Alevi 1 - MUKANDA USANDU WA ZAMBI 1975

¹ Yehova yasanyika Mose, yamba kuli iye ku mbalaka ya chikungulwila ngwenyi,

² Amba kuli A-Izalele ngwe, Muze umwe mutu hakachi kenu matambula mulambu kuli Yehova, akatambule mulambu wenyi wa yimuna; hanji ngombe, hanji panga, hanji pembe.

³ Nyi mulambu wenyi muupwa ngombe wa kulumba, akamutambule kuji keshi chipa. Akamulambule ku chikolo cha mbalaka ya chikungulwila, akamutambule kumeso ja Yehova.

⁴ Mwe mutu akase kwoko lienyi ha mutwe wa mulambu wa kulumba akamusalakane, akafuke kuhona chenyi.

⁵ Mba akashihe mwe kuji kumeso ja Yehova; asasendote, ana ja Arone, akatambule e manyinga nikwasapwila kwa kujingilika ha chilumbilo chili ku chikolo cha mbalaka ya chikungulwila.

⁶ Akazuwe mulambu wa kulumba, akamutete mu yihanda yenyi.

⁷ Mba ana ja sasendote Arone akase kahia ha chilumbilo, atengeke kunyi ha kahia.

⁸ Asasendote, ana ja Arone, akase ye yihanda, ni mutwe, ni maji, yeswe ya kululika mu ngango ha kunyi jize jili ha kahia ha chilumbilo.

⁹ Alioze yingambiangambia yenyi ni molu jenyi akayikose ni meya. Mba sasendote malumba ye yeswe ha chilumbilo, mulambu wa kulumba, mulambu wa kahia wa lupembo mupema kuli Yehova.

¹⁰ Nyi mulambu wenyi muupwa wa ku limba, hanji panga hanji pembe, akapwe mulambu wa kulumba, akatambule kuji keshi chipa.

¹¹ Akamushihe kumeso ja Yehova ku lumbu lia chilumbilo liatata ku Norte. Mba asasendote, ana ja Arone, akasapwile manyinga jenyi kwa kujingilika ha chilumbilo.

¹² Iye mamuteta mu yihanda hamuwika ni mutwe wenyi ni maji jenyi; mwe sasendote akayise ha kunyi jize jili ha kahia ha chilumbilo, ya kululika mu ngango.

¹³ Alioze yingambiangambia ni molu, akayikose ni meya. Mba sasendote mayilambula ye yeswe, akayilumbe ha chilumbilo. Ukapwe mulambu wa kulumba, mulambu wa kahia, wa lupembo mupema kuli Yehova.

¹⁴ Nyi mulambu wenyi kuli Yehova muupwa wa tujila a kulumba, akatambule mulambu wenyi wa tutele hanji wa ana-a-membe.

¹⁵ Mwe sasendote akamutwale ku chilumbilo akahonde mutwe wenyi akaulumbe ha chilumbilo. Manyinga akaahichishile ku lumbu lia chilumbilo.

¹⁶ Akatukile chisakwilia ni yize yilimo akachimbile ku lumbu lia chilumbilo liatata ku Chivumbuko, ku chichilila cha uto.

¹⁷ Akamupule ku mapulwa jenyi alioze kanda amuhandununa. Sasendote akamulumbe ha chilumbilo, ha kunyi jize jili ha kahia. Ukapwe mulambu wa kulumba, mulambu wa kahia, wa lupembo mupema kuli Yehova.