Akwa Kuyula 9 - MUKANDA USANDU WA ZAMBI 1975

¹ Apimeleke mwana Njerubale yaya ku Shekeme kuli usoko wa naye. Yalishimwinya no hamwe ni usoko weswe wa tato ya naye ngwenyi,

² Hanjikenu kama mu matwi ja malunga eswe a Shekeme ngwenu, Chipema kuli yenu chika? Shina eswe makumi shimbiali a ana a malunga a Njerubale anuyule, nyi shina umuwika anuyule? Iwulukenu nawa, yami nguli chifwaha chenu ni musunya wenu.

³ Mba usoko wa naye ahanjikile maliji ano eswe ha kutwala kuli iye mu matwi ja malunga eswe a Shekeme. Chocho mbunge jo jayile kukaula Apimeleke, mumu ambile ngwo, Iye mwanakwetu.

⁴ Yamwaha makumi shimbiali a mbongo ja prata ja mu zuwo lia Mbale-Mberete mba iye yafweta najo amwe malunga amokomoko a kumukaula.

⁵ Yaya ku zuwo lia tato mu Ofra, yashiha ana-akwo ni ayayo ana ja Njerubale, makumi shimbiali a malunga ha liwe limuwika. Kwasalile wika mwe Yotame kasula-songo wa Njerubale. Iye te haswama.

⁶ Mba akwa Shekeme eswe akungulukile hamwe ni A-Mbete-Milo, yaya, yapwisa Apimeleke mwanangana kwe ku mutondo wa carvalho ku luliwe lwa Shekeme.

⁷ Muze halweza Yotame iye yaya yamana ha songo lia mulundu wa Ngerizime. Yakololoka, yamba kuli ayo ngwenyi, Panjikenu kuli yami enu atu a Shekeme, hanga Zambi akapanjike kuli yenu.

⁸ Limwe tangwa mitondo yayile mukusakula mwanangana wa kwayula. Yamba kuli mutondo wa olevwe ngwo, Pwako mwanangana wetu.

⁹ Alioze mutondo wa olevwe wambile ngwenyi, Te munguhichika maji jami a kulemesa mazambi ni atu ngukaye ngukayule mitondo, nyi?

¹⁰ Mitondo yambile kuli mukuyu ngwo, Tweya yena ukapwe mwanangana wetu.

¹¹ Alioze mukuyu wambile kuli ayo ngwenyi, Te munguhichika kuyema chami ni mihuko yami yipema ngukaye ngukayule mitondo, nyi?

¹² Mitondo yambile kuli mutondo wa uva ngwo, Tweya yena ukapwe mwanangana wetu.

¹³ Alioze mutondo wa uva wambile ngwenyi, Te munguhichika vinyu yami yize yakuwahisa mazambi ni malunga, ngukaye ngukayule mitondo, nyi?

¹⁴ Henaho mitondo yeswe yambile kuli mungonga ngwo, Tweya yena ukapwe mwanangana wetu.

¹⁵ Mungonga wambile ku mitondo ngwenyi, Nyi nunangupwisa mwanangana wenu ni mbunge jipema hitweyenu nukaswamine mu chihuhumuke chami. Alioze nyi ka, kahia kakatuhuke mu mungonga nikulalisa misedru ya Lebano.

¹⁶ Kashika nyi hinwalinga ni mbunge jipema ni umwenemwene muze nwapwisa Apimeleke mwanangana wenu, nyi nunalingi kanawa ni Njerubale ni usoko wenyi, ngwami kachi nunalingi kuli iye nikulita ni yitanga yenyi mba—

¹⁷ mumu tata wanwashilile jita, nikunjila mu Utoji akanupulule ku moko ja A-Mindiane.

