Alevi 14 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Shimbi ya mukwa mbumba ha tangwa lia kumupemesa yino. Akamunehe kuli sasendote.

³ Sasendote matuhuka mu chilombo. Sasendote matala. Nyi musongo wa mbumba hiwakatuka kuli mukwa mbumba,

⁴ sasendote matumina akande tujila aali a mwono, apema, hali yoze anambe kumupemesa, hamwe ni mutondo wa sedru, ni hina lia ngengu ni hisope.

⁵ Sasendote matumina ashihe kajila umuwika mu chikwachilo cha uma helu lia meya aze anende.

⁶ Akande mwe kajila wa mwono hamwe ni mutondo wa sedru ni hina lia ngengu ni hisope, akayichupike hamwe ni kajila wa mwono mu manyinga a kajila yoze hamushiha helu lia meya aze anende.

⁷ Akaasapwile yisuho shimbiali hali yoze anambe kumupemesa ku mbumba, akamuvuluke ngwo, Kanapeme. Mba akatusule kajila wa mwono mu chifuchi cha woya.

⁸ Mba yoze anambe kumupemesa akakose mazalo jenyi, akatewule kambu jenyi jeswe, akasane meya, mba mapema. Muze halinga chino manjila mu chilombo ahoze kechi kunjila mu mbalaka yenyi ndo matangwa shimbiali hahwa.

⁹ Ha tangwa liamuchishimbiali akatewule kambu jenyi jeswe ja ha mutwe, akatewule ni wevu wenyi ni yikenyikenyi, kambu jenyi jeswe lume. Mba makosa mazalo jenyi, masana meya, mba hapwa mupema.

¹⁰ Ha tangwa liamuchinake akande ana-mapanga aali a kuji keshi chipa, ni chihwo cha panga umuwika wa mwaka umuwika, keshi chipa, ni mulambu wa wunga wa yihanda yitatu ya ku kumi ha yihanda ya wunga wafufunuka wa kuchinga ni maji, ni njongo ya maji.

¹¹ Mba sasendote mukwa kupemesa matumbika yoze mamupemesa hamuwika ni yuma yino kumeso ja Yehova ku chikolo cha mbalaka ya chikungulwila.

¹² Sasendote akande kuji ya panga umuwika akamutambule mulambu wa uhie hamuwika ni njongo ya maji, akayihungise yikapwe mulambu wa kuhungisa kumeso ja Yehova.

¹³ Akashihe mwe mwana-panga kuze akushihila mulambu ha shili ni mulambu wa kulumba kuma kusandu. Mumu mulambu wa uhie wapwa ngwe mulambu ha shili wa mbala wa sasendote. Musandu Wahiana.

¹⁴ Sasendote akande amwe manyinga a ku mulambu wa uhie akaakomone ha songo lia twitwi lia chindume lia yoze anambe kumupemesa, ni ha munwe wa shina wa kwoko lia chindume, ni ha munwe wa shina wa kulu lia chindume.

¹⁵ Sasendote akande nawa amwe a ku njongo ya maji akazujile mu kwoko lienyi mwene lia chimeso.

¹⁶ Akachupike songo lia munwe wenyi wa chindume mu maji ali mu kwoko lienyi lia chimeso, akasapwile amwe maji ni munwe wenyi yisuho shimbiali kumeso ja Yehova.

¹⁷ Amwe maji aze asala mu kwoko lienyi sasendote makomona ha songo lia twitwi lia chindume lia yoze anambe kumupemesa, ni ha munwe wa shina wa kwoko lia chindume, ni ha munwe wa shina wa kulu lia chindume ha manyinga a mulambu wa uhie.

¹⁸ Maji aze asala mu kwoko lia sasendote akakomone ha mutwe wa yoze anambe kumupemesa. Mba sasendote mamufukila shili yenyi kumeso ja Yehova.

¹⁹ Sasendote akalambule mulambu ha shili kufuka yoze anambe kumupemesa ku luchisa wenyi. Mba kulutwe akashihe mulambu wa kulumba.

²⁰ Sasendote akalambule mulambu wa kulumba ni mulambu wa wunga ha chilumbilo. Chocho sasendote mamufuka, mba mapwa mupema.

²¹ Alioze nyi iye chiswale, kahashile kuwana yuma yipwa haha, akande kuji ya panga umuwika ha mulambu wa uhie akamuhungise akamufukile shili yenyi. Akanehe nawa chihanda chimuwika cha ku kumi lia yihanda ya wunga wafufunuka wa kuchinga ni maji ha mulambu wa wunga, ni njongo ya maji.

²² Akanehe tutele aali hanji ana-a-membe aali aze mahasa kuwana, umwe mulambu ha shili, mukwo mulambu wa kulumba.

²³ Ha tangwa liamuchinake makaaneha kuli sasendote a kumupemesa no, kwe ku chikolo cha mbalaka ya chikungulwila kumeso ja Yehova.

²⁴ Sasendote manda mwana-panga wa mulambu wa uhie, ni njongo ya maji. Sasendote mayihungisa yikapwe mulambu wa kuhungisa kumeso ja Yehova.

²⁵ Mashiha mwana-panga wa mulambu wa uhie, mba sasendote manda amwe manyinga a mulambu wa uhie, maakomona ha songo lia twitwi lia chindume lia yoze anambe kumupemesa, ni ha munwe wa shina wa kwoko lia chindume, ni ha munwe wa shina wa kulu lia chindume.

