Alevi 16 - MUKANDA USANDU WA ZAMBI 1975

¹ Yehova yahanjika ni Mose kulutwe lia kufwa cha ana a malunga aali a Arone, muze akundamine kuli Yehova mba yafwa.

² Yehova yamba kuli Mose ngwenyi, Ambila yayenu Arone kanda anjila matangwa eswe muma musandu muchima lia chikalakala kumeso ja chitwamo cha keke chize chili ha mushete, kuchina mafwa. Mumu mungukasoloka mu lelwa ha chitwamo cha keke.

³ Alioze Arone ngwe chino manjila muma musandu; akanjile ni chimbembe wa kuji, akapwe mulambu ha shili, ni kuji ya panga akapwe mulambu wa kulumba.

⁴ Akazale chikuto chisandu cha hina lipema litoma, ni ha mujimba wenyi akazale kaputula wa hina lipema litoma. Akalijichike muya wa ponda wa hina lipema litoma, ni kapusa wa hina lipema litoma, e mazalo asandu aze; kashika akasane, mba maazala.

⁵ Ku chikungulwila cha A-Izalele akatambule kuji a pembe aali akapwe mulambu ha shili, ni kuji ya panga umuwika akapwe mulambu wa kulumba.

⁶ Arone akalambule mwe chimbembe mulambu ha shili hali iye mwene, akafuke shili yenyi ni ya akwa zuwo lienyi.

⁷ Mba akatwale e pembe aali akaatumbike kumeso ja Yehova ku chikolo cha mbalaka ya chikungulwila.

⁸ Arone akáte chela hali pembe aali, cha Yehova ni cha Zazele.

⁹ Pembe yoze chaholokela chela cha Yehova, Arone akamukunjike akamutambule mulambu ha shili.

¹⁰ Alioze pembe yoze chaholokela chela cha Zazele akamukunjike wa mwono kumeso ja Yehova akafuke shili hali iye, mba akamutume ku puya akapwe Zazele.

¹¹ Arone makakunjika mwe chimbembe mulambu ha shili hali iye mwene. Akafuke shili yenyi ni ya zuwo lienyi. Akashihe mwe chimbembe wa mulambu ha shili yenyi mwene.

¹² Mba makanda chikwachilo cha tò ni makala a kahia a kwokola ku chilumbilo kumeso ja Yehova, ni moko aali a insensu ya kutwa ya lupembo mupema, akayitwale muchima lia chikalakala.

¹³ Akase insensu ha kahia kumeso ja Yehova hanga mwishi wa insensu Ukafuke chitwamo cha keke chize chili ha Shindakenyo, kuchina mafwa.

¹⁴ Akande amwe manyinga a mwe chimbembe akaasapwile ni munwe wenyi ha chitwamo cha keke kulutwe kwakutala ku Chivumbuko. Mba kulutwe lia chitwamo cha keke akaasapwile yisuho shimbiali ni munwe wenyi.

¹⁵ Mba makashiha mwe pembe wa mulambu ha shili wa e atu akanehe manyinga jenyi muchima lia chikalakala. Akalinge ni manyinga jenyi chizechene ngwe halinga ni manyinga a mwe chimbembe, nikwasapwila ha chitwamo cha keke ni kulutwe lia chitwamo cha keke.

¹⁶ Chocho makafuka muma musandu mumu ha luchisa wa A-Izalele, ni Utanguko wo, ye shili yo yeswe. Chocho makalinga ha mbalaka ya chikungulwila yatwama hamwe no hakachi ka luchisa wo.

¹⁷ Kumushi kupwa mutu niumwe mu mbalaka ya chikungulwila muze manjila muma musandu kufuka shili, ndo hatuhuka, hafuka shili yenyi mwene ni ya akwa zuwo lienyi, ni ya chikungulwila cheswe cha A-Izalele.

¹⁸ Mba matuhukila ku chilumbilo chili kumeso ja Yehova akachifukile shili. Akande nawa amwe manyinga a mwe chimbembe ni amwe a mwe pembe akaakomone ha mbinga ja chilumbilo ha kujingilika.

¹⁹ Akasapwileho amwe manyinga nawa yisuho shimbiali ni munwe wenyi akachipemese, akachihandunune ku luchisa wa A-Izalele.

²⁰ Muze hamana kufuka shili ha muma musandu, ni mbalaka ya chikungulwila ni chilumbilo, mba makunjika mwe pembe wa mwono.

²¹ Arone masa moko jenyi eswe ni aali ha mutwe wa pembe wa mwono. Mashikisa hali iye uhenge weswe wa A-Izalele, ni Utanguko wo weswe, ye shili yo yeswe, akayise ha mutwe wa pembe akamutume ku puya ku kwoko lia umwe wa kutongola kulu.

²² Mwe pembe makambata hali iye uhenge wo weswe akautwale ku chifuchi kuchishi atu. Mba matusula mwe pembe mu puya.

²³ Mba Arone manjila mu mbalaka ya chikungulwila akazule mazalo a hina lipema litoma azalanga muze anjilanga muma musandu. Akaahichike muze mwene.

²⁴ Akasane meya muma mumwe musandu akazale mazalo jenyi akatuhuke. Akalambule mulambu wenyi wa kulumba, ni mulambu wa kulumba wa e atu, akafuke shili hali iye mwene ni hali e atu.

²⁵ Mba maji a mulambu ha shili akaoche ha chilumbilo.

²⁶ Ni yoze matwala pembe ha Zazele makosa mazalo jenyi, masana meya mba mahasa kunjila mu chilombo.

²⁷ Mwe chimbembe wa mulambu ha shili, ni pembe wa mulambu ha shili, manyinga jo haneha muchima kufuka shili ha muma musandu, maambata haze lia chilombo. Ni makupu jo, ni yifwo yo, ni ufwachi wo akayoche mu kahia.

²⁸ Yoze mayocha makosa mazalo jenyi, masana meya mba mahasa kunjila mu chilombo.

²⁹ Muchipwa chiyulo cha mutolo kuli yenu, ngwami, ha kakweji wamuchishimbiali, ha tangwa liamuchikumi munukafwichisa mbunge jenu. Kanda nulinga milimo niyimwe, chipwe mwenyembo, chipwe njize yoze watwama hakachi kenu.

³⁰ Mumu ha tangwa lino makanufukila shili akanupemese, nukapeme kumeso ja Yehova ku milonga yenu yeswe.

³¹ Yikapwe Sambata ya uhwimino ulemu kuli yenu, nukafwichise mbunge jenu. Chino chikapwe chiyulo cha mutolo.

³² Sasendote yoze hamuwayisa ni maji nikumutumbikila kusalakana tato mu usasendote, makafuka shili nikuzala mazalo asandu a hina lipema litoma.

³³ Makafuka shili ha muma musandu. Makafuka shili ha mbalaka ya chikungulwila, ni ha chilumbilo. Makafuka shili hali asasendote ni hali atu eswe a chikungulwila.

³⁴ Chino chikapwe chiyulo cha mutolo kuli yenu hanga akafuke shili ya A-Izalele kamuwika ha mwaka mumu ha milonga yo yeswe. Mba Mose walingile chizechene ngwe Yehova wamutumine.