Akwa Kuyula 3 - MUKANDA USANDU WA ZAMBI 1975

¹ Wano mavungu Yehova kaachijile akeseke no A-Izalele, te A-Izalele aze kanda achimona jita niyimwe mu Kanana.

² Chapwile hanga yisemuko ya A-Izalele akanyingike jita akalongese jita waze te kanda ayinyingika kama.

³ E mavungu te wano; miata atano ja A-Filistea, ni A-Kanana eswe, ni A-Sendone, ni A-Hevwe aze atwamine ku mulundu wa Lebano chize ku mulundu wa Mbale-Hermone ndo ku kunjila ku Hamate.

⁴ Apwile akwa kweseka A-Izalele, hanga Zambi akanyingike nyi A-Izalele mononoka ku shimbi ja Yehova jize atumine tulamba two kuli Mose.

⁵ Chocho A-Izalele atwamine hakachi ka A-Kanana, ni A-Hete, ni A-Amore, ni A-Perize, ni A-Hevwe, ni A-Yepushe.

⁶ A-Izalele ambachile ana jo a mapwo, nikuhana ana jo a mapwo kuli ana ja malunga ja enya chifuchi. Alingilile mazambi jo.

⁷ A-Izalele alingile chipi kumeso ja Yehova nikuvulama Yehova Zambi yo nikulingila Ambale ni Ashera.

⁸ Kashika utenu wa, Yehova wakasumukine hali A-Izalele. Yaalanjisa ku moko ja Kushane-Rishataime mwanangana wa Mesopotamia mba A-Izalele alingilile Kushane-Rishataime miaka nake.

⁹ Alioze muze A-Izalele atetele kuli Yehova, Yehova waahele chipulule akaapulule, jina lienyi Oteniele mwana wa Kenaze mwanakwo wa Kalemba.

¹⁰ Spiritu ya Yehova wejile hali iye mba wayulile A-Izalele. Yaya ku jita, mba Yehova yakunjika Kushane-Rishataime mwanangana wa Mesopotamia mu moko jenyi. Kwoko lienyi liakumbile Kushane-Rishataime.

¹¹ Chocho chifuchi chahwimine makumi awana a miaka. Mba Oteniele mwana wa Kenaze wafwile.

¹² Cheka nawa A-Izalele alingile chipi kumeso ja Yehova mba Yehova yahana tachi kuli Eglone mwanangana wa Moape wa kulimika ni A-Izalele mumu halinga chipi kumeso ja Yehova.

¹³ Eglone wakungile kuli iye A-Amone, ni A-Amaleke, yaya, yakumba A-Izalele, yatambula limbo lia mingaji.

¹⁴ Mba A-Izalele alingilile Eglone mwanangana wa Moape kumi lia miaka ni miaka nake.

¹⁵ Alioze muze A-Izalele atetele kuli Yehova, Yehova waahele chipulule, jina lienyi Ehude mwana wa Ngera Ka-Mbenjamine, iye mukwa chipipa. A-Izalele amutumine ni milambu kuli Eglone mwanangana wa Moape.

¹⁶ Alioze Ehude walifulilile katana wa mukwale wa mbandu yimuwika, yamujichikila ha shina lia kulu lienyi lia chindume muchima lia mazalo jenyi.

¹⁷ Yahana milambu kuli Eglone mwanangana wa Moape. Eglone watohele chikolo ni maji.

¹⁸ Muze Ehude hamana kuhana milambu yakatwisa waze ambachile milambu.

¹⁹ Ahoze iye mwene muze haheta ku mawe a kwola hakamwihi ni Ngilingali yahiluka, yamba ngwenyi, Mwanangana nguli ni liji kukwaha, ahoze ha ukawetu. Mba iye yamba ngwenyi, Hola. Kashika atu jenyi eswe akatukile kumeso jenyi.

²⁰ Ehude yakundama kuli iye shimbu te anatwama ukawenyi mu chipatulo chenyi cha chihuhumuke cha helu. Ehude yamba ngwenyi, Liji nguli nalio ha Zambi kuli yena. Mba yakatuka ku chitwamo chenyi.

²¹ Ehude yolola kwoko lienyi lia chimeso yakwata katana ku shina ha kulu lienyi ha chindume, yamunjisa mu jimo henyi.

²² Ni chikundo chanjilile kunyima ha chikungo mba maji yatakana helu lia chikungo mumu kachijile nawa katana mu jimo henyi. Mba ye yipi yatuhukile.

²³ Mba Ehude yatuhukila ku chipatulo, yájila mapito a chipatulo cha helu hali iye, yaayika.

²⁴ Muze te hakatuka ngamba ejile mba muze hamona mapito a chipatulo cha helu a kuyika anyongene ngwo, Hanji kanayi mu retrete ya chipatulo cha helu.

²⁵ Ashimbwile ndo evwile sonyi, hindu kazulwile mapito a chipatulo cha helu. Kashika yanda sapi, yaya, yaazulula, kumanyi mwata wo hashi ali, hafwa.

²⁶ Ehude yachina shimbu o machilaluka, yahiana ha mawe a kwola, yeza ku Saira.

²⁷ Muze haheta yemba chitavwi mu chifuchi cha Eframe ku milundu, mba A-Izalele akatukile ku chifuchi cha milundu hamwe nenyi, iye te kanaatetekela.

²⁸ Yamba kuli ayo ngwenyi, Ngukaulenu mumu Yehova hahana akwa kole jenu A-Moape mu kwoko lienu. Chocho apalumukine kunyima yenyi nikutambula Yordau ku yau ya ha mwa kuli A-Moape. Katayijile niumwe kuzauka.

²⁹ Ha mwaka uze ashihile ngwe kumi lia tununu a A-Moape, eswe yitakame angunu niumwe wombokele wakuhi.

³⁰ Tangwa lize A-Moape azeyele kushi Ha kwoko lia A-Izalele mba chifuchi chahwimine makumi nake a miaka.

³¹ Kulutwe kwapwile Shamgare mwana wa Anate. Washihile kulakaji asambano a A-Filistea ni musongolwela wa kwendesa nawo ngombe. Iye nawa wapulwile A-Izalele.