Alevi 11 - MUKANDA USANDU WA ZAMBI 1975

¹ Yehova yamba kuli Mose ni Arone ngwenyi,

² Ambenu kuli A-Izalele ngwenu, Wano e akwa mwono munuhasa kulia hakachi ka tushitu eswe ali hashi.

³ Waze eswe hakachi ka tushitu ali ni sende ja kupula, mba kakusekula, munuhasa kwalia.

⁴ Hindu hakachi ka waze akusekula hanji kali ni sende ja kupula kunuchi kulia wano: kamelu, mumu kakusekula alioze keshi sende ja kupula. Akapwe wa luchisa kuli yenu.

⁵ Ni sele, mumu kakusekula alioze keshi sende ja kupula. Akapwe wa luchisa kuli yenu.

⁶ Ni mbalu, mumu kakusekula alioze keshi sende ja kupula. Akapwe wa luchisa kuli yenu.

⁷ Ni ngulu, mumu kali ni sende ja kupula ahoze keshi kusekula. Akapwe wa luchisa kuli yenu.

⁸ Yifwo yo kunuchi kuyilia, chipwe mijimba yo ya kufwa kunuchi kuyikwata. Akapwe a luchisa kuli yenu.

⁹ Hakachi ka waze atwama mu meya munukalia waze ali ni yihehe ni mahalo wika. Wano wika munukaalia mu meya, hanji mu kalunga-lwiji hanji mu njiji.

¹⁰ Waze eswe keshi ni yihehe ni mahalo, hanji mu kalunga-lwiji hanji mu njiji, hakachi ka waze eswe akwenda mu meya, ni akwa mwono eswe atwama mu meya akapwe a kuvwisa lwaji kuli yenu.

¹¹ Kumakapwa a kuvwisa lwaji kuli yenu. Kanda nulia yifwo yo, mba mijimba yo ya kufwa muyipwa ya kuvwisa lwaji kuli yenu.

¹² Kashitu mweswe keshi ni yihehe ni mahalo mu meya, akapwe wa kuvwisa lwaji kuli yenu.

¹³ Hakachi ka tujita wano makapwa a kuvwisa lwaji kuli yenu. Kanda nwalia, mumu akuvwisa lwaji; ni pupa, ni chihungu, ni chiselele;

¹⁴ ni hula-yula, ni kambuya nikulita ni vungu lienyi,

¹⁵ ni chikwakwalo nikulita ni vungu lienyi,

¹⁶ ni kakulu, ni chambamba, ni ngavota, ni chikoji nikulita ni vungu lienyi,

¹⁷ ni chikulu, ni katovwi, ni chikungulu,

¹⁸ ni chozo, ni toji, ni kuyu,

¹⁹ ni chitwanjimbu, ni chitokola nikulita ni vungu lienyi, ni kolokokwe, ni kafukufuku.

²⁰ Waze eswe akwete mapulwa alioze kakukalala hashi ha molu awana akapwe a kuvwisa lwaji kuli yenu.

²¹ Ahoze hakachi ka akwa mapulwa akukalala ha molu awana munuhasa kulia waze ali ni malinja a kutumbuka no hashi helu lia yiliato nawa.

²² Te wano munuhasa kulia, ngwami, Makumbi nikulita ni vungu lio, ni mapasu nikulita ni vungu lio, ni tuzombweta nikulita ni vungu lio, ni tuzeze nikulita ni vungu lio.

²³ Ahoze akwa kukalala eswe akwete mapulwa, akwenda ni molu awana akapwe a kuvwisa lwaji kuli yenu.

²⁴ Yuma yino muyikanuchisa, ngwami, Mweswawo makakwata ku mijimba yo ya kufwa makapwa wa luchisa ndo chingoloshi.

²⁵ Mweswawo makambata chimwe cha ku mijimba yo ya kufwa makakosa mazalo jenyi, mba makapwa wa luchisa ndo chingoloshi.

²⁶ Kashitu mweswe kali ni chiliato cha kupula ahoze keshi sende, chikwo nawa keshi kusekula, akapwe wa luchisa kuli yenu. Mweswawo maakwata malichisa.

²⁷ Hakachi ka tushitu akwenda ha molu awana waze ali ni kata makapwa a luchisa kuli yenu. Mweswe makwata ku mijimba yo ya kufwa makapwa wa luchisa ndo chingoloshi.

