Akwa Kuyula 8 - MUKANDA USANDU WA ZAMBI 1975

¹ Mba A-Eframe yamba kuli iye ngwo, Chuma chino watulinga kuchi chinalumbunuka? Kwatusanyikine muze wayile mukwasa jita ni A-Mindiane. Yamwamba nikutenuka chinji.

² Iye yaakumbulula ngwenyi, Ami yika nalinga ha kucheseka ni chize nwalinga yenu? Masalilo a uva ja A-Eframe kahianyine che kucha cha uva ja A-Abieza, nyi?

³ Zambi hanakunjika ku moko jenu Orepe ni Zepe mianangana a A-Mindiane. Ami yika nahasa kulinga cha kweseka ni chize nwalinga yenu? Mba utenu wo kuli iye yiutepuluka muze iye hahanjika chocho.

⁴ Ngideone yeza ku Yordau, yazauka, iye ni kulakaji atatu a malunga apwile no. Hijaahwa hindu anahange.

⁵ Chocho yamba kuli A-Sukote ngwenyi, Ngunalembe nukahane kulia kuli atu ano anangukaula mumu hijaahwa ni tunahange Zeba ni Zalumuna mianangana ja A-Mindiane.

⁶ Akwa kuyula mu Sukote yamba ngwo, Te hiwakwata Zeba ni Zalumuna mba tukahane kulia kuli tujita twe?

⁷ Ngideone yamba ngwenyi, Kashika muze Yehova hakunjika Zeba ni Zalumuna mu moko jami mungulaswola mijimba yenu ni mbimbo ni mikalale ya mu puya.

⁸ Chize kuze yakanduka ku Penwele yamba maliji wa ene kuli ayo. A-Penwele yakumbulula chizechene ngwe A-Sukote.

⁹ Iye yamba kuli A-Penwele ngwenyi, Muze jita hiyahwa munguhiluka, mungupuzula kaposhi yono.

¹⁰ Zeba ni Zalumuna o te mu Kakore ali hamuwika ni tujita two, kumi lia tununu ni tununu atano, wano ene te hasala a ku tujita eswe a akwa Chivumbuko. Mumu kulakaji ni makumi aali a tununu a akwa tutana hanafu.

¹¹ Ngideone yakandukila jila ya akwa mbalaka, sali lia Chivumbuko ku Noba ni Jogabeha. Yapupa tujita mumu o kalayile.

¹² Zeba ni Zalumuna yachina alioze yaahanga, yakwata mianangana eswe ni aali a A-Mindiane, ngwami, Zeba ni Zalumuna mba yamwanga tujita eswe ni mwongo.

¹³ Henaho Ngideone mwana wa Njoashe yeza ku jita ku jila ya kukandukila ku Here.

¹⁴ Yakwata umwe mukweze wa ku Sukote. Yamuhula mba iye yamulongesa majina ja akwa kuyula ni makulwana a mu Sukote, makumi shimbiali ni malunga shimbiali.

¹⁵ Mba yeza kuli A-Sukote, yamba ngwenyi, Talenu Zeba ni Zalumuna waze nwanguchokele ngwenu, Te hiwakwata Zeba ni Zalumuna tukahane kulia kuli malunga je anahongo?

¹⁶ Kashika yakwata makulwana a chihunda, yanda nawa mbimbo ni mikalale ya mu puya, yalongesa nayo malunga a Sukote.

¹⁷ Yapuzula kaposhi wa Penwele, yashiha malunga jamo.

¹⁸ Mba Ngideone yamba kuli Zeba ni Zalumuna ngwenyi, Malunga nwashihile ku Tabore, kuchi apwile? Yakumbulula ngwo, Chize unapu yenu, no chocho apwile eswe. Eswe apwile ngwe ana ja mwanangana.

¹⁹ Iye yamba ngwenyi, E ayaya aze; ana ja mama. Ni mwono wa Yehova kachi nwaalamwinyine ni mwono kachi ni yami chanushihile.

²⁰ Yamba kuli mwanenyi mutangu Jetere ngwenyi, Katuka washihe. Alioze mwe mukweze katomwene katana kenyi mumu woma evwile se achili mukweze.

²¹ Mba Zeba ni Zalumuna ambile ngwo, Katuka yena mwene utulambe, mumu lunga kakupwa ni tachi ja lunga. Chocho Ngideone yakatuka, yashiha Zeba ni Zalumuna. Yatambula yuma ya oru yapwile ha kota ja tumelu two.

²² Henaho malunga A-Izalele yamba kuli Ngideone ngwo, Pwako mukwa kutuyula, ni yena, ni mwané, ni mujikulu we nawa mumu hiwatupulula ku moko ja A-Mindiane.

²³ Ngideone yaakumbulula ngwenyi, Ami chichi kupwa mukwa kunuyula, chipwe mwanami. Mukwa kunuyula Yehova.

²⁴ Alioze Ngideone yamba ngwenyi, Chuma chimuwika mungwita kuli yenu, mutu mweswe akangwehe yingelengele yize atambwile mu jita. (Se A-Ishemali kakupwa ni yingelengele ya oru).

²⁵ O yakumbulula ngwo, Mutukwahayo ni mbunge yeswe. Yála hina, mba lunga mweswe yambilamo yingelengele yize hatambula mu jita.

²⁶ Pezu ya yingelengele ya oru echile yapwile kanunu ka shekele ni kulakaji shimbiali a shekele ja oru helu lia yingelengele ni mazalo a ufungo yeswe ya kuzala mianangana a Mindiane, ni helu lia malenge a oru apwile ku kota ja tumelu two.

²⁷ Ngideone walingile nayo efode, yayisa mu chihunda chenyi mu Ofra. Mba A-Izalele eswe akawile chuma chize ngwe ukoi. Chalumukine kambwila kuli Ngideone ni kuli usoko wenyi eswe.

²⁸ Chocho A-Mindiane azeyele kuli A-Izalele kahetwile mitwe yo nawa. Chifuchi chahwimine makumi awana a miaka shimbu Ngideone achiliko.

²⁹ Njerubale mwana Njoashe yaya mukutwama mu zuwo lienyi mwene.

³⁰ Ngideone te kali ni makumi shimbiali a ana a malunga a kusema iye mwene mumu wapwile ni mapwo anji.

³¹ Umwe *konkubina yenyi nawa watwamine ku Shekeme yamusemena mwana wa lunga, yamuluka jina lienyi Apimeleke.

³² Mba Ngideone mwana Njoashe yafwa ni ushinakaji upema. Yamufunda mu fuka lia tato Njoashe mu Ofra ya Abieza.

³³ Ha kufwa Ngideone, A-Izalele alumukine nawa nikukaula Ambale ngwe ukoi. Yatenga Mbale-Mberete zambi yo.

³⁴ A-Izalele kewulukile Yehova Zambi yo yoze waapulwile ku moko ja akwa kole jo sali ni sali.

³⁵ Chikwo nawa kalwezele vumbi kuli A-Njerubale (mwe Ngideone) ha yipema yize yeswe iye walingilile A-Izalele.