wa kahia, wa lupembo mupema kuli Yehova.

¹⁰ Chize cheswe chasala cha ku mulambu wa wunga chikapwe cha Arone ni anenyi a malunga; chapwa chuma chisandu chahiana hakachi ka milambu ya kahia kuli Yehova.

¹¹ Niumwe mulambu wa wunga wa kulambula kuli Yehova kanda ukaulinga ni futunwiso, mumu futunwiso hanji wuchi keshi kuyilumba mu mulambu-wa kahia kuli Yehova.

¹² Muhasa kuyilambula kuli Yehova ha mulambu wa mbuto yitangu, alioze kanda yiya ha chilumbilo ha lupembo mupema kuli Yehova.

¹³ Mulambu weswe wa wunga ukaulungise ni mungwa. Mungwa wa usendo wa Zambi ye kanda ukahona mu mulambu we wa wunga. Mutambula mungwa hamuwika ni milambu ye yeswe.

¹⁴ Nyi mutambula mulambu wa wunga wa mbuto yitangu kuli Yehova, ukalambule ha mulambu wa mbuto yitangu mbuto ya wisu ya kwangiliza ni kahia, mbuto ya kundonda ya ku mitwe yaha.

¹⁵ Ukazujileho maji, ukaseho nawa libano. Wapwa mulambu wa wunga.

¹⁶ Sasendote makalumba Chiwulwiso chawo; chihanda cha mbuto ya kundonda, ni chihanda cha maji jawo, ni libano yeswe. Wapwa mulambu wa kahia kuli Yehova.