²⁸ Yoze makambata mijimba yo ya kufwa makosa mazalo jenyi mba iye makapwa wa luchisa ndo chingoloshi, mumu o akwa luchisa kuli yenu.

²⁹ Hakachi ka akwa kukalala hashi akapwe wa luchisa kuli yenu wano: ni mutondo, ni tumbi, ni chitombwe nikulita ni vungu lienyi,

³⁰ ni kasulu, ni chiku, ni kasengelekwekwe, ni musevu, ni nongwena.

³¹ Wano te makapwa a luchisa kuli yenu hakachi ka akwa kukalala. Mweswe makaakwata muze te hafwa makapwa a luchisa ndo chingoloshi.

³² Kweswako makaholokela muze te hafwa muchipwa cha luchisa, chipwe chikwachilo cha mutondo chipwe uzalo, chipwe kupu, chipwe njeke, chuma cheswacho cha milimo yeswayo, chatamba kuchisa mu meya, muchipwa cha luchisa ndo chingoloshi mba muchipema.

³³ Nyi umwe wayo maholokela mu chikwachilo cha uma, cheswacho chilimo muchikapwa cha luchisa ni che chikwachilo munuchishiha.

³⁴ Ya kulia yeswe haze meya ano hanaholokela muyikapwa ya luchisa, mba ya kunwa yeswe muyikapwa mu chikwachilo cheswacho cha luchisa muyikapwa ya luchisa.

³⁵ Chuma cheswacho haze chihanda chimwe cha mijimba yo ya kufwa muyikaholokela muchikapwa cha luchisa, chipwe forno hanji jiko akayishihe tuyipinji mumu yapwa ya luchisa mba kuli yenu muyikapwa ya luchisa.

³⁶ Alioze fuji lia meya hanji shima lia meya anji o makapema, alioze mweswawo makakwata ku mijimba yo ya kufwa halichisa.

³⁷ Nyi kachi chimwe cha ku mijimba yo ya kufwa muchikaholokela ha mbuto yize nunambe kukuwa muyikapema.

³⁸ Alioze nyi hasa meya ha mbuto mba chimwe cha ku mijimba yo ya kulwa muyikaholokelaho, muyikapwa ya luchisa kuli yenu.

³⁹ Nyi umwe kashitu mafwa yoze te wa kulia kuli yenu, mweswe makwata ku mujimba wenyi wa kufwa mapwa wa luchisa ndo chingoloshi.

⁴⁰ Ni yoze makalia mujimba wenyi wa kufwa makakosa mazalo jenyi mba makapwa wa luchisa ndo chingoloshi. Mweswe makambata mujimba wenyi wa kufwa makakosa mazalo jenyi mba makapwa wa luchisa ndo chingoloshi.

⁴¹ Mba kashitu mweswe wa kukalala ha mavu akapwe wa kuvwisa lwaji kuli yenu. Kanda nukamulia.

⁴² Mweswawo kakulikoka ha jimo lienyi, ni yoze wakwenda ha molu awana, ni waze ali ni molu anji anji—te a ku mavungu eswe akulikoka ha mavu, kanda nukaalia, akapwe a kuvwisa lwaji kuli yenu.

⁴³ Kanda nukalipwisa yenwene a lwaji kuli kashitu mweswawo wa kulikoka, chipwe kulichisa no hanga nukalipihise no, ka.

⁴⁴ Mumu yami Yehova Zambi yenu, kashika munukalihandununa nukalisele ku usandu, se ni yami nguli musandu. Kanda nukalichisa ni kashitu niumwe mukwa kulikoka ha mavu.

⁴⁵ Mumu yami Yehova nanuchijile ku chifuchi cha Engitu ngukapwe Zambi yenu. Kashika munukapwa asandu, se ni yami nguli musandu.

⁴⁶ Yino ye shimbi ya tushitu, ni ya tujila, ni ya akwa mwono eswe akwenda mu meya, ni ya tushitu eswe akukalala hashi.

⁴⁷ Nukahandunune hakachi ka akwa luchisa ni apema; hakachi ka mukwa mwono yoze munuhasa kumulia ni mukwa mwono yoze kunuchi kuhasa kumulia.