Akwa Kuyula 6 - MUKANDA USANDU WA ZAMBI 1975

¹ A-Izalele alingile chipi kumeso ja Yehova, mba Yehova waakunjikile mu moko ja A-Mindiane miaka shimbiali.

² A-Mindiane akumbile A Izalele mba A-Izalele alilingilile mena a kuswamina mu milundu, hi yivwenge, ni mbonge, mumu ha tachi ja A-Mindiane.

³ Mumu muze A-Izalele alimine mbuto, A-Mindiane, ni A-Amaleke, ni akwa Chivumbuko ejile nikwapupa.

⁴ Ejile ni kujika yilombo yo hatalanganyi no nikwenyeka mbuto ya hashi ndo ku Ngeza, Kahichikile kulia nichimwe mu chifuchi cha Izalele, chipwe panga, chipwe ngombe, chipwe chimbulu.

⁵ Mumu ejile ni yimuna jo, ni mbalaka jo kwoka ngwe makumbi. Chipwe ene, chipwe tumelu two mumwe mahasa kwaalula. Chocho enyekene chifuchi ha kunjila cho.

⁶ Mba A-Izalele hijaahwa mumu hali A-Mindiane chocho A-Izalele atetele kuli Yehova aakwase.

⁷ Muze A-Izalele atetele kuli Yehova mumu hali A-Mindiane,

⁸ Yehova yaatuma profeta. Iye yamba ngwenyi, Chocho anambe Yehova mwe Zambi ya Izalele ngwenyi, Nanukandwishile chize ku Engitu; nanuchijile ku zuwo lia upinji,

⁹ Nanupulwile ku moko ja A-Engitu ni ku moko ja waze eswe anupinjishile, Naahumine kumeso jenu; nanuhele chifuchi cho.

¹⁰ Nanwambile ngwami, Yami Yehova Zambi yenu, kashika kanda nulemesa mazambi ja A-Amore nwatwama mu chifuchi cho. Alioze kunwapanjikile ku liji liami.

¹¹ Mungelo wa Yehova yeza, yatwama mushi lia mutondo wa carvalho mu Ofra wa Njoashe Ka-Abieza shimbu mwanenyi Ngideone machizungula tiliku mu ukamino wa Vinyu, akayisweke kuli A-Mindiane.

¹² Mungelo wa Yehova yasoloka, yamba kuli iye ngwenyi, Yehova kwali hamwe ni yena, Uli lunga wa tachi ni hamu.

¹³ Ngideone yamukumbulula ngwenyi, Mwane, nyi chocho Yehova kwali hamwe ni yetu, kuchi te yuma yino yeswe hiyatuwana? Yikomokeso yenyi yeswe yilihiyo? Yize atata akutulweza ngwo, Te Yehova katuchijile ku Engitu nyi? Alioze haliapwila Yehova hatumbila. Hatukunjika kuli A-Mindiane.

¹⁴ Yehova yatewuluka kuli iye ngwenyi, Yako mu tachi je jino jene, ukapulule A-Izalele ku moko ja A-Mindiane. Ngunakutumu yami.

¹⁵ Iye yamba ngwenyi, Mwane, kuchi munguhasa kupulula A-Izalele? Usoko wami e alelu muli A-Manase, mba yami nguli mwe mukepe mu munyachi wa yetu.

¹⁶ Yehova yamba kuli iye ngwenyi, Alioze yami mungukapwa hamwe ni yena mba mukalamba A-Mindiane ngwe mutu umuwika.

¹⁷ Iye yamukumbulula ngwenyi, Nyi hinawana vumbi kumeso je mba ungulweze chilayi cha kulumbunuka ngwami, Yena mwene unahanjika ni yami.

¹⁸ Kanda ukatuka kuno ndo mungwiza kuli yena ngukunehene mulambu wami wa kutumbika kumeso je. Iye yamba ngwenyi, Mungutwama ndo hiweza.

¹⁹ Chocho Ngideone yanjila mu zuwo lienyi; yalulika mwana-pembe ni tumbolo kutushi futunwiso twa efa yimuwika ya wunga. Yifwo yayisa mu mutonga; mutato mu ndeho, mba yayineha kuli iye mushi lia mutondo wa carvalho, yamwahayo.

²⁰ Mungelo wa Yehova yamba kuli iye ngwenyi, Anda yifwo ni tumbolo kutushi futunwiso Ukayise ha liwe lino, ukazujileho we mutato. Chocho yalinga.

