Alevi 17 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Amba kuli Arone ni anenyi a malunga ni kuli A-Izalele eswe ngwe, Chuma Yehova hatumina chino, ngwenyi,

³ Nyi mutu umwe wa ku vungu lia Izalele mashiha ngombe, hanji panga, hanji pembe, mu chilombo, hanji haze lia chilombo,

⁴ alioze kamunehene ku chikolo cha mbalaka ya chikungulwila akamutambule mulambu kuli Yehova kumeso ja tabernakulu ya Yehova, mapwa ni uhie wa manyinga. Hamwanga manyinga, kashika mamuteta hakachi ka atu jenyi,

⁵ hanga A-Izalele akanehe yitapo yo yize akushiha mu chifuchi cha woya akayihane kuli Yehova, kuli sasendote ku chikolo cha mbalaka ya chikungulwila. Akayishihe yitapo ya milambu ya sambukila kuli Yehova.

⁶ Mwe sasendote akasapwile manyinga ha chilumbilo cha Yehova ku chikolo cha mbalaka ya chikungulwila. E maji akaalumbe akapwe lupembo mupema kuli Yehova.

⁷ Chocho akalitwamine kushihila mahamba waze akulichisa no. Yino muyipwa chiyulo cha mutolo kuli ayo ndusu yisemuko yo yeswe.

⁸ Amba kuli ayo nawa ngwe, Mutu mweswawo wa ku vungu lia Izalele, hanji wa njize waze atwama hakachi ko, matambula mulambu wa kulumba, hanji chitapo,

⁹ nyi kaunehene ku chikolo cha mbalaka ya chikungulwila akaulambule kuli Yehova, akamutete kuli atu jenyi.

¹⁰ Nyi mutu mweswawo, apwe wa vungu lia Izalele, apwe wa njize atwama hakachi ko, malia amwe manyinga, mungusa meso jami a kulimika ni mukwa kulia manyinga, ngukamutete hakachi ka atu jenyi.

¹¹ Mumu mwono wa musunya watwama mu manyinga mba hinaahana ha chilumbilo hali yenu kufuka mwono wenu. Mumu manyinga akufuka, mumu apwa we mwono.

¹² Kashika namba kuli A-Izalele ngwami, Niumwe hakachi kenu malia manyinga, chipwe njize hakachi kenu neye kechi kalia manyinga.

¹³ Chikwo nawa, mutu mweswawo hakachi ka A-Izalele, hanji njize yoze watwama hakachi ko, nyi mu yambu mashiha kashitu, hanji kajila yoze walita ni kulia, akwete kuhichisa manyinga jenyi nikwaluka ni mavu.

¹⁴ Mumu mwono wa mukwa mwono mweswe watwama mu manyinga. Kashika hingunambe kuli A-Izalele ngwami, Kanda nulia manyinga a mukwa mwono niumwe. Mumu mwono wa mukwa mwono mweswe e manyinga jenyi, kashika mweswe maalia akamuteteko.

¹⁵ Mutu mweswe malia yoze walifwila, hanji wa kupapulula kuli tushitu, apwe mwenyembo, apwe njize, akakose mazalo jenyi, akasane meya; akapwe wa luchisa ndo chingoloshi mba mapema.

¹⁶ Alioze nyi kaakosele hanji kasanyine, akambate uhenge wenyi.