¹⁸ Alioze enu musono hinwakatukila munyachi wa tata, hinwashiha anenyi makumi shimbiali a malunga ha liwe limuwika. Hinwapwisa Apimeleke mwana wa ndungo yenyi mwanangana wa A-Shekeme mumu usoko wenu—

¹⁹ alioze nyi musono hinwalinga ni mbunge jipema ni umwenemwene kuli Njerubale ni usoko wenyi hiwahililenu ni Apimeleke, neye akawahilile ni yenu.

²⁰ Alioze nyi kuchapwile chocho kahia kakatuhuke muli Apimeleke kakalalise A-Shekeme ni A-Mbete-Milo, ni kahia kakatuhuke kuli A-Shekeme ni A-Mbete-Milo nikulalisa Apimeleke.

²¹ Mba Yotame yachina, yaya ku Mbia; yatwamako mumu ha woma wa yayo Apimeleke.

²² Apimeleke wayulile A-Izalele miaka yitatu.

²³ Mba Zambi watumine Spiritu mupi hakachi ka Apimeleke ni A-Shekeme, chocho A-Shekeme yakwata mafwefwe ni Apimeleke,

²⁴ hanga upupilo alingile kuli ana a Njerubale makumi shimbiali ukahiluke, ni manyinga jo akapwile hali mwanakwo Apimeleke yoze waashihile, ni hali malunga a Shekeme waze amuhele tachi ja kushiha ayayo.

²⁵ A-Shekeme asele malunga ha milundu kumujikinyina akapupe eswe apalikileko. Mba amwambulwililecho Apimeleke.

²⁶ Ngaale mwana wa Ebede wejile ku Shekeme hamwe ni usoko wenyi. Mba A-Shekeme amufulielele.

²⁷ Yaya ku minda yo. Yahela uva ku minda yo ya uva. Yayikama. Yalinga festa. Yanjila mu zuwo lia zambi yo nikulia, nikunwa, nikutuka Apimeleke.

²⁸ Mba Ngaale mwana wa Ebede yamba ngwenyi, Apimeleke iya? Ni yetu A-Shekeme kuchi twapwa tukamulingile? Te mwana wa Njerubale ni kaliamanga kenyi Zebule kalingilile Hamore tato ya Shekeme? Mba kuchi te mutumulingila yetu?

²⁹ Nyi kachi wano atu apwile ku chiyulo chami! Kachi munguchiza yono Apimeleke. Kachi mungwamba kuli Apimeleke ngwami, Weza ku tujita twe, utuhuke!

³⁰ Muze Zebule, mwe mukwa kuyula chihunda, wevwile maliji a Ngaale mwana wa Ebede watenukine.

³¹ Yatuma tunganda kuli Apimeleke ku Aruma ngwenyi, Ngaale mwana wa Ebede ni usoko wenyi haneza ku Shekeme nikuvundula chihunda kulimika ni yena.

³² Kashika, tuhuka ha ufuku, yena ni malunga aze uli no, nukajikinyine mu minda.

³³ Ha chimenemene, ha kuvumbuka tangwa, nulimeneke nukalundumukine ha chihunda. Muze iye ni malunga aze ali no matuhuka kuli yenu munwalinga cheswacho munuhasa.

³⁴ Chocho Apimeleke ni malunga eswe apwile no akatukile ha ufuku. Yajikinyina Shekeme mu ngango jiwana.

³⁵ Ngaale mwana wa Ebede yatuhuka, yamanyina mu chikolo cha kunjilila mu chihunda, mba Apimeleke ni malunga aze apwile no akatukile kuze ajikinyinyine.

³⁶ Muze Ngaale yamona malunga yamba kuli Zebule ngwenyi, Tala, malunga anakatuka ku milundu. Alioze Zebule yamukumbulula ngwenyi, Unamono yizulie ya milundu ngwe malunga.

³⁷ Ngaale yamba cheka nawa ngwenyi, Tala malunga anakatuka hakachi ka chifuchi. Ngango yimuwika yinejilila ku mutondo wa carvalho wa Menonime.

