Alevi 12 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Amba kuli A-Izalele ngwe, Nyi umwe pwo maka ufumba, masema mwana wa lunga, akapwe wa luchisa matangwa shimbiali. Chizechene ngwe ha matangwa a kulihandununa ha kujila chenyi—chocho mapwa wa luchisa.

³ Ha tangwa liamuchinake mapwisa mwe mwana ngalami.

⁴ Mba pwo makapwa chizechene mu manyinga jenyi a kumupemesa makumi atatu a matangwa ni matangwa atatu. Kanda akakwata nichimwe chuma chisandu, chipwe kunjila muma musandu ndo matangwa jenyi a kumupemesa hahwa.

⁵ Alioze nyi masema mwana wa pwo makapwa wa luchisa semana jiali chizechene ngwe ha kujila chenyi. Mba makapwa chizechene mu manyinga jenyi a kumupemesa makumi asambano a matangwa ni matangwa asambano.

⁶ Muze matangwa jenyi a kumupemesa hahwa, apwe hali mwana wa lunga, apwe hali mwana wa pwo, akanehe kuli sasendote ku chikolo cha mbalaka ya chikungulwila mwana-panga wa mwaka umuwika akapwe mulambu wa kulumba. Akahane nawa mwana-liembe, hanji katele, akapwe mulambu ha shili.

⁷ Mba iye maulambula kumeso ja Yehova akamufukile shili. Mba mapema ku kuhita cha manyinga jenyi. Yino ye shimbi ya kutwala kuli pwo muze masema mwana, apwe wa lunga, apwe wa pwo.

⁸ Nyi kahashile kulanda mwana-panga, akande tutele aali, hanji ana-a-membe aali, umwe akapwe mulambu wa kulumba, mukwo akapwe mulambu ha shili. Mwe sasendote mamufukila shili mba makapema.