Akwa Kuyula 5 - MUKANDA USANDU WA ZAMBI 1975

¹ Ha tangwa Henaho embile Debola ni Mbarake mwana wa Abinoame ngwo,

² Mumu akwa lutwe atetekelele mu Izalele ni e atu alihanyine ni mbunge yeswe, kashika mungufumanyisa Yehova.

³ Ivwenu mianangana! Halakanenu yilota! Kuli Yehova mungwimba Munguhana mwimbo wami kuli Yehova, mwe Zambi ya Izalele.

⁴ Yehova muze yena wakatukile ku Sere, Muze waputukile kwenda ku chifuchi cha Endome hashi hanyikine, malilu asotokele, ewa malelwa asotokele vula.

⁵ Milundu yanyikine kumeso ja Yehova, chipwe Sinai kumeso ja Yehova mwe Zambi ya Izalele.

⁶ Mu matangwa a Shamgare mwana wa Anate, mu matangwa a Jaele atu kendele mu yendo. Waze endele apalikile mu tujila tuze twa kuswama.

⁷ Yihunda yajimine mu Izalele, yajimine jito ndo yena Debola wasolokele ngwe naye mu Izalele.

⁸ Muze asakwile mazambi aha, mba kwapwile jita mwe mu yikolo. Chipwe hakachi ka makumi awana a tununu twa atu mu Izalele, te mawana hanji lukepwe hanji kunga, nyi?

⁹ Mbunge yami yili kuli akapitau A-Izalele, mumu alihanyine ni mbunge yeswe hakachi ka atu. Fumanyisenu Yehova!

¹⁰ Ambululenu, enu nwakwenda ha yimbulu atoma, enu nwakutwama mu makupu, ni yenu nawa nwakwenda hashi mu majila.

¹¹ Kusuku ni zungo lia ngashi, kuze akutahila meya kwenako akwambujola kukumba cha Yehova, kukumba cha atu jenyi mu Izalele. Mba kwe ku yikolo endele atu a Yehova.

¹² Laula! Laula Debola! Laula! Laula wimbe mwaso! Ena Mbarake! Katuka utwale funge je, ena mwana wa Abinoame.

¹³ Mba waze asalile a kuli alemu apalumukine, atu a Yehova apalumukine kulimika ni akwa ndundo.

¹⁴ Chize ku Eframe kwakatukile muji wa kulimika ni Amaleke Nikukukaula yena Mbenjamine ni usoko we. Ku Makire kwakatukile akapitau. Ku Zapulone kwakatukile waze ambata mulumbu wa chiyulo.

¹⁵ Yilolo a Isaka akawile Debola. A-Isaka akawile Mbarake. Ndo ku chikulo azombokele mwe mu ngano jenyi. Hakachi ka usoko wa A-Rupene kwapwile manyonga anji a mu mbunge.

¹⁶ Kuchi te wasalile hakachi ka mapanga ukevwe waze masanyika yendo ni ndembo? Hakachi ka usoko wa A-Rupene kwapwile manyonga anji a mu mbunge.

¹⁷ A-Ngiliate asalile sali lize lia Yordau. Mba A-Ndane kuchi te asalile ku mato? A-Ashe atwamine chizechene ku mbaka ya kalunga-lwiji ni kuhwima ha zuzu jenyi.

¹⁸ A-Zapulone anjilile mu Utoji ndo ku kufwa. A-Napatali chimuwika he ha milundu ya chifuchi.

¹⁹ Mianangana ejile. Ashile jita. Henaho ashile jita e mianangana a Kanana ku Tanaka ku njiji ja Megidu alioze upite wa prata kautambwile.

²⁰ Jita yakatukile mwilu. Chipwe matongonoshi mu majila jo ashile jita ni Sisera.

²¹ Mba muhwiji wa Kishone waahungumwine. We muhwiji Ukulu; muhwiji wa Kishone. Mbunge yami, mba hiyaliata hali akwa ndundo!

²² Cho kunuma cha molu ja tuvwalu ha kuzombokazomboka cha tuvwalu.

²³ Mwe mungelo wa Yehova ngwenyi, Shinga A-Meroze. Akwa kutwamako akaashinge ni shingo Usasu, mumu kejile kukwasa Yehova. Kejile kukwasa Yehova kulimika ni akwa ndundo.

²⁴ Jaele pwo lia Hepere Ka-Kene akawahe helu lia mapwo eswe. Akawahe helu lia mapwo eswe a mu mbalaka.

²⁵ Mwe lunga wechile meya mba yamwaha yamwa. Yamunehena maji a yamwa mu chenga cha wanangana.

²⁶ Yasa kwoko lienyi ku lumbambo wa mbalaka. Kwoko henyi lia chindume yilikwata muhato wa mukwa milimo. Yalamba Sisera, yawonda mutwe wenyi. Yatuwa mbalangwe yenyi nikuyilokola.

²⁷ Sisera yazondama, yalimbuka, yapomba kulu ku yiliato yenyi. Kwe ku yihato yenyi yazondamina, yalimbukila. Kuze yazondamina kwenako yafwila.

²⁸ Naye ya Sisera yatalatala ku njanela; Ku kapenda yalilila ngwenyi, Kuchi te temba henyi liaswililika chocho? Kuchi te lushindo wa matemba jenyi chisolo kumwivwa?

²⁹ Mapwo jenyi akwa mana anamukumbulula, chipwe mwene kanalikumbulula ngwo,

³⁰ Hanji upite analalukila ha kuuwana nikuuteta. Pwo umuwika hanji aali hali lunga mweswe, ni mahina a kulomba hali Sisera. Mahina a kulomba mbordado. Ni hali yami mahina aali a kulomba mbordado, Ha kusa ku kota yami.

³¹ Yehova, chocho akafwe akwa kole je eswe. Alioze masepa je akapwe ngwe tangwa muze mulivumbuka ni tachi jalio. Mba chifuchi chahwimine makumi awana a miaka.