²¹ Mba mungelo wa Yehova yazoza mulumbu uze apwile nawo mu kwoko lienyi, yasa songo liawo ha yifwo ni tumbolo kutushi futunwiso. Hi ku liwe kwatuhukile kahia nikulalisa ye yifwo ni tumbolo kutushi futunwiso. Hoho mwe mungelo wa Yehova yajimuka kumeso jenyi.

²² Mba Ngideone yanyingika ngwenyi, Mwe mungelo wa Yehova. Ngideone yamba ngwenyi, Lwangu, Mwene Yehova! Mumu hinamona mungelo wa Yehova meso ni meso.

²³ Alioze Yehova yamwamba ngwenyi, Hwima, kanda wivwa woma. Kuchi kufwa.

²⁴ Henaho Ngideone yatunga chilumbilo kuli Yehova, yachiluka jina ngwenyi, Yehova-Shalome. Kuchili ndo musono ku Ofra wa A-Abieza.

²⁵ Ufuku uze wene Yehova yamba kuli iye ngwenyi, Twala kuji ya ngombe wa tatenu, mwe kuji wamuchiali wa miaka shimbiali ukapuzule chilumbilo cha Mbale cha tatenu, ukateteko Ashera aze aliko.

²⁶ Mba tunga chilumbilo kuli Yehova Zambi ye cha mawe a kutunga nikulita helu lia homa hano hakolo. Mba muwanda kuji wamuchiali ukamulumbe mulambu wa kulumba ni mitondo ya Ashera yize mutetako.

²⁷ Chocho Ngideone watwalile kumi lia malunga ngamba jenyi, yalinga chizechene ngwe Yehova hamutuma. Alioze woma evwile kuchilinga ha mwalwa mumu hali akwa zuwo Ha tato ni malunga a chihunda, kashika yachilinga ha ufuku.

²⁸ Muze malunga a chihunda ahindukile chimenemene kumanyi, chilumbilo cha Mbale hachipuzula ni e Ashera jacho haateta, ni kuji wamuchiali hamulumba ha chilumbilo chize hatunga.

²⁹ Ambile umwe kuli mukwo ni mukwo ngwo, Iya walinganga chuma chino? Muze hafupafupa nikuhula, yamba ngwo, Ngideone mwana wa Njoashe hachilinga.

³⁰ Mba malunga a chihunda yamba kuli Njoashe ngwo, Neha mwané akafwe, mumu hapuzula chilumbilo cha Mbale nikuteta e Ashera aliko.

³¹ Alioze Njoashe yamba kuli waze eswe alilongele kulimika nenyi ngwenyi, Kumanyi enu munuhakwila Mbale? Enu munupwa ngaji jenyi? Mweswe mahakwila Mbale mamushiha chimene chino. Nyi Mbale kapwa zambi alihakwile mwene se chilumbilo chenyi hachipuzula.

³² Kashika tangwa lize amulukile jina Njerubale, Unalumbunuka, Mbale akalihakwile nenyi; mumu hapuzula chilumbilo chenyi.

³³ Henaho A-Mindiane eswe ni A-Amaleke e akwa Chivumbuko alikungulwile, yazauka Yordau, yasa chilombo cho mu chikulo cha Yezerele.

³⁴ Alioze Spiritu ya Yehova yahulumukina hali Ngideone; iye yahumuna chitavwi mba yasanyika A-Abieza akamukaule.

³⁵ Yatuma tunganda ndusu muli A-Manase, no nawa aasanyikine kumukaula. Yatuma tunganda kuli A-Ashe, ni A-Zapulone, ni A-Napatali no akandukile kulitakana.

³⁶ Mba Ngideone yamba kuli Zambi ngwenyi, Nyi unambe kupulula A-Izalele ni kwoko liami ngwe hiwamba,

³⁷ tala ngunase wona wa kutewula kuli panga hashi ha chizungwilo. Nyi mukupwa mume ha wona ukawawo, alioze mavu a hashi mapwa omu, henaho mungunyingika ngwami, Mukapulula A-Izalele ni kwoko liami ngwe hiwamba.

³⁸ Chocho chapwile. Muze hatuhuka chimene yakama we wona, mwatuhukilemo meya a kuzalisa musenge.

³⁹ Mba Ngideone yamba kuli Zambi ngwenyi, Utenu we kanda ukasumukina hali yami ngukahanjike kano kamuwika. Ngunaliumbu, ngucheseke kamuwika nawa ni we wona. Wona ukome mba hakapwe mume ha mavu a hashi.

⁴⁰ Zambi chocho yalinga ufuku uze mumu we wona womine chau alioze hapwile mume ha mavu eswe a kujingilika.