²⁶ Sasendote mazujila amwe maji mu kwoko lienyi mwene lia chimeso.

²⁷ Akasapwile amwe maji a mu kwoko lienyi lia chimeso kumeso ja Yehova yisuho shimbiali ni munwe wenyi wa chindume.

²⁸ Maji aze ali mu kwoko lienyi sasendote maakomona ha songo lia twitwi lia chindume lia yoze anambe kumupemesa, ni ha munwe wa shina wa kwoko lia chindume, ni ha munwe wa shina wa kulu lia chindume, haze asele manyinga a mulambu wa uhie.

²⁹ Maji aze asala mu kwoko lia sasendote akaase ha mutwe wa yoze anambe kumupemesa akamufuke kumeso ja Yehova.

³⁰ Mba akalambule mwana-liembe hanji katele aze hahasa kwawana.

³¹ Umwe akapwe mulambu ha shili, mukwo mulambu wa kulumba hamuwika ni mulambu wa wunga. Mba hali yoze anambe kumupemesa sasendote mamufukila shili yenyi kumeso ja Yehova.

³² Yino muyipwa shimbi ya yoze kali ni musongo wa mbumba alioze kahashile kuwana milambu ya kumupemesa nayo.

³³ Yehova yamba kuli Mose ni Arone ngwenyi,

³⁴ Muze munuheta ku chifuchi cha Kanana ngunanwehecho nukachizuke, nyi mungusa musongo wa mbumba mu zuwo limwe mu chifuchi chize munuzuka,

³⁵ mba mwenya zuwo maheta kuli sasendote akamulumbunwine ngwenyi, Ngunamono ngwe musongo umwe wanjila mu zuwo liami.

³⁶ Mwe sasendote matuma kuchiza yuma yeswe yilimo shimbu kanda anjila kutala musongo. Nyi ka, hanji yeswe yili mu zuwo mayivuluka ngwenyi, Ya luchisa. Mba kulutwe mwe sasendote manjila kutala lie zuwo.

³⁷ Matala we musongo. Nyi musongo muupwa mu yishimi ya zuwo ngwe yipeka yilá ngwe mbundu hanji yichila, chikwo nawa wanjila muchima,

³⁸ mba sasendote matuhuka ku chikolo, májila lie zuwo matangwa shimbiali.

³⁹ Mwe sasendote mayako nawa ha tangwa liamuchishimbiali ataleko. Nyi musongo hiwatanda mu yishimi ya zuwo,

⁴⁰ mba sasendote matumina akachize mawe aze akwete musongo akaambile kuma kumwe kwa luchisa haze lia chihunda.

⁴¹ Makatumina kukwata muchima lia zuwo kweswe kwa kujingilika mba mavu aze makwalako akaazukwile kuma kumwe kwa luchisa haze lia chihunda.

⁴² Mba makanda mawe akwo akasalakane mawe aze. Makashingula nawa ni mavu a kusalakana mavu aze hambila.

⁴³ Nyi musongo muukasangumuka nawa mu zuwo muze te hachiza mawe aze, hakwala muchima lia zuwo nikulishingula nawa,

⁴⁴ mwe sasendote manjila kutala. Nyi musongo hiwatanda mu zuwo, mba wapwa mbumba ya mbongola mu zuwo, liapwa lia luchisa.

⁴⁵ Chocho makapuzula lie zuwo, ni mawe jalio, ni mitondo yalio ni mavu a kushingula no lie zuwo, akayitute haze lia chihunda kuma kwa luchisa.

⁴⁶ Chikwo nawa mweswe manjila mu zuwo shimbu lichili lia kwájila mapwa wa luchisa ndo chingoloshi.

⁴⁷ Mweswe mapombamo makosa mazalo jenyi. Mweswe malilamo makosa mazalo jenyi.

⁴⁸ Alioze nyi sasendote maya nikutala zuwo, kumanyi musongo kuwatanjile mu zuwo muze te halishingula, mba sasendote mavuluka zuwo ngwenyi, Linapeme, mumu musongo hiwaya.

⁴⁹ Mba ha kupemesa lie zuwo manda tulujila twali hamwe ni mutondo wa sedru ni hina lia ngengu ni hisope.

⁵⁰ Akashihe kajila umuwika mu chikwachilo cha uma helu lia meya aze anende.

⁵¹ Mba akande mutondo wa sedru, ni hisope, ni hina lia ngengu, hamwe ni kajila wa mwono akayichupike mu manyinga a kajila yoze hashiha, ni mu meya aze anende, akasapwile lie zuwo yisuho shimbiali.

⁵² Chocho makapemesa zuwo ni manyinga a kajila, ni meya aze anende, ni kajila wa mwono, ni mutondo wa sedru, ni hisope, ni hina lia ngengu.

⁵³ Makatusula kajila wa mwono akatuke ku chihunda ahumuke mu chifuchi cha woya. Chocho mafuka mulonga wa zuwo, likapeme.

⁵⁴ Yino yapwa ye shimbi ya kutwala ku musongo weswawo wa mbumba hanji wa kuzwa,

⁵⁵ ya mbumba mu mazalo hanji mu zuwo,

⁵⁶ ya chijimbo, hanji chilonda cha kulijila, hanji chipeka,

⁵⁷ kulweza muze kwapwa luchisa, hanji hi luchisa ko. Ye shimbi ya mbumba yino yene.