Akwa Kuyula 7 - MUKANDA USANDU WA ZAMBI 1975

¹ Mba Njerubale (mwe Ngideone) ni waze eswe apwile nenyi alimenekene nikujika chilombo cho ku shima lia meya ku Harode. Chilombo cha A-Mindiane chapwile ku sali lia ku Norte ku mulundu wa More, kwe ku chikulo.

² Yehova yamba kuli Ngideone ngwenyi, Atu ano uli no hoka naye. Chichi kuhasa kuhana A-Mindiane mu moko jo kuchina A-Izalele malisamba nikulimika ni yami ngwo, Moko ja yetwene hatupulula.

³ Kashika ambulula mu matwi ja atu ngwe, Mweswe kanachikima ni woma ahiluke ku zuwo lienyi. Ngideone yaeseka, mba makumi aali a tununu ni tununu aali ahilukile. Kwasalile kumi lia tununu.

⁴ Yehova yamba kuli Ngideone ngwenyi, Hindu, atu hoka naye. Watwale ku lwiji mba mungwaesekelako. Mweswawo mungwamba ngwami, Yono maya ni yena, iye maya. Alioze mweswawo mungwamba ngwami, Yono kechi kuya ni yena, iye kechi kuya.

⁵ Chocho wanehene e atu ku meya mba Yehova yamba kuli Ngideone ngwenyi, Mweswe manwa meya ni limi ngwe kawa kakunwa ukamumanyise ukawenyi. Ni mweswe manwa nikuzondama ha makungunwa neye chizechene.

⁶ Waze eswe anwine nikusa moko jo ku makanwa apwile kulakaji atatu a malunga. Akwo eswe azondamine mukunwa.

⁷ Yehova yamba kuli Ngideone ngwenyi, Kuli wano kulakaji atatu mungunupulula, mungukunjika A-Mindiane mu moko jenu. Akwo eswe akaye mutu mweswe ku zuwo lienyi.

⁸ Mba e atu atambwile kulia mu moko jo hamwe ni yitavwi. Iye yatuma A-Izalele akwo eswe ku mbalaka jo, yasala ni e kulakaji atatu. Chilombo cha A-Mindiane chapwile ku mwanda mu chikulo.

⁹ Ufuku uze wene Yehova yamba kuli iye ngwenyi, Katuka ukapupe chilombo mumu hinachikunjika mu moko jenu.

¹⁰ Alioze nyi woma unevu, Palumuka ku chilombo ni mukweze we Pura,

¹¹ muwivwa yize mamba, mba moko je matakama kupupa chilombo. Chocho yaya ni Pura mukweze wenyi ndo kuli tulayi a tujita ha kujingilika chilombo.

¹² Mba A-Mindiane ni A-Amaleke ni atu eswe a ku Chivumbuko apombele mu chikulo, kwoka ngwe makumbi. Chipwe tumelu two kechi kuhasa kwaalula, anji ngwe masekeseke ha ngenge ya kalunga-lwiji.

¹³ Ha kuheta Ngideone, umwe lunga kanaula chilota kuli sepa lienyi ngwenyi, Nalotanga chilota. Kumanyi kambolo ka sevada yikalangumukina mu chilombo cha A-Mindiane. Yikaheta ku mbalaka. Yikayilamba chocho yiyipuzuka, yiyichilumuka, yiyipomba he ha mavu.

¹⁴ Sepa lienyi yamba ngwenyi, Kuchalumbunukine chuma chikwo shina katana wa Ngideone mwana wa Njoashe, Ka-Izalele. Zambi hanakunjika A-Mindiane ni mbunga yo yeswe ku moko jenyi.

¹⁵ Muze Ngideone wevwile kwaula cha chilota ni ulumbunwiso wacho yawayila Zambi, yahiluka ku chilombo cha A-Izalele yamba ngwenyi, Katukenu mumu Yehova hanakunjika mbunga ya A-Mindiane mu moko jenu.

¹⁶ Yahandununa e kulakaji atatu mu ngango jitatu. Yaaha yitavwi ni mitondo ya upolongo, ni masoka muchima lia mitondo.

¹⁷ Yamba kuli ayo ngwenyi, Senu meso kuli yami nukangwimbulule. Muze munguheta ku songo lia chilombo, chize mungulinga yami, ni yenu lingenu chizechene.

¹⁸ Muze mungwimba chitavwi yami ni waze eswe nguli no hamuwika, mba yenu munwimba yitavwi kweswe kwa kujingilika chilombo cheswe, nukakololoke ngwenu, Hali Yehova ni Ngideone.

¹⁹ Chocho Ngideone ni kulakaji lia malunga hamwe nenyi ahetele ku songo lia chilombo ha kuputuka kalayi ka hakachi ka ufuku, te tulayi achiasa. Mba embile yitavwi nikushiha mitondo apwile nayo mu moko jo.

²⁰ Mba je ngango jitatu no embile yitavwi nikushiha mitondo. Masoka anaakwata mu moko a chimeso shimbu makwata yitavwi ya kwimba mu moko a chindume. Yakololoka ngwo, Katana wa Yehova ni wa Ngideone.

²¹ Amanyine mutu mweswe mu muhela wenyi kwa kujingilika chilombo mba tujita eswe yachina. Yachina nikutetwoka.

²² Muze o yemba kulakaji atatu a yitavwi Yehova yatalikisa katana ka mutu mweswe kulimika ni mukwo nikulimika ni tujita eswe. Chocho tujita eswe achinyine ndo ku Mbete-Shita kwakuya ku Zelela, ndo ku njiza ya Abelemehola ku Tabata.

²³ Asanyikine malunga A-Izalele akatuke ku Napatali, ni ku Ashe, ni ku Manase kweswe. O yeza yahanga A-Mindiane.

²⁴ Ngideone yatuma tunganda ndusu chifuchi cheswe cha Eframe ku milundu ngwenyi, Palumukenu kuli A-Mindiane nukaajikinyine ku njiji ndo ku Mbete-Bara, ni ku Yordau nawa. Chocho malunga eswe a Eframe aasanyikine, yajikinyina ku njiji ndo ku Mbete-Bara ni ku Yordau nawa.

²⁵ Yakwata mianangana aali a A-Mindiane, mukwo Orepe mukwo Zepe. Yashiha Orepe ku liwe lia Orepe, yashiha Zepe ku ukamino wa uva wa Zepe shimbu machihanga A-Mindiane. Yaneha mitwe ya Orepe ni Zepe kuli Ngideone mu sali lia Yordau.