Alevi 15 - MUKANDA USANDU WA ZAMBI 1975

¹ Yehova yamba kuli Mose ni Arone ngwenyi,

² Ambenu kuli A-Izalele ngwenu, Muze umwe lunga mapwa ni musongo wa kuhita ku mujimba wenyi, musongo uze wa kuhita muukapwa wa luchisa.

³ Shimbi ya luchisa wenyi wa kuhita yino; chipwe mujimba wenyi unachihichi, chipwe hiwalitwamina kuhita, hindu wapwa luchisa muli iye.

⁴ Muhela weswe mapomba mukwa kuhita muukapwa wa luchisa. Homa heswaho matwamaho muhakapwa ha luchisa.

⁵ Mweswawo makwata ku muhela wenyi, akakose mazalo jenyi, akasane meya, mba mapwa wa luchisa ndo chingoloshi.

⁶ Mweswawo matwama ha chuma cheswacho kuze mwe mukwa musongo wa kuhita hatwama akakose mazalo jenyi, akasane meya, mba mapwa wa luchisa ndo chingoloshi.

⁷ Mweswawo makwata ku mujimba wa mukwa kuhita akakose mazalo jenyi, akasane meya, mba mapwa wa luchisa ndo chingoloshi.

⁸ Nyi mukwa musongo wa kuhita mafwila mate hali umwe mupema iye makakosa mazalo jenyi, akasane meya, mba mapwa wa luchisa ndo chingoloshi.

⁹ Selina yeswe haze mukwa kuhita makatwama muyikapwa ya luchisa.

¹⁰ Mweswawo makwata chuma cheswacho hichapwa kushi lienyi, kumapwa wa luchisa ndo chingoloshi, ni mweswawo makambata chuma chize, akakose mazalo jenyi, akasane meya, mba mapwa wa luchisa ndo chingoloshi.

¹¹ Mweswawo mwe mukwa kuhita makwata kanda achikosongona moko jenyi ni meya, akakose mazalo jenyi, akasane meya, mba mapwa wa luchisa ndo chingoloshi.

¹² Nyi mukwa kuhita makwata ku chikwachilo cha uma machishiha. Chikwachilo cha mutondo machikosongona mu meya.

¹³ Muze hawuka mukwa kuhita ku kuhita chenyi, malialwila matangwa shimbiali ha kulipemesa. Makosa mazalo jenyi, masana mu meya aze anende, mba mapema.

¹⁴ Ha tangwa liamuchinake akande tutele aali hanji ana-a-membe aali akanjile kumeso ja Yehova ku chikolo cha mbalaka ya chikungulwila akaahane kuli sasendote.

¹⁵ Sasendote maalambula, umwe akapwe mulambu ha shili, mukwo akapwe mulambu wa kulumba. Chocho sasendote mamufukila ha kuhita chenyi kumeso ja Yehova.

¹⁶ Nyi kachi umwe lunga mamwanga mbuto yenyi ya ana, akasanyise mujimba wenyi weswe ni meya. Mba mapwa wa luchisa ndo chingoloshi.

¹⁷ Mazalo eswe, hanji lambu lieswe kuze amwanganyine ye mbuto akayikose, mba yikapwe ya luchisa ndo chingoloshi.

¹⁸ Nyi lunga kanapombo ni pwo mba mamwanga mbuto yenyi, eswe ni aali akasane meya akapwe a luchisa ndo chingoloshi.

¹⁹ Muze pwo majila kumakapwa mu kuhandunuka chenyi matangwa shimbiali. Mweswawo mamukwata mapwa wa luchisa ndo chingoloshi.

²⁰ Heswaho makapomba ha kuhandunuka chenyi muhakapwa ha luchisa. Heswaho makatwama muhakapwa ha luchisa.

²¹ Mweswawo makwata ku muhela wenyi, akakose mazalo jenyi, akasane meya, akapwe wa luchisa ndo chingoloshi.

²² Mweswawo makwata chimwe chuma haze pwo hatwama, akakose mazalo jenyi, akasane meya, akapwe wa luchisa ndo chingoloshi.

²³ Chipwe muhela, hanji chuma cheswacho haze hatwama, muze machikwata mapwa wa luchisa ndo chingoloshi.

²⁴ Nyi lunga mapomba nenyi mba luchisa wa kuhandunuka chenyi meza hali lunga, akapwe wa luchisa matangwa shimbiali. Chikwo nawa muhela weswawo haze lunga makapomba muukapwa wa luchisa.

²⁵ Nyi pwo mahita manyinga matangwa anji, alioze hi ha matangwa jenyi a kuhandunuka ko, hanji muchihiana matangwa jenyi a kuhandunuka, matangwa eswe a kuhita chenyi makapwa wa luchisa ngwe ku matangwa jenyi a kuhandunuka. Akapwe wa luchisa.

²⁶ Muhela weswe mapomba ha matangwa eswe a kuhita chenyi ukapwe kuli iye ngwe muhela wa kuhandunuka chenyi. Chitwamo cheswacho matwama muchipwa cha luchisa, chizechene ngwe luchisa wa kuhandunuka chenyi.

²⁷ Mweswe makwata ku yino yuma mapwa wa luchisa. Akakose mazalo jenyi, akasane meya, akapwe wa luchisa ndo chingoloshi.

²⁸ Alioze nyi hapema ku kuhita chenyi akalialwile matangwa shimbiali mba kulutwe makapwa mupema.

²⁹ Ha tangwa liamuchinake akande tutele aali hanji ana-a-membe aali, akaatwale kuli sasendote ku chikolo cha mbalaka ya chikungulwila.

³⁰ Sasendote akalambule umuwika mulambu ha shili. Mukwo akapwe mulambu wa kulumba. Chocho sasendote mamufukila ha kuhita chenyi cha luchisa kumeso ja Yehova.

³¹ Chocho mukafunga A-Izalele a kuhandununa ku luchisa wo, kuchina makafwa mu luchisa wo ha kuchisa tabernakulu yami yatwama hakachi ko.

³² Yino ye shimbi kuli lunga uli ni musongo wa kuhita ni lunga yoze matuhwisa mbuto yenyi nikulipihisa nayo,

³³ ni kuli pwo uli ni luchisa wa kuhandunuka chenyi, ni kuli eswe, chipwe lunga, chipwe pwo, ali ni musongo wa kuhita, ni kuli lunga mapomba ni pwo yoze uli mu luchisa.