Alevi 18 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Amba kuli A-Izalele ngwe, Yami Yehova Zambi yenu.

³ Kanda nulinga yize akulinga mu chifuchi cha Engitu kuze nwatwamine. Kanda nulinga yize akulinga mu chifuchi cha Kanana kuze ngunanutwala. Kanda nwenda mu yiyulo yo.

⁴ Munulinga yize natuma yami. Munufunga yiyulo yami nikwendelamo. Yami Yehova Zambi yenu.

⁵ Kashika munufunga yiyulo yami ni shimbi jami. Ha kulinga chocho mutu matwama ni mwono. Yami Yehova.

⁶ Niumwe hakachi kenu makundama kuli umwe usoko wenyi wa ha muchima akamufukule. Yami Yehova.

⁷ Kanda ufukula tatenu mumu wapwa uselesele wa noko. Se iye noko kanda umufukula.

⁸ Kanda ufukula pwo lia tatenu mumu wapwa uselesele, wa tatenu.

⁹ Kanda ufukula ndumbwe, mwana wa tatenu, hanji mwana wa noko, apwe wa kusemuka mu zuwo, apwe wa kusemuka kweka.

¹⁰ Kanda ufukula mujikulu we wa pwo, apwe mwana wa mwané wa lunga, apwe mwana wa mwané wa pwo, mumu uselesele wo wapwa uselesele wa yena mwene.

¹¹ Kanda ufukula mwana wa pwo wa pwo lia tatenu yoze hamusema kuli tatenu, se hapwa ndumbwe.

¹² Kanda ufukula ndumbu wa tatenu se iye usoko wa ha muchima wa tatenu.

¹³ Kanda ufukula yayo, hanji mwanakwo wa noko, se iye usoko wa ha muchima wa noko.

¹⁴ Kanda ufukula yayo hanji mwanakwo wa tatenu. Acho chinalumbunuka ngwe kanda ukundama kuli pwo lienyi mumu iye noko.

¹⁵ Kanda ufukula tembwa-mwané se iye pwo lia mwané. Kanda umufukula.

¹⁶ Kanda ufukula pwo ha yayenu hanji mwanakwenu, acho uselesele wa yayenu hanji mwanakwenu.

¹⁷ Kanda ufukula pwo ni mwanenyi wa pwo. Kanda utambula mwana wa mwanenyi wa lunga hanji mwana wa mwanenyi wa pwo ukaafukule. Acho ungulungulu, se hapwa usoko we wa ha muchima.

¹⁸ Kanda uhalika pwo ni yayo, hanji mwanakwo, nikumufukula shimbu mukwo kali ni mwono.

¹⁹ Kanda ukundama kuli pwo kumufukula shimbu achili ku mazuwo.

²⁰ Kanda upomba ni pwo lia mukwenu nikulichisa nenyi.

²¹ Kanda uhana niumwe wa ana je akaatambule mu kahia kuli Moleke, ukajilule chocho jina lia Zambi ye. Yami Yehova.

²² Kanda upomba ni lunga ukamutenge pwo. Acho chuma cha kuvwisa lwaji.

²³ Kanda upomba ni kashitu ukalichise nenyi. Niumwe pwo kanda alihana kuli kashitu kupomba nenyi. Acho uhenge.

²⁴ Kanda nulichisa ni yuma yino niyimwe mumu akwa mavungu aze ngunaahumu kumeso jenu o halichisa nayo yeswe.

²⁵ Chocho chifuchi hachichisa mba hinaalambila uhenge wacho. Chifuchi hichasaza waze atwamamo.

²⁶ Alioze yenu fungenu yiyulo yami ni shimbi jami. Kanda nulinga yuma yo ya kuvwisa lwaji, chipwe mwenyembo, chipwe njize yoze watwama hakachi kenu.

²⁷ (Mumu yuma yino yeswe ya kuvwisa lwaji malunga akwa chifuchi alingile, waze nwawanyine, kashika chifuchi achichishile.)

²⁸ Kuchina chifuchi muchinusaza ha kuchichisa, ngwe chaasajile ayo akwa vungu lize nwawanyine.

²⁹ Mumu mweswawo malinga yino yuma ya kuvwisa lwaji, atu eswe akwa kuyilinga makaateta hakachi ka atu jo.

³⁰ Chocho fungenu shimbi yami ngwami, Nilimwe tangwa kanda nulinga ndako ja kuvwisa lwaji alingile waze atetekelele. Nilimwe tangwa kanda nulichisa najo. Yami Yehova Zambi yenu.