³⁸ Mba Zebule yamwamba ngwenyi, Kanwa lie lilihilio haliapwila? Ngwami yena wambile ngwe, Apimeleke iya hanga tukamulingile? Ngwami malunga wano ene walelesele, hituhuka ukase no jita.

³⁹ Chocho Ngaale yatuhuka nikutwala malunga a Shekeme. Yasa jita ni Apimeleke.

⁴⁰ Alioze Apimeleke yamuhanga, iye yachina kumeso jenyi. Anji yalemana, yalimbuka hashi ndo ku chikolo cha kunjilila.

⁴¹ Apimeleke watwamine mu Aruma alioze Zebule wahumine Ngaale ni usoko wenyi. Kahashile kutwama mu Shekeme nawa.

⁴² Muze hikwacha malunga atuhukile ku minda mba hachambulula kuli Apimeleke,

⁴³ Hatwala malunga jenyi haateta mu ngango jitatu yajikinyina mu minda. Yatala, yamona malunga matuhuka mu limbo. Yaakatukila, yaashiha.

⁴⁴ Apimeleke ni ngango yize apwile nayo yazomboka, yamanyina mu chikolo cha kunjilila mu chihunda, shimbu ngango jikwo jiali jalundumukine hali atu eswe waze apwile mu minda, yaashiha.

⁴⁵ Apimeleke yasa jita ni akwa chihunda tangwa lieswe. Yatambula che chihunda, yashiha atu eswe apwilemo, yapupa chihunda nikukuwilaho mungwa.

⁴⁶ Muze atu eswe a ku Kaposhi ka Shekeme achivwile anjilile mu mbonge ya zuwo lia Ele-Berete.

⁴⁷ Yambulwila Apimeleke ngwo, Atu eswe a ku Kaposhi ka Shekeme halikungulula.

⁴⁸ Mba Apimeleke yakanduka ku mulundu wa Zalmone hamwe ni malunga aze apwile no. Apimeleke yanda njimbu mu kwoko lienyi; yacha chichita cha tete; yanda, yasa ha chipaya. Yamba kuli malunga aze apwile no ngwenyi, Chino nunangumono ngunalingi, ni yenu lingenu nikawashi.

⁴⁹ Chocho mutu mweswe yachá chichita chenyi, yakaula Apimeleke; yayisa ku mbonge, Yocha ye mbonge, mba atu eswe a ku Kaposhi ka Shekeme yafwa. Ngwe kanunu ka atu, malunga ni mapwo.

⁵⁰ Apimeleke yaya ku Tebeze; yaseleka che chihunda cha Tebeze; yachitambula.

⁵¹ Alioze mu chihunda mwapwile kaposhi wa tachi mba atu eswe a mu chihunda yachinyinamo, ni malunga ni mapwo eswe. Yaliajililamo mba yatuhuka ha fulumba lia kaposhi.

⁵² Apimeleke yaheta ku kaposhi; yasako jita. Yakundama ku chikolo cha kaposhi akamwoche kahia.

⁵³ Umwe pwo yambila liwe lia kutwa wunga ha mutwe wa Apimeleke. Yamuwonda mutwe.

⁵⁴ Iye yatambika fujifuji kuli mukweze wenyi wakumumbachila yitwa yenyi ngwenyi, Tomona katana ke ungushihe, kuchina mamba ngwo, Amushihile kuli pwo. Chocho mukweze wenyi yamutuwa ndusu; yafwa.

⁵⁵ Muze A-Izalele amwene ngwo, Apimeleke hafwa yaya mutu mweswe ku zuwo lienyi.

⁵⁶ Chocho Zambi yafwetesa Apimeleke mulonga uze avulumwine tato, wa kushiha ayayo makumi shimbiali.

⁵⁷ Chikwo nawa Zambi yaneha ungulungulu weswe wa A-Shekeme ukahilukile ha mitwe yo. Shingo lia Yotame wa Njerubale liaholokele hali ayo.